1-2 Hein beǥu pa he midhadì diyà te Juda si Jehoyakim, he anak ni Josia, migkaǥi is Nengazen kayi te kedì te, “Hitindeg ka ziyà te lama te valey ku ne keǥiyi nu is langun he menge etew he ebpemuun diyà te menge inged diyà te Juda he edhendutun te ked-azap. Keǥiya nu ziyà te kandan is langun he ibpekaǥi ku kenikew, ne kenè nu heini terini. 3 Su kela ke mebpemineg ded sikandan kenikew ne ed-engkezan dan is mezaat he vetasan dan. Su emun ebeelan dan heeyan, ne kenè ku edleusen is kezeetan he mibpelenuwan ku te ebaal ziyà te kandan tenged te mezaat he menge vaal zan. 4 Keǥiya nu kandan he iyan heini migkaǥi ku: Emun kenè kew ebpemineg kedì wey kenè kew edtuman te menge kesuǥuan ku he imbeǥey ku keniyu, 5 wey emun kenè niw ebpemineǥen is mibpengaǥi te menge suluǥuen ku he menge mibpenaub ku, he layun ku ibpehendiyà te keniyu piru wazè niw gihapun pemineǥa, 6 edezeetan ku heini is baley ku iring te kedezeeti ku te Shilo. Ne heini he inged, edrewakan te menge etew ziyà te langun he menge nasyun kayi te tivuuk he kelibutan.”

7 Is menge memumuhat, is menge ebpeneuven, wey is langun he menge etew nekezineg te migkaǥi ni Jeremias diyà te valey te Nengazen. 8 Ne hein nekepasad si Jeremias te kegkaǥi kayi, midakep sikandin te menge memumuhat, menge ebpeneuven, wey zuma he menge etew, ne migkeǥiyan dan te, “Ereg ka he ebpatey! 9 Maan is migkaǥi ka pinaaǥi te ngazan te Nengazen he heini is baley te Nengazen edezeetan iring te kedezeeti te Shilo, ne heini is inged egkehimu he mekevulungbulung ne kenè en egkeubpaan?” Ne midakep dan si Jeremias dutun te valey te Nengazen.

10 Ne hein nezineg heini te menge upisyal te Juda, migenat dan puun te turuǥan, ne midhendiyè dan te valey te Nengazen. Mibpinuu zan diyà te veyeey he migngezanan te Beǥu he Gemawan he valey te Nengazen he para te kedhukum. 11 Ne migkaǥi is menge memumuhat wey is menge ebpeneuven diyà te menge upisyal wey ziyà te langun he menge etew zutun te, “Heini he etew ereg he edhukuman te silut he kemetayen, su migkaǥi sikandin te mezaat he ebpekesuǥat kayi he inged. Iyan kew mismu nekezineg kandin!”

12 Ne zutun migkeǥiyan ni Jeremias is menge upisyal wey is langun he menge etew zutun te, “Midsuǥù a te Nengazen te kegkaǥi te mezaat he ebpekesuǥat kayi te valey zin wey kayi te inged, ne iyan heini nezineg niw. 13 Umbe, beǥuwa niw en is betasan niw wey menge vaal niw, ne sunuza niw is Nengazen he Megbevayè niw. Su emun ebeelan niw heini kenà edleusen te Nengazen is kezeetan he nekaǥi zin he ebpekesuǥat keniyu. 14 Ne bahin kedì, ne wazè ku egkehimu. Beeli niw kayi te kedì ke hengkey is meupiya wey hustu para keniyu. 15 Piru tentenuzi niw heini: Emun edhimetayan a keniyu, zuen niw televaken wey is menge etew kayi te inged tenged te kedhimatey niw te wazà mekesalà, su is tutuu midsuǥù a te Nengazen te kegkaǥi kayi te langun he nezineg niw ǥuntaan.”

16 Ne migkeǥiyan te menge upisyal wey te langun he menge etew zutun is menge memumuhat wey menge ebpeneuven te, “Kenà sikandin ereg he edhukuman te silut he kemetayen, su migkaǥi sikandin diyà te kenitew pinaaǥi te ngazan te Nengazen he Megbevayè tew.”

17 Ne zuen nepipira he menge edumala he midhitindeg diyà te etuvangan ne migkeǥiyan dan is langun he netiǥum dutun, te, 18 “Hein si Hezekia pa is hadì te Juda, si Mica he tig-Moreshet, midtudtul zin diyà te langun he menge etew kayi te Juda is menge lalag te Nengazen. Ke sikandin te, ‘Migkaǥi is Nengazen he Mekeǥeǥehem he edezeetan is Zion, is inged te Jerusalem. Egkeiring heini te mid-eradu he bevesukà, ne egkehimu heini he egketembuan te menge nengeǥevà. Ne egkehimu heini he ketelunan is buvungan he mibengunan te valey te Nengazen.’ 19 Ne midhimetayan be sikandin ni Hezekia wey te minsan hentei kayi te Juda? Wazà! Su midtahud ni Hezekia is Nengazen ne midangep diyà te kandin. Umbe wazà leusa te Nengazen is kezeetan he migkaǥi zin he ebpekesuǥat kandan. Ne ǥuntaan emun edhimetayan niw si Jeremias, ne iyan kew mismu ed-uwit te mekahandekhandek he idsilut keniyu.”

20 Dutun he timpu, zuen etew he midtudtul zin is ibpekaǥi te Nengazen. Is ngazan din iyan si Uria he anak ni Shemaya he tig-Kiriat Jearim. Migkaǥi zin daan is mezaat he ebpekesuǥat kayi he inged wey nasyun iring te migkaǥi ni Jeremias. 21 Ne hein nezineg ni Hadì Jehoyakim wey te langun he menge upisyal zin wey te menge pengulu is migkaǥi ni Uria, midtinguhè dan is kedhimetayi kandin. Piru nezineg haazà ni Uria umbe mibpelaǥuy sikandin pehendiyà te Ehipto tenged te kegkahandek din. 22 Piru midsuǥù ni Hadì Jehoyakim si Elnatan he anak ni Acbor zuma te zuma he menge etew te kedhendiyà te Ehipto. 23 Migkuwa zan si Uria ne miduma zan diyà te ki Hadì Jehoyakim, ne impehimetayan sikandin ni Hadì Jehoyakim pinaaǥi te ispada ne impetimbag din diyà te penlevengà te menge etew zà duen.

24 Si Jeremias midtevangan ni Ahikam te anak ni Shafan. Umbe wazà sikandin ikeveǥey ziyà te menge etew wey zan mehimetayi.