1 Nezineg te langun he menge hadì diyà dapit te edsenlepan te Jordan is tudtul mehitenged te kebpekezaag te menge Israilihanen. (Iyan heini sikandan menge hadì te menge Hitihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen.) Meǥinged sikandan diyà te menge vuvungan, menge mibuntud-buntud diyà te edsenlepan, wey menge veyvey te Zaǥat he Mediteraneo taman en te Lebanon. 2 Midsevaha sikandan te kebpekidtebek ki Josue wey te Israel.

3 Piru hein nezineg te menge tig-Gibeon is mibeelan ni Josue ziyà te Jerico wey ziyà te Ai, 4 neuyun dan he edterteruan dan si Josue. Impehendiyè dan te ki Josue is menge etew he zuen dan menge asnu he migkergahan te zaan he menge saku wey nengevindas wey menge tinepikan he lundis he teleǥuey te vinu. 5 Midsesendalyas daan sikandan te menge tinepikan wey mibivisti te utew en daan he menge visti. Memaza wey egkengepugpug en is menge supas he lutù dan. 6 Midhendiyè dan te ki Josue ziyà te kampu te Israel ziyà te Gilgal ne migkeǥiyan dan sikandin wey is menge Israilihanen te, “Midhendini key is ebpuun diyà te meziyù he lugar para zà te kedhangyù keniyu he ed-uyun kiw, ne penangdù kew ziyà te kenami he kenè key keniyu edhilevetan.” 7 Ne midtavak is menge Israilihanen te, “Kela ke uvayè dey zà sikiyu he menge meǥinged. Umbe kenà egkehimu ke ebpekid-uyun key keniyu.” 8 Ne mibpehizuhizu sikandan ki Josue. Ke sikandan te, “Andam key he ebpenilbi keniyu.” Ne mid-insà si Josue kandan te, “Hentei kew wey hendei kew ebpuun?” 9 Ne midtavak dan te, “Diyè key ebpuun te utew meziyù he lugar. Midhendini key su nekezineg key mehitenged te Nengazen he Megbevayè niw. Netudtulan key te langun he mibeelan din diyà te Ehipto, 10 wey is langun he mibeelan din duen te zezuwa he Amorihanen he hadì he ziyà dapit te edsilaan he iyan si Hadì Sihon he hadì te Heshbon, wey si Hadì Og he hadì te Bashan he ed-ubpà diyà te Ashtarot. 11 Umbe, midsuǥù key te menge pengulu zey wey zuma zey he menge meǥinged he endama zey is keenen he egkelutù dey ne medhengkayi key te kebpekidhinguma keniyu su wey zey sikiyu mekeǥiyi he andam key he ebpenilbi keniyu, basta ebpekid-uyun kew kenami he kenè key keniyu edhilevetan. 12 Ahaa niw man heini is uwiten dey he supas. Meinit pa heini te kegenat dey, piru ǥuntaan mibmezesen en ne nengepugpug en. 13 Heini is lundis he teleǥuey zey beǥu pa heini hein midteǥuan dey te vinu, iyan, guntaan egkevindas en. Is menge visti zey wey menge sandalyas dey ne nengezaan en tenged te kegkeuǥet te kedhipanew zey.”

14 Midsusi te menge Israilihanen haazà is menge lutù dan piru wazà sikandan mebpekisambag te Nengazen ke hengkey is ereg he ebeelan dan. 15 Ne mibpekid-uyun si Josue kandan he kenè din sikandan edhilevetan wey ebpenhimetayan. Ne nenangdù is menge pengulu te Israel mehitenged kayi.

16 Ne hein nekelavey en is tetelu he andew puun te kegkeuyun dan, netudtulan is menge Israilihanen he uvey zè bes is ed-ubpaan duen te menge etew. 17 Umbe, migenat is menge Israilihanen, ne iketelu he andew te kedhipanew zan nekeuma zan diyà te menge inged he ed-ubpan duen te menge etew. Heini he menge inged iyan is Gibeon, Kefira, Beerot, wey Kiriat Jearim. 18 Piru wazà sikandan surunga te menge Israilihanen su ǥeinà te nekepenangdù en diyà te kandan is menge pengulu te Israel te penangdù he mibpeseksiyan te Nengazen he Megbevayà te Israel. Midriklamu is menge Israilihanen diyà te menge pengulu zan, 19 piru midtavak haazà is langun he menge pengulu zan te, “Nekepenangdù kiw en diyà te kandan te mibpeseksiyan te Nengazen he Megbevayà te Israel, umbe kenè tew sikandan egkehilevetan. 20 Iyan dà heini ed-ul-ulahan tew: Kenè tew sikandan ebpenhimetayan su kela ke siluti kiw te Megbevayà su nekepenangdù kiw en diyà te kandan. 21 Kenè niw en sikandan penhimetayi. Piru edhimuwen tew sikandan he perepengayu wey peresekezu para kenitew te langun.” Ne iyan heeyan nehitavù te menge tig-Gibeon su iyan man heeyan migkaǥi zuen te menge pengulu mehitenged kandan.

22 Impetawag ni Josue is menge tig-Gibeon ne migkeǥiyan din te, “Maan is midterteruan key keniyu? Maan is migkaǥi kew he ziyè kew ebpuun te meziyù he lugar, he kayi kew zè bes he meǥinged te uvey zey? 23 Ne tenged kayi te vaal niw edrewakan kew te Megbevayà: Puun guntaan penilbi kew en pinaaǥi te kebpengayu wey kebpenekezu para te valey te Megbevayè ku.” 24 Ne midtavak dan si Josue te, “Mibeelan dey heini tenged te nahandek key he kela ke penhimetayi key keniyu. Su netuenan dey he midsuǥù te Nengazen he Megbevayè nu si Moises he suluǥuen din he ibeǥey ziyà te keniyu heini he menge tanà ne egeraan is langun he meǥinged kayi. 25 Ne ǥuntaan kayi key en te zizalem te ǥehem nu, ne iyan ke en metau ke hengkey is ereg he ebeelan nu kenami.” 26 Wazà ituǥut ni Josue he penhimetayi sikandan te menge Israilihanen. 27 Piru midhimu zin sikandan he menge perepengayu wey menge peresekezu para te menge Israilihanen wey para te pemuhatà para te Nengazen. Taman en guntaan is kebeeli zan kayi he vuluhaten diyà te lugar he mibpilì te Nengazen he zutun sikandin ed-ezapa.