1 Hein nekelayun en is langun he menge etew te Israel te Wahig he Jordan, ne migkaǥi is Nengazen diyà te ki Josue te, 2 “Pilì ka te 12 he etew, sevaha ziyà te kada tribu, 3 ne ipekuwa nu sikandan te tigselimbaha he vatu ziyà te teliwazà te Wahig he Jordan, duen mismu te midhitindeǥan te menge memumuhat. Ne uwita zan haazà diyà te lugar he zutun kew egkampu kengkuwan ke mezukilem.”

4 Umbe, mid-umew ni Josue sikan is 12 he menge etew he mibpilì din puun te kada tribu te Israel, ne migkeǥiyan din sikandan te, 5 “Hendiyè kew te teliwazà te wahig etuvangan duen te nesevukan te Kavan te Kebpekid-uyun te Nengazen he Megbevayè niw. Is kada sevaha keniyu ne megkuwa te sevaha he vatu he ed-uwiten din, sevaha te kada tribu te Israel. 6 Ne vurvuruna niw heini ne veeli niw he munyumintu he tedeman te mibeelan te Nengazen, su para heini te huziyan he timpu, emun ed-insà is menge anak niw ke hengkey is kehuluǥan kayi he menge vatu, 7 keǥiyi niw sikandan he mid-engked he edtudà is Wahig he Jordan hein inlayun sikan is Kavan te Kebpekid-uyun te Nengazen. Heini he menge vatu kenà egkaawà he tedeman te menge etew te Israel taman te taman.”

8 Ne midtuman duen te 12 he menge Israilihanen is insuǥù kandan ni Josue. Sumalà is migkaǥi te Nengazen diyà te ki Josue, ne migkuwa zan te 12 he vatu ziyà te teliwazà duen te wahig, sevaha he vatu is para te kada tribu te Israel. Mid-uwit dan haazà is menge vatu ziyà te lugar he migkempuwan dan, ne mibpunduk dan heini zutun. 9 Ne midsavuk daan si Josue te 12 he vatu ziyà te teliwazà duen te wahig, duen mismu te midhitindeǥan te menge memumuhat he ebinting duen te Kavan te Kebpekid-uyun. Ne taman en guntaan kemulu pa zutun haazà is menge vatu. 10 Wazà med-engked he edhitindeg diyà te teliwazà duen te wahig is menge memumuhat taman te netuman te menge etew is langun he insuǥù te Nengazen ki Josue, he iyan ded sikan is insuǥù ni Moises ki Josue. Migaanggaan medlayun is menge etew.

11 Ne hein nekelayun en sikandan is langun, inlaus daan ilayun duen te menge memumuhat sikan is Kavan te Kebpekid-uyun te Nengazen kandan. Ne midhunaan en maan duen te menge memuhat is menge etew. 12 Midhuna zaan medlayun is neǥumeenan he menge maama he edpuun te tribu ni Reuben, ni Gad, wey te ketengà he tribu ni Manase, sumalà is insuǥù ni Moises kandan. 13 Heini is 40,000 he neǥumeenan he menge maama mibayà diyà te etuvangan te Nengazen ne midhendiyè dan te menge suǥud te Jerico su ebpekidtebek dan.

14 Dutun he andew mibeǥayan te Nengazen si Josue te zengeg diyà te etuvangan te menge Israilihanen. Ne midtahud si Josue te menge etew seled te tivuuk he untung din iring te kedtahud dan ki Moises.

15 Ne zutun te kebpekelayun en te menge Israilihanen te Wahig he Jordan, migkaǥi is Nengazen diyà te ki Josue te, 16-17 “Heeyan is menge memumuhat he ebinting keniyan te Kavan te Kebpekid-uyun ku keniyu mendui nu te kegawas puun keniyan te edtudaan te Wahig he Jordan.” Ne midtuman haazà ni Josue. 18 Ne hein nekeǥawas en sikan is menge memumuhat he ebinting duen te Kavan te Kebpekid-uyun te Nengazen, ne mid-uman en medalem haazà is wahig iring hein aney zan mekeuma kayi.

19 Is kedlayun te menge Israilihanen te Wahig he Jordan nehitavù hein ikesepulù he andew te egkehuna he vulan. Ne migkampu sikandan diyà te Gilgal he zapit te edsilaan emun diyè ki te Jerico. 20 Ne zutun punduka ni Josue sikan is 12 he menge vatu he impekuwa zin puun te Wahig he Jordan. 21 Migkeǥiyan ni Josue is menge Israilihanen te, “Keuzemà, emun ed-insaan kew te menge anak niw ke hengkey is kehuluǥan kayi te menge vatu, 22 tudtuli niw sikandan he memaza he tanà is midhipenawan te menge Israilihanen hein midlayun dan te Wahig he Jordan. 23 Tudtuli niw sikandan he mibpemezahan te Nengazen he Megbevayè tew is Wahig he Jordan taman te nekelayun key iring ded te mibeelan din dengan diyà te Zaǥat he Meriǥà taman te nekelayun key. 24 Mibeelan heini te Nengazen su para kilelaa te langun he etew kayi te kelibutan he mekeǥeǥehem sikandin, wey kew layun medtahud kandin te Nengazen he Megbevayè niw.”