1 Piru midrapas iyan te menge Israilihanen is suǥù te Nengazen he kenè dan ibpekuwa te minsan hengkey he impurung en ipemuhat diyà te Nengazen. Su migkuwa si Acan te menge vutang he kenà engayan he egkuwaan, umbe utew nepauk is Nengazen kandan. Heini si Acan anak ni Carmi. Si Carmi anak ni Zabdi. Si Zabdi anak ni Zera. Heini sikandan sakup te tribu ni Juda.

2 Puun te Jerico midsuǥù si Josue te menge etew he ibpepeniid te Ai, sevaha heini he inged he zapit te edsilaan he vahin te Betel, he uvey te Bet Aven. Umbe migenat haazà he menge etew su ebpeniid dan. 3 Ne hein nekelikù dan en, migkaǥi sikandan diyà te ki Josue te, “Kenè en kinahanglan he pudu kiw edsurung diyà te Ai, su zeisey zà is meǥinged duen. Suǥù ke zà te 2,000 etawa 3,000 he menge etew he edsurung dutun te inged.” 4 Umbe menge 3,000 zà is midsurung diyà te Ai, 5 piru midal-as sikandan te menge tig-Ai puun te pultahan dutun te inged taman te Shebarim, ne menge 36 kandan is nepatey hein edtupang dan. Umbe naawà is kevurut te menge Israilihanen wey nengahandek dan.

6 Ne tenged te kegkeseeng, si Josue wey is ebpemendumala te Israel, mibindas dan is menge visti zan ne mibukbukan dan te eliyavuk is menge ulu zan, ne taman te mezukilem, midlangkeb dan diyà te etuvangan duen te Kavan te Kebpekid-uyun te Nengazen. 7 Migkaǥi si Josue te, “He Nengazen he MEGBEVAYÀ, maan is impelayun key pa kenikew te Wahig he Jordan ke ibpezaag key zè bes kenikew te menge Amorihanen? Deyzey pa ke wazè key en med-awà diyà layun te Jordan. 8 He Nengazen, hengkey en be is egkekaǥi ku te mibpeleǥuyan man te menge Israilihanen is menge kuntada zan? 9 Emun egkezineg heini te menge Canaanhen wey zuma pa he meǥinged kayi ne edliǥuyan key zan, ne ebpenhimetayan key zan. Ne emun iyan haazà, hengkey is ebeelan nu para kenà mezeeti is dengeg nu?”

10 Ne migkaǥi is Nengazen diyà te ki Josue te, “Hitindeg ka! Maan is edlangkeb ka? 11 Nekesalà is Israel; midrapas dan is kebpekid-uyun ku. Migkuwa zan te menge vutang he impurung en ipemuhat kayi te kedì. Midtakew zan heini, midtarùtarù dan bahin kayi, ne intampu zan heini te menge azen dan. 12 Iyan heini hinungdan ke maan is kenè dan ebpekesukul te menge kuntada zan. Mibpeleǥuyan dan is menge kuntada zan, su edezeetan man daan sikandan he pemuhat kayi te kedì. Kenà ad ebpekiduma keniyu taman te kenè niw edezeetan heeyan is menge azen he para zà kediey.

13 “Hitindeg ka ne keǥiyi nu is menge etew he lumpiyuwi zan is keugelingen dan para te ked-etuvang dan kedì keeselem, tenged te siak, is Nengazen he Megbevayà te Israel, egkaǥi te: ‘He Israel, duen niw in-eles he menge azen he para zà kediey. Kenè kew ebpekesukul te menge kuntada niw mintras wazè pa maawà diyà te keniyu heini he menge azen.’ 14 Umbe, keeselem te meselem med-uvey kayi te kediey is kada tribu niw. Is tribu he idtezù ku he nekesalà ne med-uvey kayi te kediey is kada sengeepuan. Is kezuzumahi he idtezù ku he nekesalà med-uvey is kada pemilya kayi te kediey. Is pemilya he idtezù ku he nekesalà med-uvey is kada sevaha kayi te kediey. 15 Is etew he idtezù ku he mid-eles duen te menge vutang he impurung ipemuhat kayi te kedì edtutungen duma te pemilya zin wey te langun he menge azen din. Su midrapas din is kebpekid-uyun ku, ne mibaal sikandin te mekeeled-eled he vaal kayi te Israel.”

16 Ne hein meselem en, ne impesayu en ni Josue te ebpeuvey ziyà te Nengazen is kada tribu te Israel. Ne is intezù he nekesalà iyan is tribu ni Juda. 17 Ne impeuvey zin is kevuwazan ni Juda, ne iyan nepilì kandan is menge pemilya ni Zera. Ne impeuvey zin is menge kevuwazan ni Zera, ne is nepilì kandan iyan is pemilya ni Zabdi. 18 Ne impeuvey zin is pemilya ni Zabdi ne is intezù iyan si Acan. (Si Acan anak ni Carmi. Si Carmi anak ni Zabdi. Ne si Zabdi anak ni Zera te sakup te tribu ni Juda.)

19 Ne migkaǥi si Josue ziyà te ki Acan te, “Mama, beǥayi nu te zengeg is Nengazen he Megbevayà te Israel; keǥiya nu is tutuu ziyà te etuvangan din. Keǥiya nu kayi te kediey ke hengkey is mibeelan nu? Kenè nu heini ieles kediey.”

20 Ne midtavak si Acan te, “Tutuu he nekesalà a ziyà te Nengazen he Megbevayà te Israel. Iyan heini mibeelan ku: 21 Duen te menge azen he netavan tew, duen ku neehè he mekempet he visti he ebpuun diyà te Babilonia, pelata he menge dezuwa he kilu wey tengà, wey senge verita he vulawan he menge tengà te kilu. Utew ku neimahi heini he menge azen, umbe migkuwa ku. Ne inleveng ku heini ziyà te tanà he seled te tulda ku, ne ziyà te kinezizeleman sikan is pelata.”

22 Umbe, duen menge etew he midsuǥù ni Josue he megaanggaan medhendiyà te tulda ni Acan. Ne neehè dan iyan dutun is menge azen he inleveng, sumalà is nekaǥi ni Acan. 23 Ne mid-uwit dan heini ziyà te ki Josue wey te langun he menge Israilihanen, ne insavuk dan diyà te etuvangan te Nengazen. 24 Ne zutun mid-uwit ni Josue wey te langun he menge Israilihanen si Acan diyà te Suǥud te Acor, ragkes sikan is pelata, bisti, wey senge verita he vulawan, wey is menge anak din, menge vaka zin, menge asnu zin, menge kerehidu zin, tulda zin, wey is langun he azen din. 25 Migkaǥi si Josue ziyà te ki Acan te, “Maan is mid-uwit ka te samuk kayi te kenami? Umbe edsilutan ka ǥuntaan te Nengazen.”

Ne zutun mibpenuleng te vatu te menge Israilihanen si Acan taman te kebpatey zin. Ne mibpenuleng dan daan te vatu is pemilya zin ne mibinsulan dan is menge azen din. 26 Ne kegkepasad dutun, midtembuan dan te vatu si Acan. Ne taman en guntaan dutun pa haazà is menge vatu. Ne haazà he lugar migngezanan te Suǥud te Acor taman guntaan.

Ne tenged kayi naawà is pauk te Nengazen.