1 Kayi he timpu, midriklamu is duma he menge maama wey is menge esawa zan diyà te zuma zan he menge Judio. 2 Ke sikandan te, “Merapung is pemilya zey ne egkinahanglan key te egkekaan su para meuyag key.” 3 Duen duma kandan he migkaǥi te, “Insandè dey en ganì is menge bevesukè dey, menge pemuleey zey te paras, wey is menge valey zey su para zuen dey egkekaan ke timpu te vitil.” 4 Ne zuen pa zuma kandan he migkaǥi te, “Kinahanglan he ed-utang key te selapì he para ibayad dey ziyà te hadì te vuhis para te menge bevesukè dey, wey menge pemuleey zey te paras. 5 Ne Judio key man daan iring kandan, wey Judio zaan is menge anak dey, piru sikami mulà kinahanglan he ibpeuripen dey kandan is menge anak dey su wey key mekeselapì. Iyan tutuu is, nengeuripen en is duma he menge anak dey he vahi su ingkevelegyè dey en. Piru wazà duma he egkehimu zey su is menge vevesukè dey wey menge pemuleey zey te paras ne egkaangken en te zuma.”

6 Ne hein nezineg ku haazà is menge riklamu zan, utew a nepauk. 7 Mibpurungan ku is-isipa haazà he kebpekesavuk, ne midsawey ku is menge pengulu wey menge upisyal ne ke siak te, “Edèdaaǥen niw is duma niw he menge meǥinged! Su emun ed-utang sikandan te selapì diyà te keniyu ne ibpetuvù niw.” Ne impeumew ku sikandan su edtiǥum key. 8 Ke siak te, “Edhimuwen tew is taman te egkehimu tew para melekat tew is duma tew he menge Judio he imbelegyè dan is keugelingen dan pinaaǥi te kebpeuripen diyà te menge meǥinged diyà te zuma he lugar. Piru ǥuntaan tenged kayi te vaal niw, nepeǥes en maan sikandan he ebelegyà te keugelingen dan diyà te keniyu mismu. Layun tew ves sikandan edlekata?” Ne zutun mibpereremek dà sikandan su wazè dan egkekaǥi.

9 Ne impelaus ku is lalag ku, “Kenà meupiya is baal niw. Ereg pezem he egkezumahan te kegkahandek te Megbevayà is kebpengungubpaan niw su para kenè kiw sudia te menge etew ziyà te zuma he menge nasyun he menge kuntada tew. 10 Siak mismu wey is menge kezuzumahi ku wey menge etew ku mibpesambey key te selapì wey trigu ziyà te menge zuma tew he edlised. Piru ǥuntaan kenè tew en sikandan ibpevayad te menge utang dan. 11 Guntaan mismu iulì niw is menge vevesukè, menge pemuleey te paras, menge pemuleey te ulibu, wey menge valey te nekeutang diyà te keniyu. Iulì niw is tuvù te mibpesembayan niw he selapì, trigu, binu, wey lana.” 12 Midtavak dan te, “Id-ulì dey is langun diyà te kandan. Kenè dey en sikandan edsukutan. Edtumanen dey heeyan is migkaǥi nu.”

Ne zutun impetawag ku is menge memumuhat ne impepenangdù ku ziyà te etuvangan dan is menge pengulu wey menge upisyal he edtumanen dan is insaad dan. 13 Ne zutun mibengkas ku is bagkes te hawak ku ne ke siak te, “Berakat he iring kayi is ebeelan te Megbevayà diyà te valey niw wey menge azen niw emun kenè niw edtumanen is insaad niw. Berakat he iawè din heini is langun diyà te keniyu.”

Midtavak is langun he etew zutun te, “Berakat he metuman,” ne midalig dan is Nengazen. Ne midtuman te menge pengulu wey menge upisyal is insaad dan.

14 Seled te 12 he tuig te kebpenirbisyu ku he gubirnedur ziyà te Juda, he puun te ike-20 he tuig pehendiyà te ike-32 he tuig te kedhadì ni Artaserkses, wazà a mekezawat wey is menge kezuzumahi ku te keenen he para te gubirnedur. 15 Piru is menge gubirnedur he nehuna kediey nehimu he peveǥat te menge etew, su kada andew ebuyù dan te egkekaan dan wey egkeinum dan he vinu wey 40 he vuuk he pelata. Minsan is menge upisyal zan mibpehimulus diyà te menge etew. Piru wazè ku mulà haazà beeli, su zuen ku kedtahud te Megbevayà. 16 Kekenà, mibeelan ku is langun para meuman mevangun sikan is berengbeng pinaaǥi te tavang te menge etew ku. Ne wazà a megaked te tanà. 17 Layun ku ganì ibpekaan is 150 he menge Judio he menge upisyal wey elin is menge meǥeliyug ku he ebpemuun diyà te nekeliǥuy he menge nasyun. 18 Kada andew ebpelapà a te sevaha he vaka, heenem he melambù he menge kerehidu, wey ebpeiyew a te mahabet he manuk. Ne kada sepulù he andew ebpeǥawas a te zekelà he vinu he nekedseselekawà he klasi. Minsan pa te iyan heini gelestuwan ku, wazà a mebpelibri te keenen he para te gubirnedur, su netuenan ku he egkeveǥatan is menge etew.

19 Mid-ampù a, ke siak te, “He Megbevayè ku, berakat he edtuvazan a kenikew tenged te langun he mibeelan ku kayi te menge etew.”