1 Mibpenuiǥen si Zedekia te 21 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Is iney zin iyan si Hamutal he anak ni Jeremias he tig-Libna. 2 Mezaat is ulaula zin diyà te etuvangan te Nengazen, iring te mibeelan ni Jehoyakim. 3 Umbe, hein neuǥet impaawà te Nengazen diyà te lugar zan is menge tig-Jerusalem wey menge tig-Juda wey mekepekeziyù kandin. Neulaula heini ziyà te kandan tenged te kegkepeuki te Nengazen kandan.

Ne nekidsukulà si Zedekia te hadì te Babilonia. 4 Umbe, hein ikesiyam he tuig te kedhadì din, dutun te ikesepulù he andew te ikesepulù he vulan, nenurung si Hadì Nebucadnezar he hadì te Babilonia wey is langun he menge sundaru zin diyà te Jerusalem. Migkampu zan diyà te ǥawas te inged ne mibaal zan te menge turi-turi te peliǥuy kayi. 5 Midliǥuyan dan haazà is inged taman te ike-11 he tuig te kedhadì ni Zedekia.

6 Ne hein ikesiyam he andew te ikeepat he vulan dutun he tuig, utew mepait he vitil zutun te inged, ne wazè en egkekaan te menge etew. 7 Dutun he timpu, duen kevahin duen te verengbeng he midrundus te menge tig-Babilonia, umbe nekeisip si Zedekia wey is langun he menge sundaru zin he ebpelaǥuy zan. Piru ǥeina te neliǥuyan te menge tig-Babilonia haazà is inged, ne midteǥazan dan is kebmezukilem. Diyè dan mebayà te pultahan, he ziyà te pid-elangan te zezuwa he verengbeng uvey te pemuleey te hadì. Mibpelaǥuy zan diyà te Araba, 8 piru midal-as sikandan te menge sundaru te Babilonia, ne nesaut dan diyà te menge suǥud diyà te Jerico. Midsuwey ki Zedekia is langun he sundaru zin, 9 ne nezekepan sikandin. Ne mid-uwit dan sikandin diyà te hadì te Babilonia he ziyà te Ribla, he sakup te tanà he Hamat, ne zutun sikandin hukumi. 10 Diyà te Ribla, midhimetayan te hadì te Babilonia is menge anak he maama ni Zedekia ziyà mismu te etuvangan ni Zedekia. Midhimetayan daan is langun he menge upisyal te Juda. 11 Impeluǥit dutun te hadì is menge mata ni Zedekia ne migkedinahan sikandin ne mid-uwit diyà te Babilonia. Ne ziyà sikandin pirisuwà taman te minatey.

12 Ne hein ikesepulù he andew te ikelima he vulan dutun te ike-19 he tuig te kedhadì ni Nebucadnezar ziyà te Babilonia, midhendiyà te Jerusalem is peremandar te menge vantey te Babilonia he si Nebuzaradan. 13 Mibinsulan din is baley te Nengazen, is turuǥan, is langun he menge valey ziyà te Jerusalem, wey is langun he impurtanti he menge bilding. 14 Ne iyan sikandin midumala te menge sundaru te Babilonia te kebengkag duen te verengbeng he nekeliǥuy te Jerusalem. 15 Ne mibihag din is nesamà he menge etew zutun te inged, ragkes is duma he kinepubriyan he menge etew wey is menge etew zutun he zumezapig te hadì te Babilonia. 16 Piru intaǥak din is duma he utew pubri he menge etew su para maatur zan is pemuleey te paras wey zuma he menge vevesukà.

17 Mibengkag te menge tig-Babilonia is menge azen diyà te valey te Nengazen he iyan is: brunsi he menge tukud, menge untuzà he para te kedhakut te wahig, wey is dekelà he teleǥuey te wahig he brunsi he migngezanan te Daǥat. Ne mid-uwit dan sikan is menge brunsi ziyà te Babilonia. 18 Migkuwa zan daan is menge karà, menge pala, menge penamped te pebilu, menge yehung, menge tasa, wey is duma pa he menge gelemiten he brunsi zutun te Baley te Nengazen. 19 Mibpenguwa zaan ni Nebuzaradan is menge visin, menge selevukà te vaǥa, menge yehung, menge diniyun, menge selevukà te sulù, menge tasa, menge yehung he egemiten te kebusbus te pemuhat he inumen, wey is duma pa he menge vulawan wey menge pelata he menge gelemiten. 20 Dekelà, umbe hapit kenà egketimbang is menge brunsi he nekuwa zuen te zezuwa he tukud, duen te zekelà he teleǥuey te wahig he egngezanan te Daǥat, duen te 12 he mibpurma he vaka he mibpeuntuzan dutun, wey zuen te menge untuzà he para te kedhakut te wahig. Heini he menge azen mibpeveelan dengan ni Solomon he para zuen te valey te Nengazen. 21 Is kelayat kayi te zezuwa he menge tukud ne 27 he ǥiek ne 18 he ǥiek is peliǥuy te kezekelè din. Budsi is diyà te teliwazà kayi, ne menge heepat he vaney is kekepal te brunsi kayi. 22 Is keluǥayad te brunsi he in-ulu te kada tukud menge pitu wey tengà he ǥiek. Heini is menge in-ulu mideyzeyanan te henduen be te menge kedina he impedlambid ne midlituwan deyzeyani te mid-iring te menge prutas he pumigranata. 23 Is kilid te kada tukud duen 96 he henduen be te menge prutas he pumigranata ne nenggatus is nekeliǥuy zuen te henduen be te menge kedina he impedlambid duen te in-ulu te tukud.

24 Mibihag daan ni Nebuzaradan si Seraya he lavew he memumuhat, si Zefanias he ebpeketinundug is kegkelavew zin ki Seraya, wey is tetelu he perevantey te ǥemawan te valey te Nengazen. 25 Ne heini pa is neturedu zin dutun te inged he mibihag din: is upisyal te menge sundaru ziyà te Juda, is pitu te perezumala te hadì, is peremandar te menge sundaru he ebpen-ahà te edsunderuwen, wey is 60 he menge meǥinged dutun. 26 Miduma sikandan is langun ni Nebuzaradan diyà te hadì te Babilonia he ziyà te Ribla, 27 he sakup te Hamat. Ne zutun impehimetayan sikandan duen te hadì.

Umbe is menge etew ziyà te Juda nekepekeziyù diyà te tanè dan he menge vihag. 28-30 Iyan heini kezakel te menge Israilihanen he mibihag ni Hadì Nebucadnezar:

Hein ikepitu he tuig te kedhadì din, 3,023 he menge etew.

Hein ike-18 he tuig te kedhadì din, 832 he menge etew.

Hein ike-23 he tuig te kedhadì din, 745 he menge etew. (Si Nebuzaradan he peremandar te menge vantey te hadì is mibihag kandan.)

4,600 langun is menge etew he nevihag.

31 Hein ike-37 he tuig te kegkevihag ni Hadì Jehoyakin he hadì te Juda, nehimu he hadì diyà te Babilonia si Evil Merodac. Ne impeǥawas din diyà te pirisuwan si Jehoyakin hein ike-25 he andew te ike-12 he vulan dutun he tuig. 32 Mibpurungan din si Jehoyakin, ne impelavew zin te zuma he menge hadì he mibihag daan diyà te Babilonia. 33 Umbe, wazè en mebivisti si Jehoyakin te visti te pinirisu, ne puun dutun dumè en sikandin duen te hadì emun egkaan dan. 34 Ne kada andew ebeǥayan sikandin duen te hadì te Babilonia te menge kinahanglan din taman te timpu te kebpatey zin.