1 Ne hein neipus ni Jeremias te egkaǥi is langun he migkaǥi te Nengazen he Megbevayè dan mehitenged kandan, 2 migkeǥiyan sikandin ni Azaria he anak ni Hoshaya, ni Johanan he anak ni Karea, wey te zuma pa he gelbuwen he menge etew te, “Midtarùtarù ka! Is Nengazen he Megbevayè tew wazà medsuǥù kenikew te kegkaǥi kenami te kenè key medhendiyà te Ehipto te ked-ubpà diyà. 3 Si Baruc he anak ni Neria migkeǥiyan ke zin he iveǥey key kenikew ziyà te menge tig-Babilonia, para penhimetayi key zan etawa vihaǥa key zan diyà te Babilonia.”

4 Tenged kayi, si Johanan wey is duma zin he menge upisyal te menge sundaru, wey is langun he menge etew zutun, wazà medtuman te suǥù te Nengazen he kenè dan med-awà diyà te Juda. 5 Kekenà, miduma ni Johanan wey zuen te zuma zin he menge upisyal te menge sundaru is menge etew pehendiyà te Ehipto. Iyan heini sikan is menge etew he nemenlikù he ebpemuun diyà te nekedseselekawà he menge nasyun he zutun sikandan mebpevayà. 6 Ragkes en kayi is menge maama, menge vahi, menge vatà, wey sikan is menge anak he vahi ni Hadì Zedekia he insarig ni Nebuzaradan he pengulu te menge vantey ziyà te ki Gedalia he anak ni Ahikam wey apù ni Shafan. Miduma zan daan is ebpeneuven he si Jeremias wey si Baruc he anak ni Neria. 7 Wazè dan pezumdumahi is Nengazen. Ne midhendiyè dan te Ehipto, ne nekeuma zan diyà te inged he Tapanhes.

8 Diyà te Tapanhes, migkaǥi is Nengazen diyà te ki Jeremias te, 9 “Diyà te etuvangan te menge etew te Juda, kuwa ka te zekelà he menge vatu ne ileveng nu ziyà te tanà, diyà te teliwazà te veyeey pehendiyà te turuǥan te Faraon te Tapanhes. 10 Ne zutun, keǥiyi nu sikandan he siak is Nengazen he Mekeǥeǥehem, he Megbevayà te Israel migkaǥi te, ‘Edsuǥuen ku pehengkayi is suluǥuen ku he si Hadì Nebucadnezar he hadì te Babilonia, ne ibpelastar ku is pinuuwè din te kedhadì kayi te menge vatu he impeleveng ku ne ibpelastar zin is tulda zin he tulda te hadì diyà te zivavew kayi. 11 Edsurungen din is Ehipto ne ebpematey is imbanglis kandan is kebpatey pinaaǥi te kezeetan, ne ebihaǥen is imbanglis kandan is ebihaǥen, wey ebpematey pinaaǥi te espada is imbanglis kandan is kebpatey pinaaǥi te tebek. 12 Ebinsulan din is menge simbahan he para te zuma he menge ed-ezapen diyà te Ehipto, ne egkengevinsulan is menge ed-ezapen. Ne ebihaǥen din is menge etew pehendiyà te Babilonia. Edlumpiyuwan din is tanà te Ehipto te menge etew iring te kedlumpiyuwi te perevantey te kerehidu te kumbalè din he tumahan. Ne ed-awà si Nebucadnezar he kenà egkemenu. 13 Edrupeten din is menge segradu he tukud diyà te Betshemes he diyà te tanà he Ehipto, ne ebinsulan din is menge simbahan he para te zuma he menge ed-ezapen diyà te Ehipto.’ ”