1 Midsuǥù te Nengazen si Moises 2 he keǥiya zin heini ki Aaron wey te maama he menge anak din wey te langun he menge Israilihanen:

3 Is minsan hentei keniyu he ebpemuhat te vaka, kerehidu etawa kambing diyà te zuma he lugar, 4-5 ne kenà diyà te Tulda he Ed-ezapan (egngezanan daan he Tulda he Edtelevukaayan), ne iring ded te nekevunù sikandin te etew, umbe kenè niw sikandin isipa he zuma niw. Midhimu heini he kebpemuhat su para ziyè niw veeli is kebpemuhat te ǥemawan te Tulda ne kenà diyà te zuma he lugar. Umbe is ibpemuhat niw he pemuhat he para gasa iveǥey niw ziyà te memumuhat he iyan ebpemuhat kayi ziyà te Nengazen. 6 Ibpirik te memumuhat is lengesa te uyaǥen diyà te pemuhatà he pemuhatà he para te Nengazen, he ziyà te ǥemawan te Tulda. Ne edtutungen din is menge tavà dutun te uyaǥen ne is kehemut kayi ebpekepenunuat te Nengazen. 7 Umbe, kenè kew en ereg he ebpemuhat diyà te ed-ezapen he henduen be te kambing, su ebpekepeziyù heeyan keniyu ziyà te Nengazen. Kinahanglan he tumana niw heini taman te huziyan he lapis te menge kevuwazan.

8 Timan-i niw heini, sikiyu is menge Israilihanen wey is kenà menge Israilihanen he mid-ubpà duma keniyu:

Is minsan hentei he ebpemuhat te minsan hengkey he pemuhat diyà te zuma he lugar 9 ne kenà diyà te ǥemawan te tulda, ne kenè niw en isipa he zuma niw.

10 Is minsan hentei he egkaan te lengesa egkeepesan te Nengazen ne kenè niw en sikandin isipa he zuma niw. 11 Su is untung te linimbag ne ziyà te lengesa zin, ne insuǥù te Nengazen he gemita niw heini para mevelukasi kew puun te menge salè niw, su is lengesa he iyan mibeǥey te untung, iyan ebpekevelukas te etew puun te menge salà. 12 Iyan heini hinungdan ke maan is kenè kew ereg he egkaan te lengesa.

13 Is minsan hentei keniyu te menge Israilihanen wey te kenà menge Israilihanen he mid-ubpà duma keniyu he ed-utel te langgam etawa tagbis he egkehimu he egkeenen, kinahanglan he ibpetiǥis din is lengesa kayi ne tembuni zin te tanà, 14 su is untung te linimbag ne ziyà te lengesa zin. Umbe migkeǥiyan kew te Nengazen he kenè niw keena is lengesa te minsan hengkey he linimbag; ne is minsan hentei he egkaan kayi ne kenè niw en isipa he zuma niw.

15 Is minsan hentei keniyu te menge Israilihanen wey kenà menge Israilihanen he mid-ubpà duma keniyu he egkaan te langgam he minatey zà etawa midhimetayan te zuma he langgam, kinahanglan he pìpii zin is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep. 16 Emun kenè din ebpìpian is bisti zin wey kenà ebpemeziǥù, ne zuen din televaken.