1 Ne zutun midtiǥum ni Josue is langun he tribu te Israel ziyà te Shekem. Ne mid-umew zin is ebpemendumala, menge pengulu, menge zatù, wey menge upisyal te Israel, ne mid-uvey zan diyà te etuvangan te Megbevayà.

2 Migkaǥi si Josue ziyà te langun he menge etew te, “Iyan heini migkaǥi te Nengazen he Megbevayà te Israel: Dengan, menge meǥinged diyà layun te Wahig he Eufrates is menge kepuun niw ne ebpemen-azap dan te zuma he menge ed-ezapen. Is sevaha kandan iyan si Tera is amey ni Abraham wey ki Nahor 3 Iyan, migkuwa ku si Abraham puun dutun he lugar ne migiyahan ku sikandin pehendiyà te tanà te Canaan, ne impemahabet ku is menge kevuwazan din. Mibeǥayan ku sikandin te anak he si Isaac, 4 ne si Isaac ne iyan amey ni Esau wey ni Jacob. Imbeǥey ku ki Esau is buvungan te Seir he kandin he vahin, piru is kepuun niw he si Jacob wey is menge anak din ne midhendiyà te Ehipto. 5 Kedlavey te menge timpu, midsuǥù ku ziyà te Ehipto si Moises wey si Aaron te kedlibri keniyu ziyà, mibpeeǥiyan ku te vangkit is Ehipto ne kegkepasad dutun, impeǥawas ku sikiyu. 6-7 Piru hein nekeume en diyà te Zaǥat he Meriǥà is menge kepuun niw, midal-as sikandan te menge Ehiptohanen he ebpemen-untud te menge kerwahi zan wey menge kudè dan. Mibpetavang dan kedì, umbe insavuk ku ziyà te mid-elangan dan wey te menge Ehiptohanen is merusirem. Ne midlened ku is menge Ehiptohanen dutun te zaǥat. Neehè niw en is mibeelan ku ziyà te menge Ehiptohanen. Ne mid-ubpè kew ziyà te sibsivayan seled te meluǥayad he timpu.

8 “Ne mid-uwit ku sikiyu ziyà te tanà te menge Amorihanen diyà dapit te edsilaan te Wahig he Jordan. Nekidtebek dan keniyu piru imbeǥey ku sikandan keniyu. Midèdeetan ku sikandan ne nekuwa niw is tanè dan. 9 Ne nekidtebek te Israel is hadì te Moab he si Balak he anak ni Zipor. Midsuǥù din si Balaam he anak ni Beor te kedrawak keniyu. 10 Piru wazè ku tuǥuti si Balaam te kebaal kayi ziyà te keniyu. Edrewakan kew zin pezem piru mibpepenubtuvazan ku sikiyu ki Balaam, ne midlibri ku sikiyu te kegkeiza pezem keniyu ni Balak.

11 “Ne midlayun kew te Wahig he Jordan ne nekeuma kew ziyà te Jerico. Nekidtebek keniyu is menge tig-Jerico, wey is menge Amorihanen, menge Pirisihanen, menge Canaanhen, menge Hitihanen, menge Girgasihanen, menge Hivihanen, wey menge Jebusihanen. Piru nezaag niw sikandan pinaaǥi kedì. 12 Impezal-as ku te menge petiyukan sikan is dezuwa he hadì he menge Amorihanen su para zaan sikandan he mesegseg te kenè kew pa ebpekeuma. Nekezaag kew kenà tenged te menge ispada niw wey menge panè niw. 13 Mibeǥayan ku sikiyu te tanà he wazè niw heǥui. Impeubpè ku sikiyu ziyà te menge inged he kenè kew iyan mibangun duen. Egkaan kew ǥuntaan te menge paras wey menge ulibu he kenè kew iyan nemula zuen.

14 “Umbe ǥuntaan, ezapa niw is Nengazen ne penilbi kew kandin te tinutuuwà. Engkezi niw en is menge ed-ezapen he ebpen-ezapen dengan te menge kepuun niw ziyà layun te Wahig he Eufrates wey ziyà te Ehipto, ne penilbi kew te Nengazen. 15 Iyan, emun kenè niw igkelipey is kebpenilbi te Nengazen, pilì kew ǥuntaan he andew ke hentei is edsilbiyan niw. Iyan be is menge ed-ezapen he midsilbiyan te menge kepuun niw ziyà layun te Wahig he Eufrates, etawa iyan is menge ed-ezapen te menge Amorihanen he mid-ubpaan niw ǥuntaan is tanè dan. Piru siak mulà wey is pemilya ku, Nengazen is kenami he edsilbiyan.”

16 Ne midtavak is menge etew te, “Wazà kayi te isip dey he ed-iniyuǥan dey is Nengazen wey ebpenilbi key te zuma he ed-ezapan. 17 Is Nengazen he Megbevayè tew iyan mibpeǥawas kenitew wey te menge kepuun tew te kegkeuripen diyà te Ehipto. Ne neehè tew zaan is egkengein-inuwan he mibeelan din. Ne wazè din ituǥut he mekeizi kiw zuen te hipanew tew ziyà te teliwazà te menge nasyun he imbayè tew. 18 Dutun te kedhengkayi tew te tanà, midsegseg te Nengazen is menge Amorihanen wey zuma pa he menge etew he ebpemen-ubpà kayi. Umbe ebpenilbi key zaan te Nengazen, su iyan sikandin Megbevayè dey.”

19 Ne migkaǥi si Josue ziyà te menge etew te, “Kenè kew ebpekehimu he ebpenilbi te Nengazen su waǥas sikandin he Megbevayà wey tengelikuzen, su kenè din egkesuatan ke zuen selakew en he ed-ezapen niw. Kenè din ibpelavey is kebpekidsukulè niw wey menge salè niw. 20 Emun ed-engkezan niw is Nengazen ne ebpenilbi kew te zuma he menge ed-ezapen, egkepeukan kew zin ne edsilutan kew zin. Edèdeetan kew zin minsan pa te mibpurungan kew zin dutun te nehuna he timpu.”

21 Piru midtavak is menge etew ziyà te ki Josue te, “Ebpenilbi key iyan te Nengazen.” 22 Migkaǥi si Josue te, “Iyan kew en ebpeketistiǥus te keugelingen niw he penaad, nenaad kew he ebpenilbi kew te Nengazen.” Midtavak sikandan te, “Uya, iyan key en menge tistiǥus.”

23 Migkaǥi si Josue te, “Emun iyan heeyan, engkezi niw en is menge ed-ezapen niw, ne penilbi kew te Nengazen he Megbevayà te Israel.” 24 Midtavak is menge etew te, “Edsilbiyan dey is Nengazen he Megbevayè dey, ne edtumanen dey is menge suǥù din,”

25 Dutun he andew midheǥet ni Josue is kebpepenengdua zin te menge etew ziyà te Shekem, ne imbeǥey zin diyà te kandan is menge kesuǥuan wey menge sulunuzen. 26 Insurat din heini ziyà te Libru te Kesuǥuan te Megbevayà. Ne migkuwa sikandin te zekelà he vatu ne impelastar zin diyà te lempek te kayu he ulayan he uvey te segradu he lugar te Nengazen. 27 Ne migkeǥiyan ni Josue is langun he menge etew zutun te, “Heini is batu iyan tistiǥus te kebpekidlalag te Nengazen kenitew. Egkehimu heini he tistiǥus kuntra keniyu emun ed-iniyuǥan niw is Megbevayà.” 28 Ne impeulì ni Josue is menge etew ziyà te ed-ulian te kada sevaha kandan.

29 Ne hein neipus haazà minatey is suluǥuen te Nengazen he si Josue he anak ni Nun, te keǥurang he 110 he tuig. 30 Inleveng sikandin diyà te tanè din diyà te Timnat Sera, ziyà te vuvungan te Efraim, he zizaya te Buntud he Gaash. 31 Nenilbi te Nengazen is menge Israilihanen dutun te kaazen pa ni Josue. Ne minsan te minatey en si Josue mibpedayun dan gihapun he ebpenilbi te Nengazen dutun te uuyag pa is ebpemendumala te menge Israilihanen he nengetau te langun he mibeelan te Nengazen para te Israel.

32 Is menge tulan ni Jose he mid-uwit te menge Israilihanen puun te Ehipto inleveng diyà te Shekem, diyà te tanà he nepemasa ni Jacob te 100 he vuuk he pelata ziyà te anak ni Hamor he amey ni Shekem. Heini he tanà kevahin te tanà he nepengevilin te menge kevuwazan ni Jose.

33 Minatey zaan si Eleazar is anak ni Aaron ne inleveng diyà te Gibea, kes inged diyà te vuvungan te Efraim he imbeǥey ziyà te anak din he si Finehas.