1 Dutun te iyan ded he tuig, hein ikelima he vulan dutun te ikeepat he tuig te kedhadì ni Zedekia ziyà te Juda, is ebpeneuven he si Hanania he anak ni Azur he tig-Gibeon, migkaǥi kayi te kediey ziyà te valey te Nengazen diyà te etuvangan te menge memumuhat wey te langun he menge etew zutun. Ke sikandin te, 2 “Iyan heini migkaǥi te Nengazen he Mekeǥeǥehem, he Megbevayà te Israel: Egevaan ku en is gehem te hadì te Babilonia. 3 Seled te zezuwa he tuig idlikù kayi he lugar is langun he ǥelemiten diyà te valey ku he mibpenguwa ni Hadì Nebucadnezar ne mid-uwit din diyà te Babilonia. 4 Ibpelikù ku zaan kayi si Hadì Jehoyakin he hadì te Juda he anak ni Jehoyakim, wey is langun he menge tig-Juda he mibihag diyà te Babilonia, su egevaan ku en is gehem te hadì te Babilonia. Iyan a, is Nengazen, is migkaǥi kayi.”

5 Ne midtavak te ebpeneuven he si Jeremias is ebpeneuven he si Hanania diyà te etuvangan te menge memumuhat wey te ebpemenhitindeg he menge etew ziyà te valey te Nengazen. 6 Ke sikandin te, “Amen! Deyzey pezem ke ebeelan te Nengazen heeyan is migkaǥi nu he idlikù din kayi is menge gelemiten kayi te valey zin wey is langun he mibihag pehendiyà te Babilonia. 7 Piru pemineǥa nu heini is egkeǥiyen ku ziyà te kenikew wey ziyà te langun he menge etew he nemineg. 8 Is menge ebpeneuven he nehuna kenita nenagnè dan dengan he zuen ebpekeuma he tebek, vitil, wey menge zaru diyà te mahabet he menge nasyun wey ziyà te mekeǥeǥehem he menge ginhedian. 9 Umbe, is ebpeneuven he edtagnà te kelinew kinahanglan he zuen din puriba. Emun egkehitavù is migkaǥi zin, egkilelaan sikandin he tutuu he midsuǥù te Nengazen.”

10 Ne zutun, migkuwa zuen te ebpeneuven he si Hanania sikan is eyuǥu ziyà te tengel ni Jeremias ne mibadtì din heini. 11 Ne migkeǥiyan din is menge etew zutun te, “Iyan heini migkaǥi te Nengazen: Is menge etew ziyà te menge nasyun he midsakup ni Hadì Nebucadnezar he hadì te Babilonia iring te mid-eyuǥuwan. Piru edezeetan ku is eyuǥu seled te zezuwa he tuig.” Ne mid-awè dutun si Jeremias.

12 Ne wazè en meuǥet dutun te kebedtia te ebpeneuven he si Hanania zuen te eyuǥu ziyà te tengel ni Jeremias, migkaǥi is Nengazen diyà te ki Jeremias te, 13 “Genat ka, ne keǥiyi nu si Hanania he iyan heini migkaǥi ku: Mibadtì nu is eyuǥu he kayu piru ed-ilisan ku heini te eyuǥu he putew. 14 Siak, is Nengazen he Mekeǥeǥehem, he Megbevayà te Israel migkaǥi a te: Ed-eyuǥuwan ku kayi te eyuǥu he putew is menge etew ziyà te langun he menge nasyun, su wey zan mekepenilbi ki Hadì Nebucadnezar he hadì te Babilonia. Minsan is dumezaas he menge langgam ibpezizalem ku te kedumala zin.” 15-16 Ne migkaǥi is ebpeneuven he si Jeremias diyà te ebpeneuven he si Hanania te, “Pemineg ka, Hanania! Is Nengazen wazà medsuǥù kenikew! Ne impetuu nu is menge etew kayi te nasyun te tarù. Umbe iyan heini migkaǥi te Nengazen: Id-awè ku sikew kayi te kelibutan. Guntaan mismu he tuig ebpatey ka su mibpenurù nu is menge etew te kebpekidsukulà kedì!” 17 Umbe, hein ikepitu he vulan dutun he tuig, minatey is ebpeneuven he si Hanania.