1 Ne midtavak si Job te, 2 “Sengemenu keluǥayad is kebpeentusa wey kebpesekiti niw kediey pinaaǥi te menge lalag niw? 3 Kepipira ad keniyu insultuwi. Wazè kew meeled is edezaat kedì. 4 Emun tutuu he nekesalà a ne kediey en heeyan he prublima. 5 Mid-isip niw he metazeng kew kediey, ed-isipen niw he is kebpekesaǥad ku te elentusen tuus he nekesalà a. 6 Piru Megbevayà is mibaal kayi te kediey. Iyan sikandin nenlitag diyà te peliǥuy ku.

7 “Nengumew a is ebuyù te tavang, piru wazà midtavak kedì. Mibuyù a te hustu he kukuman, piru wazà mibeǥey kayi kedì. 8 Mid-elangan te Megbevayà is beyeey ku su wey a kenà mekevayà. Midtembunan din te merusirem is beyeey ku. 9 In-awè din is meupiya he zengeg ku. 10 Ibpaantus e zin minsan hendei a edlingì, nepurung ad meverengbeng te kemeresayan, ne henduen be te ebpatey ad. In-awè din is perateng ku te meupiya iring te kayu he mibazut. 11 Utew e zin nepeuki, ne ed-isipen e zin he sevaha te menge kuntada zin. 12 Henduen be te impesurung e zin te menge sundaru. Ne edliǥuyan dan is tulda ku.

13 “Impepelaǥuy zin puun kayi te kedì is menge kezuzumahi ku. Is menge kilala ku ne meziyù en kayi te kedì. 14 Wazè en is menge etew he uvey kayi te kediey. Midlipatan ad te menge kilala ku. 15 Mid-isip a he langyew te menge meǥeliyug ku wey menge suluǥuen ku he menge vahi. Lumelengyawà is ked-ahaa zan kedì. 16 Emun ebpengumew a te suluǥuen, ne wazà edtavak kedì, minsan ebpehizuhizu ad. 17 Egkemehuan te ǥehinawa ku is esawa ku, ne igkeremerik a te menge suled ku he maama. 18 Minsan is dezeisey pa he menge vatà edsudì kedì. Emun egkeehè e zan, ed-engitan e zan. 19 Ingkeremerik a te langun duen te utew ku menge emiǥu. Mid-iniyuǥan a te menge mahal ku. 20 Henduen a te tulan dà he nevukusan te lundis, ne henduen be te ebpatey ad.

21 “Kehizuwi a keniyu, te menge emiǥu ku, su edresayen a te Megbevayà. 22 Maan is edresayen a keniyu iring te ebeelan kediey te Megbevayà? Kurang pe be is kebpeentusa niw kediey? 23 Deyzey pezem ke insurat diyà te libru is mibpengaǥi ku, 24 emun kenà, ne impurung isilsil ziyà te vatu wey kenà mepanas taman te taman.

25 “Piru netuenan ku he is uuyag he Megbevayà iyan edlavan kedì, ne egkeuma is timpu keuzemà te kebpekeuma zin dini te tanà te kedlavan kedì. 26 Minsan egkeredak en is lundis ku wey ed-awà ad kayi te lawa ku, ne egkeehè ku gihapun is Megbevayà. 27 Menge mata ku mismu is ebpekaahà kandin. Ne megeget ku en sikandin. Utew zekelà is tinguhè ku he meehè ku sikandin.

28 “Emun ibpelaus niw is hukum niw he iyan impekebmereǥen ku is tenged te salè ku, 29 ebpekeuma ziyà te keniyu is mekahandekhandek he silut te Megbevayà. Uya, edsilutan kew zin tenged te pauk din. Ne zutun egketuenan niw he edhukuman kew te Megbevayà.”