1 Hein nehuna he vulan, he iyan is bulan he Nisan, dutun te ike-20 he tuig te kedhadì ni Artaserkses, midsilbiyan ku te vinu haazà is hadì. Iyan pa haazà timpu he neehè e zin is egkeseeng. 2 Umbe, mid-insaan e zin te, “Maan is egkeseeng ke te wazè nu man daru? Kela ke zuen nu prublima.” Utew a migkulbai zutun, 3 piru midtavak ku haazà is hadì te, “Mebmeluǥuyad is untung nu, Mahal he Hadì! Egkeseeng a su ǥeina te nevengkag is inged he midlevengan te menge kepuun ku ne neepur is menge pultahan din.” 4 Mid-insà haazà is hadì te, “Hengkey is egkesuatan nu?” Dutun mid-ampù a ziyà te Megbevayà diyà te langit, 5 ne hein nekepasad a, midtavak ku haazà is hadì te, “Mahal he Hadì, emun nekepenunuat a kenikew, ne ke egkehimu, egkesuat a he ed-ulì diyà te Juda, su ed-umanan ku ebenguna is inged he Jerusalem he iyan midlevengan te menge kepuun ku.”

6 Ne mid-insà kayi te kediey haazà is hadì, ne sikan is rayna ebpimpinuu ziyà te avey zin, ke sikandin te, “Sengemenu keluǥayad is kegkeuǥet nu ziyà, wey keenu ka ed-ulì dini te Babilonia?” Ne migkaǥi ku kandin ke keenu a edlikù, ne midtuǥutan e zin. 7 Midhangyù a zaan dutun te hadì he ke siak te, “Mahal he Hadì, emun egkehimu, beǥayi a kenikew te menge surat he igkeveǥey ku ziyà te menge gubirnedur ziyà te menge prubinsya he zapit te edsenlepan te wahig he Eufrates, su para ituǥut dan kedì is kebayà diyà te kandan dutun te ked-ulì ku ziyà te Juda. 8 Emun egkehimu beǥayi a zaan te surat he igkeveǥey ku ki Asaf, te ebantey te ketelunan nu, su para veǥayi e zin te menge kayu he egemiten te kebaal te pultahan te melig-en he kutà diyà te avey te valey te Nengazen, wey kebangun te verengbeng te inged, wey para te valey he ed-ubpaan ku.” Intuǥut te hadì haazà is menge hangyù ku su mibpurungan a te Megbevayà.

9 Ne hein migenat ad, mibpezumahan e pa zuen te hadì te menge upisyal te menge sundaru wey menge pereuntud te kudà. Ne hein nekeuma ad diyà te zapit te edsenlepan te Eufrates, ne imbeǥey ku ziyà te menge gubirnedur sikan is surat te hadì. 10 Piru hein netuenan ni Sanbalat he tig-Horon wey ni Tobia he sevaha he upisyal he Amunihanen he nekeuma a is ed-uǥup te menge Israilihanen, nepauk utew sikandan.

11 Hein nekelavey en is tetelu he andew puun te kebpekeuma ku ziyà te Jerusalem, 12 midsuǥuksuǥuk a hein liwazà te kezukileman duma te nepipira he menge zuma ku. Wazè ku keǥiya ziyà te minsan hentei is neǥezam ku he egkesuatan te Megbevayà he veeli ku tenged te Jerusalem. Wazà duma he uyaǥen he neuwit ku, kekenà, iyan dà is asnu he ed-untuzan ku. 13 Migawas a zuen te Pultahan he Ebpekesinaru ziyà te Suǥud-suǥud ne midhendiyà a te Teheb he Dragun, ne ziyè e en te Pultahan te Pehendiyà te Timbaǥà te Besura. Mibpurungan ku susiya is nevengkag he menge verengbeng te Jerusalem wey is neepur he menge pultahan kayi. 14 Ne midlaus a ziyà te Pultahan Pehendiyà te Serebseb, ne midlaus e pa ziyà te pemeziǥuey te hadì, piru kenà ebpekevayà dutun is asnu ku. 15 Umbe, ziyà a mebpevayà te zal-ug te Kidron, ne zutun he kezukileman edtulungan ku en edsusiya is menge verengbeng. Ne hein nepasad ku haazà, midliku a ne ziyè e zed mebayà te Pultahan he Ebpekesinaru ziyà te Suǥud-suǥud.

16 Wazà metueni te menge upisyal te inged ke hendei a ebpuun wey ke hengkey is mibeelan ku. Su wazè pa Judio he migkeǥiyan ku mehitenged te pelanu ku, minsan is menge memumuhat, menge pengulu, menge upisyal, wey zuma pa he ebpengetengdanan diyà te gubirnu.

17 Iyan, dutun he timpu, migkaǥi a ziyà te kandan te, “Neehè niw is mekehizuhizu he kebpekesavuk te inged tew. Nevengkag is Jerusalem wey neepur is menge pultahan din. Ed-umanan tew ebenguna is menge verengbeng te Jerusalem su wey kiw kenè en mepeelimungawi.” 18 Midtudtul ku zaan kandan is menge meupiya he mibeelan te Megbevayà kayi te kedì wey ke hengkey is migkaǥi te hadì kayi te kedì. Midtavak sikandan te, “Sigi, ed-umanan tew ebenguna sikan is menge verengbeng.” Umbe nengandam sikandan te kebpuun kayi te meupiya he vuluhaten.

19 Piru hein netuenan heini ni Sanbalat he tig-Horon, ni Tobia he sevaha he upisyal he Amunihanen, ni Geshem he Arabo, mid-undaunda key zan wey mid-engitan. Ke sikandan te, “Hengkey heeyan is ebeelan niw? Mibpelanu kew ve he ebpekidsukulà te hadì?” 20 Midtavak ku sikandan te, “Ebmelempusen key pinaaǥi te tavang te Megbevayà diyà te langit. Sikami is menge suluǥuen din ebpuunan dey is kebangun te menge verengbeng te Jerusalem. Piru sikiyu, wazè niw lavet wey ketenged kayi te Jerusalem, wey wazè kew meragkes te keguǥuza mehitenged kayi he inged.”