1-2 Midsuǥù daan te Nengazen si Moises he keǥiyi zin is menge Israilihanen he is minsan hentei he nekesupak te suǥù he wazè din tivevaa, ne iyan heini ereg he ebeelan din:

3 Emun ebpekesalà is lavew he memumuhat he wazè din tivevaa, ne tenged dutun egkezelahig is menge etew, mebpemuhat sikandin diyà te Nengazen te turiti he vaka he wazè din sazir he pemuhat he para idlumpiyu. 4 Uwita zin haazà is baka ziyà te ǥemawan te Tulda he Edtelevukaayan. Izampè din is belad din diyà te ulu zutun te vaka ne lepaa zin haazà diyà te etuvangan te Nengazen. 5 Ne egkuwa is lavew he memumuhat te lengesa zutun te vaka ne ed-uwiten din haazà diyà te seled te Tulda. 6 Idtiyuk din is tezù din dutun te lengesa, ne is duma zutun ibpirik din te kepipitu ziyà te egkesineruwan duen te kurtina he ingkurtina te Utew Segradu he Lugar he ziyà te etuvangan te Nengazen. 7 Ne ebpelisan din te lengesa sikan is menge sungeysungey te menge suyuk duen te pemuhatà he tutungà te veyewà diyà te seled te Tulda he zutun is Nengazen. Ne sikan is egkesamà he lengesa zuen te vaka ne id-itis din diyà te dizalem duen te pemuhatà he pemuhat he edtutungen. Heini he pemuhatà ne ziyà te uvey te ǥemawan te Tulda. 8 Ne egkuwaan din is langun he tavà diyà te seled te ǥetek duen te vaka, 9 is menge vuwà ragkes is menge tavà kayi, wey is deisey he vahin te atey. 10 (Iyan daan heini ebeelan diyà te ibpemuhat he uyaǥen he pemuhat he para te meupiya he kedepità.) Edtutungen heini is langun te memumuhat diyà te pemuhatà he pemuhat he edtutungen. 11-12 Piru is egkesamà he zuma te impemuhat he uyaǥen iring te lundis, sapù, ulu, menge paa, wey is diyà te seled te ǥetek ragkes en is bituka kayi, ne uwita zin heini ziyà te ǥawas te kampu ne tutunga zin diyà te egkeregreg he kayu, diyà te lugar he midtuuwan he lumpiyu, kes lugar he timbaǥà te avu.

13 Emun ebpekerapas te suǥù te Nengazen is tivuuk he keet-etawan te Israel he wazè dan tivevaa, nekesalè dan gihapun minsan pa is kezekelan kandan wazà mesayud mehitenged kayi. 14 Ne emun egketuenan dan en he nekesalè bes sikandan, is tivuuk he keet-etawan mebpemuhat te turiti he vaka su pemuhat he para idlumpiyu. Uwita zan heini is baka ziyà te Tulda he Edtelevukaayan. 15 Ne idampà te menge pengulu te menge Israilihanen diyà te ulu zutun te vaka is menge velad dan ne lepaa zan heini ziyà te etuvangan te Nengazen. 16 Ne megkuwa is lavew he memumuhat te lengesa zutun te vaka ne uwita zin diyà te seled te Tulda. 17 Itiyuk din is tezù din duen te lengesa, ne ipirik din heini te kepipitu ziyà te kurtina he ingkurtina zuen te Utew Segradu he Lugar, he zutun is Nengazen. 18 Ne pelisi zin te lengesa sikan is menge sungeysungey te menge suyuk duen te pemuhatà diyà te seled te Tulda he zutun is Nengazen. Ne is egkesamà he lengesa ne iitis din diyà te zizalem duen te pemuhatà he pemuhat he edtutungen. Heini he pemuhatà, ne ziyà te uvey te ǥemawan duen te Tulda. 19-21 Ne veeli zin daan kayi he vaka is iring te mibeelan din duen te vaka he pemuhat he para idlumpiyu: Kuwaa zin is langun he tavà duen te vaka, ne tutunga zin diyà te pemuhatà, ne tutunga zin mulà sikan is baka ziyà te ǥawas te kampu. Ne pinaaǥi te kebeeli kayi te lavew he memumuhat, ne egkevelukasan is menge Israilihanen puun te menge salè dan, ne ebpeseyluwen sikandan te Nengazen. Iyan heini pemuhat he para idlumpiyu te tivuuk he menge etew te Israel.

22 Emun ebpekerapas te suǥù te Nengazen he Megbevayè din is sevaha he egalen, piru wazè din heini tivevaa, nekesalà gihapun sikandin. 23 Ne emun egketuenan din en he nekesalè bes sikandin, ne mebpemuhat sikandin te meemahan he kambing he wazè din sazir. 24 Pemuhat heini he idlumpiyu kandin. Izampè din is belad din diyà te ulu zutun te kambing, ne lepaa zin haazà diyà te etuvangan te Nengazen, diyà te lugar he lepeey zaan te menge pemuhat he uyaǥen he iyan pemuhat he edtutungen. 25 Ne itiyuk te memumuhat is tezù din duen te lengesa te kambing, ne ipalis din haazà duen te menge sungeysungey te menge suyuk duen te pemuhatà te pemuhat he edtutungen. Is egkesamà he lengesa, iitis din diyà te dizalem duen te pemuhatà. 26 Ne tutunga zin is langun he tavà diyà te pemuhatà iring ded te ebeelan duen te tavà te ibpemuhat he uyaǥen he pemuhat he para te meupiya he kedepità. Pinaaǥi te kebeeli kayi te memumuhat, egkevelukasan is etew puun te salè din, ne ebpeseyluwen sikandin te Nengazen.

27 Emun is sevaha keniyu nekerapas te suǥù te Nengazen he wazè din tivevaa, nekesalà gihapun sikandin. 28 Emun egketuenan din en he nekesalè bes sikandin, ne mebpemuhat sikandin te vehiyan he kambing he wazè din sazir he para te salà he neveelan din. 29 Izampè din is belad din dutun te ulu zuen te pemuhat he para idlumpiyu, ne lepaa zin heini ziyà te Tulda, zuen te lugar he lepeey te menge uyaǥen he iyan pemuhat he edtutungen. 30 Ne itiyuk te memumuhat is tezù din diyà te lengesa zuen te kambing, ne ipalis din haazà diyà te menge sungeysungey te menge suyuk duen te pemuhatà he pemuhat he edtutungen. Ne is egkesamà he lengesa ne iitis din diyà te zizalem duen te pemuhatà. 31 Ne kuwaa zin is langun he tavà duen te kambing iring te ebeelan duen te pemuhat he uyaǥen he pemuhat he para te meupiya he kedepità. Ne kegkepasad dutun, tutunga zin is tavà diyà te pemuhatà he mehemut he pemuhat he ebpekepenunuat te Nengazen. Ne pinaaǥi kayi te ebeelan te memumuhat, egkevelukasan is etew puun te menge salè din, ne ebpeseyluwen sikandin te Nengazen.

32 Emun kerehidu is ibpemuhat te etew para melumpiyuwi sikandin, kinahanglan he vehiyan heini he wazè din sazir. 33 Izampè din is belad din diyà te ulu zutun te kerehidu ne lepaa zin heini ziyà te Tulda, zuen te lugar he lepeey te menge uyaǥen he iyan pemuhat he edtutungen. 34 Ne idtiyuk te memumuhat is belad din diyà te lengesa zuen te kerehidu, ne ipalis din heini ziyà te menge sungeysungey te menge suyuk te pemuhatà te pemuhat he edtutungen. Is egkesamà he lengesa id-itis diyà te dizalem duen te pemuhatà. 35 Ne kuwaa zin is langun he tavà duen te kerehidu iring te ebeelan duen te pemuhat he kerehidu he pemuhat he para te meupiya he kedepità. Ne kegkepasad dutun, tutunga zin is tavà diyà te pemuhatà duma te zuma he menge pemuhat pinaaǥi te hapuy para te Nengazen. Pinaaǥi kayi te ebeelan te memumuhat, egkevelukasan is etew puun te salè din, ne ebpeseyluwen sikandin te Nengazen.