1 Mama, emun nenangdù ka he iyan ka ebayad te utang te sengeeetew wey mibpesarig ka he iyan ka ebpenavak te televaken te zuma, 2 ne egkezeetan ka zutun te penangdù nu, 3 ne zuen nu en televaken diyà te zuma. Piru iyan heini ul-ulaha nu su wey ka melibri zutun te penangdù nu ziyà te kandin: Hendiyè ka te kandin ne hangyù ka he tevangi ke zin he mekelingkawas ka zutun te televaken nu. 4 Kenè ka lipezeng wey himeley taman te ebpekelingkawas ka. 5 Libriya nu is keugelingen nu iring te selazeng etawa tagbis he nekaawà he nelitaǥan te mengenganup.

6 Sikiyu is menge peǥulen, ahaa niw wey istudyuwi niw ke mibmenumenu te menge lemetik is kedlaǥud te igkeuyag dan, para mehimu kew he uluwanen. 7 Minsan wazè dan egalen etawa pengulu he ebmandar kandan, 8 iyan, edtiǥum sikandan te egkekaan dan timpu te ǥulavung wey tiraǥun su para zuen dan mekaan emun tipenguzan. 9 Sikiyu is menge peǥulen, edtulung kew zè be edliplipezeng? Keenu kew en be ed-enew? 10 Hidhizeǥè kew, liplipezeng kew, pahareyharey kew, 11 ne egketik-ew egkehitavù diyà te keniyu is kewewezai he iring te kebpekeuma te neǥumeenan he tulisan.

12 Is menge etew he wazè dan pulus wey is mezaat is menge ulaula zan, ne iyan dà idsuǥuksuǥuk dan is ebpemenudtul te tarù. 13 Ebpemengendat sikandan wey ebpeuy-uyawà pinaaǥi te menge velad wey paa zan para te kedlimbung te zuma. 14 Tenged te kebmesinupaken dan, layun dan ebpelanu te kebaal te mezaat, wey iyan sikandan ebpemuunà te samuk. 15 Umbe, egketik-ew egkehitavù diyà te kandan is kezeetan; segugunè dan ebpekehendiyà te kezeetan ne wazè en paaǥi wey zan melibri.

16 Duen pitu he kelasi te etew he egkeepesan wey edumutan te Nengazen:

20 Mama, sunuza nu is menge suǥù wey ibpenurù te ginikanan nu kenikew. 21 Ipemula nu heini ziyà te ǥehinawa nu su wey kenè nu heini melipati. 22 Emun edhipanew ka ne iyan heini egkehimu he ǥiya nu, ne emun edlipezeng ka ne iyan heini egkehimu he vantey nu, ne emun egkepukew ke en ne iyan heini edsambag kenikew. 23 Su heini is menge suǥù dan wey menge penurù iring te sulù he ed-anlag diyà te kenikew. Ne is menge kedawey zan kenikew, ebpeketandang te vetasan nu, ebpekeuǥup wey ebpekepeluǥayad te untung nu. 24 Ne pinaaǥi kayi ebpekelikey ka te vahi he mengungumpadi wey kenè ka egkeuwit te mekevivihag he menge lalag din. 25 Kenè ka petintal tenged te kekempet din. Kenè ka peuwit te mekevivihag he menge mata zin. 26 Su is kebpekidhilavet te vahi he ebelegyà te zengeg din, utew ebpekepepubri zutun te edhilavet, piru kedhilavet te esawa te zuma, ne ebeyazan nu te untung.

27 Is etew he edsepipi te hapuy, egketutung is bisti zin; 28 is edhipanew ziyà te vaǥa, egketutung is paa zin. 29 Ne iring din ded daan is maama he egkevut te vahi he zuen din en esawa su kenà ebpeseyluwen, kekenà, edsilutan sikandin.

30 Kenà edsudien te menge etew is tekawen emun iyan ibpenakew zin te keenen su ǥeina te egkeumes en sikandin. 31 Iyan, emun egkezekepan sikandin, ne ibpevayad sikandin te kepipitu edtekepa is bali zutun te midtakew zin, minsan pa ke pinaaǥi kayi egkeamin is langun he azen din.

32 Is etew he edhilavet te zuen din esawa ne kenà metau he ed-isip te hustu. Iyan dà sikandin ed-uney edezaat te lawa zin. 33 Ebpesekitan sikandin ne egkepeel-elezan taman te taman. 34 Ne is ebpengelikud he teǥiesawa zutun te vahi he edhilevetan, ne utew egkererengiti, ne wazè din en kegkehizu emun ebelesan din is midsalàsalà diyà te kandin. 35 Kenè din en edewaten is ibayad diyà te kandin ne kenè en sikandin egkepeypeyuan minsan sengemenu pa kezekelà is ibpayùpayù kandin.