1 Ne midtavak si Bildad he tig-Shua te, 2 “Keenu ke ves ed-engked he egkaǥi te iring keniyan? Ebpekeuringer ka, ne wazà pulus te ebpengeǥiyen nu. 3 Kenà egkehimu he egurivizen te Mekeǥeǥehem he Megbevayà is kukuman etawa ebulegkuen din is hustu. 4 Nekesalà is menge anak nu ziyà te Megbevayà, umbe ereg he edsilutan din sikandan. 5 Iyan, emun edangep ka ziyà te Mekeǥeǥehem he Megbevayà wey ebpehizuhizu ka kandin, 6 wey lumpiyu wey metazeng is menge ulaula nu, ne minsan guntaan segugunè ke zin edtevangi ne idlikù din is meupiya he kebpekesavuk nu. 7 Ne is ketiǥeyunan he egkehimu he kenikew te huziyan he timpu ne edhuna pa he utew zekelà duen te nehuna he ketiǥeyunan nu.

8 “Insai nu is nehuna he menge lapis te kevuwazan. Ne susiya nu ke hengkey is neseǥazan te menge lukes dan. 9 Su henduen be te veǥu kiw pa he nengeetew ne zeisey zà is kenitew he netuenan, ne edlavey kiw zà kayi te kelibutan iring te alung he kenà ebpedayun. 10 Pemineǥa nu sikandan su ebpenuruen ke zan te netuenan dan.

11 “Kenà egkeuyag is sedsed he ziyà edtuvù te wahig emun wazà wahig. 12 Ebpatey heini zutun te kemulu pa pezem edtuvù su kenè pa timpu te kegerava zuen. 13 Ne iring daan keniyan is egkepeveyaan te langun he etew he ed-iniyug te Megbevayà. Wazà egkeperateng te etew he wazà medsarig te Megbevayà. 14 Is langun he edseriǥan din ne egkaamur-amur he iring te valey te kelelawà. 15 Edsandig sikandin dutun piru egkevidtew haazà; ebpenggawed sikandin dutun piru egkepekas haazà. 16 Emun ed-ahaan ta ne henduen be te meupiya is kebpekesavuk din; iring heini te pinemula he nepurungan mevinyaǥi wey nesilaan te andew. Edlangkat heini ziyà te lama 17 ne ebpurung ebpendalid diyà te menge vatu. 18 Iyan, emun egkevazut en heini ne wazè en edseǥipà kayi. 19 Ne iyan heeyan ketepusan te kegkeuyag-uyag din, ne zuen en maan edliwan edtuvù duen te tanà he midtuvuan din.

20 “Benar iyan, he kenà ed-engkezan te Megbevayà is etew he wazà igkesawey te kebpengungubpaan din, ne kenè din edtevangan is lalung he etew. 21 Ibpeuman ke zin ibpeengit wey ibpeuruhuy ke zin tenged te kegkelipey nu. 22 Ebpeel-elezan din is lalung he menge kuntada nu, ne edèdeetan din is menge pemilya zan.”