1 Mekerurunù is inged he Nineve, is inged te menge kriminal wey menge teruen. Mahabet is menge azen dan he tinavan dan, ne layun dan en duen ebiktimahan. 2 Edsurungen sikandan te kuntada zan. Egkezineg dan is letepes te idlagkut te menge kudà, is geǥerakar te ligid te menge kerwahi, is leletepak te paa te menge kudà, wey is daǥing te ebpekeundat-undat he menge kerwahi. 3 Egkeehè dan is edsurung he menge pereuntud te kudà, ed-ilak-ilak he menge ispada wey menge vangkew, wey utew mahabet he intambù he nemematey. Egkengeseligkat is menge sundaru te lawa te menge minatey. 4 Egkehitavù heini ziyà te Nineve su ǥeina te iring sikandin te vahi he layun en ebelegyà te zengeg din, meninintal wey menlelemey. Umbe egke-iniyat din is menge nasyun he mebpesakup kandin.

5 Guntaan, migkaǥi is Nengazen he Mekeǥeǥehem te, “Pemineg kew is menge tig-Nineve! Kuntada ku sikiyu! Umbe ebpeel-elezan ku sikiyu ziyà te zuma he menge nasyun. Iring te vahi he midlislisan he naahà is kegkelevasi zin. 6 Edrewakan ku sikiyu ne egkeiring kew te etew he midtimbaǥan te besura. Edtengteng keniyu is menge etew. 7 Ne edlikey is langun he ebpekaahà keniyu he ke sikandan te, ‘Newaǥey en is Nineve. Wazè en edsineǥew para kandin. Wazà edlangan kandin.’ ”

8 Edhuna ve he lavew is Nineve kenè te inged he Tebes he uvey te Wahig he Nilo? Heini he wahig, nehimu he pengalang te Tebes su nehimu heini he verengbeng he nekeliǥuy te Tebes. 9 Is Etiopia wey is tivuuk he Ehipto, iyan nehimu he zesen te Tebes, ne kunaan din ke ebpedayun heini taman te taman. Is Put wey is Libya, kezapig din heini he menge nasyun. 10 Piru minsan pa te iyan heeyan, mibihag is menge etew kayi ne miduma ziyà te zuma he lugar. Midruntek diyà te menge zalan is dezeisey pa he menge anak dan. Mibpengedinahan is dungganen he menge etew kayi ne mibahin pinaaǥi te ripa su ebpen-uripenen. 11 Iring kew zaan keniyan is menge tig-Nineve, egkeiring kew te egkelangut he kenè din egketuenan ke hengkey is egkehitavù kandin. Egkehandek kew te menge kuntada niw emun edsurungen kew zan en ne ebpen-ehè kew te egkeelesan niw he zutun kenè kew egkezekepan. 12 Is langun he vinerengbeng he menge inged niw egkeiring te kayu he higus he nelutuan en is nehuna he menge veǥas din; ne emun edhuyungen egkengeulug en ne egkehimu en he egkeenen. 13 Tengtengi niw man is menge sundaru niw–meluya he iring te menge vahi! Is menge trangka te pultahan te inged niw ne nengetutung en, umbe melemu zà heini he edselezan te menge kuntada niw.

14 Sigi, pengendami niw is kebpekeuma te menge kuntada niw. Sekezu kew su wey niw zuen meinum. Lig-eni niw pa is menge verengbeng he nekeliǥuy te inged niw; baal kew te menge brik ne purungi niw heini he menge verengbeng. 15 Piru keniyan mismu te lugar niw ebpemematey kew pinaaǥi te hapuy wey ispada, iring te menge pemuleey he mid-etaki te terapan.

Mibmahabet kew iring te menge terapan! 16 Impemezakel niw is menge nigusyanti niw he henduen be te subra pa kezakel te menge vituen diyà te langit. Piru egkeiring sikandan te menge terapan he ed-eminen dan egkeena is menge pinemula ne segugunà dan edlayang. 17 Is menge vantey niw wey menge upisyal, ne henduen be te menge terapan su utew mahabet, ne ziyè edlatun te menge verengbeng emun meǥenew is timpu. Iyan, emun edsilè en is andew, ne edlayang sikandan ne wazà egketau ke hendei sikandan mebpevayà.* Is ibpesavut kayi he menge birsikulu ne iyan is menge nigusyanti, wey menge vantey, wey menge upisyal te Nineve he kenè egkeseriǥan. Timpu te edsurungen is Nineve ebpemelaǥuy zà sikandan.

18 Sikew is hadì te Asiria, ebpemematey is menge pengulu nu. Ebpekepeyapat is menge etew nu ziyà te menge vuntud, ne wazè en ebpeketiǥum kandan. 19 Egkeiring ka te etew he teǥepalì he kenè en egkeulian is palì din. Is langun he ebpekezineg te tudtul mehitenged te kegkezeeti nu ebpakpak te kegkelipey, su is langun te sikandan ne layun nu ebpesipelahi.