1 Iyan heini migkaǥi te Nengazen diyà te ki Jeremias mehitenged te menge nasyun:

2 Is Lalag Mehitenged te Ehipto:

Iyan heini menge lalag he ebpekesuǥat diyà te menge sundaru ni Faraon Neco he hadì te Ehipto. Nezaag heini sikandan ni Hadì Nebucadnezar he hadì te Babilonia, diyà te Carkemish uvey te Wahig he Eufrates, hein ikeepat he tuig te kedhadì ni Jehoyakim, he anak ni Josia he hadì te Juda:

3 “Iandam niw is menge kelasag niw, dekelè man etawa zeisey, ne ǥenat kew pehendiyà te tebek! 4 Iandam niw zaan is menge kudè niw ne untuzi niw en! Ikekalù niw is menge hilmit niw, kemengaa niw is menge vangkew niw, ne iseluub niw is menge limbutung niw. 5 Piru hengkey heini is neehè ku? ed-insà is Nengazen. Nahandek kew ne mid-endud kew. Nezaag kew, ne migaan-gaan kew mebpelaǥuy is kenè en ebpenlilingey tenged te kegkahandek niw. 6 Elistu kew wey meǥaan he ebpelelaǥuy, piru kenè kew ǥihapun ebpekelikey. Egkengezeetan kew ziyà te zapit te zizaya he uvey te Wahig he Eufrates.

7 “Hengkey heini he nasyun is nehimu he mekeǥeǥehem, iring te Wahig he Nilo he ebpekelapew ziyà te pangpang? 8 Is Ehipto nehimu he mekeǥeǥehem. Iring te Wahig he Nilo he nekelapew ziyà te menge pangpang duen. Migkaǥi is Ehipto te, ‘Edekelà a he iring te midalem he Wahig te Nilo; edlepayan ku is tivuuk he kelibutan. Edezeetan ku is menge inged wey is menge etew zuen.’

9 “Sigi en, menge tig-Ehipto, ipepelelaǥuy niw en is menge kudè niw wey menge kerwahi! Surung kew en ragkes is langun he kezapig niw he ebpemuun diyà te Etiopia, Libya, wey Lydia, he menge mahagtì he egamit te kelasag wey panà. 10 Piru iyan ebpekezaag is Nengazen he MEGBEVAYÀ he Mekeǥeǥehem kayi he tebek. Kayi he timpu ebpenimales sikandin te menge kuntada zin. Is ispada zin egkeiring te egkevitil he langgam he ed-emeluk kandan wey edhiǥup te lengesa zan taman te egkahantey wey egkeperahan. Egkehimu sikandan he pemuhat diyà te Nengazen he MEGBEVAYÀ he Mekeǥeǥehem diyà te tanà he zapit te zizaya, he uvey te Wahig he Eufrates.

11 “Sikiyu is menge etew ziyà te Ehipto, minsan edhendiyè kew pa te Gilead su ebpenguwa kew te vawì, ne kenà ebpulus is langun he vawì niw su kenà ebpekeulì keniyu. 12 Egketuenan te menge etew ziyà te menge nasyun kayi te tivuuk he kelibutan is keelezan niw wey kebpekesineǥew niw. Su ebpekedrurumbag is menge sundaru niw he egkengepiley.”

13 Iyan heini migkaǥi te Nengazen diyà te ki Jeremias he mehitenged te kedsurung ni Hadì Nebucadnezar he hadì te Babilonia ziyà te Ehipto:

14 “Jeremias, tudtula nu heini ziyà te Ehipto, Migdol, Memfis, wey Tapanhes: Pengandam kew su naandam en is ispada he idezaat keniyu. 15 Maan is mid-endud is memevurut he menge sundaru niw? Mid-endud dan su midsegseg dan te Nengazen. 16 Ebpekedrurumbag is menge sundaru niw he egkengepiley. Egkaǥi sikandan te, ‘Ed-enew kiw, ne ed-ulì kiw ziyà te menge zuma tew, ziyà te tanà he mid-enakan kenitew. Su wey kiw kenà mepatey te menge kuntada tew.’ 17 Ne emun diyè dan en, ke sikandan te, ‘Is Faraon he hadì te Ehipto tekew en melambù is menge lalag din, piru ibpelavey zin is kebpekepebur zin.’

18 “Siak, is uuyag he Hadì he Nengazen he Mekeǥeǥehem, ebpenangdù a he iring te lavew he metikang is Buntud te Tabor te zuma he menge vuntud, ne is buntud he Carmel ebpekehinungew te zaǥat, iring daan keniyan is gehem te edsurung te Ehipto. 19 Sikiyu is menge meǥinged diyà te Ehipto, tinesa niw en is ed-uwiten niw su ebihaǥen kew en. Egkezeetan is Memfis ne egkehimu heini he mekevulungbulung ne wazè en ed-ubpà kayi. 20 Is Ehipto egkeiring te zumeraǥa he vaka, piru zuen menge zezeizey he keranapranap he edsurung kayi he ebpuun diyà te zizaya. 21 Minsan is menge sundaru he sinuhulan din he henduen be te nati he menge vaka he nepurung meelimahi, kenà ebpekesukul te tebek; ebpemen-endud ne ebpemelaǥuy sikandan. Egkehitavù heini su timpu en te kedsiluti wey kedezeeti te menge tig-Ehipto. 22 Ebpemelaǥuy is menge tig-Ehipto, egkeiring sikandan te uled he ebpemunsuwit dutun te edula heini. Edsurung is menge kuntada zin he ed-uwit te menge wasey iring te ebpemiley te kayu. 23 Minsan iring kezakel te menge kayu te mekepal he ketelunan is menge tig-Ehipto, egkezaag gihapun sikandan su is menge kuntada zan iring kezakel te terapan he kenà egkevilang. 24 Egkepeel-elezan iyan is menge tig-Ehipto. Ibeǥey sikandan diyà te menge etew he ebpuun diyà te zizaya.”

25 Mibpedayun megkaǥi is Nengazen he Mekeǥeǥehem, he Megbevayà te Israel te, “Edsilutan ku en si Amon, is ed-ezapen diyà te Tebes, wey is duma pa he menge ed-ezapen diyà te Ehipto. Edsilutan ku zaan is hadì te Ehipto wey is menge pengulu zin, ragkes is menge midsarig kandin. 26 Ibeǥey ku sikandan diyà te egkesuat he edhimatey kandan he iyan si Hadì Nebucadnezar wey is menge upisyal zin. Piru ziyà te huziyan he timpu ebpeumanan ku zed ebpeubpai is Ehipto iring te zengan. Iyan a, is Nengazen, is migkaǥi kayi.

27 “Piru sikiyu is menge Israilihanen he menge kevuwazan te suluǥuen ku he si Jacob, kenè kew luyahi wey mahandek su edlibriyen ku sikiyu puun diyà te meziyù he lugar he zutun kew vihaǥa. Ed-uman kew ebpengungubpaan he melinawen wey wazà kezeetan, ne wazè en ebpelihandek keniyu. 28 Umbe, kenè kew en egkahandek, is menge kevuwazan te suluǥuen ku he si Jacob, su zuma a keniyu. Ebpurungan ku edezeeti is langun he menge nasyun he zutun ku sikiyu ipeyapat, piru kenè ku mulà sikiyu ebpurungan edezeeti. Ebmensuwen ku sikiyu, sumalà is ereg keniyu. Kenà egkehimu he kenè ku sikiyu edsilutan. Iyan a, is Nengazen, is migkaǥi kayi.”