1 Meupiya pa is pemilya he usahay vehew zà is egkeenen dan, iyan, melinew is kedezepitè dan, kenà is pemilya he layun dà meupiya is sezè dan, iyan, ebpekunkuntedahà.

2 Is uluwanen he suluǥuen, ne ebpekemandù te taleng he anak te egalen din, ne ebeǥayan sikandin te egkepengevilin duma te zuma pa he menge anak te egalen din.

3 Is bulawan wey pelata, egezaman pinaaǥi te hapuy, ne egezaman daan te Nengazen is gehinawa te etew.

4 Is lalung, egkesuat he ebpemineg te mezaat he menge lalag, ne is teruen, egkesuat he ebpemineg te tarù.

5 Is etew he ed-un-undahan din is menge pubri, iyan din egkesudì is Megbevayà su iyan man midlimbag kandan, ne is igkesuat din is kegkehitevua te mezaat diyà te sengeetew, siguradu edsilutan sikandin.

6 Dengeg te meǥurang is menge apù din ne zengeg daan te menge vatà is ginikanan dan.

7 Wazà igkepegalbu te tulebung ne kenè dait he edtarùtarù is pengulu.

8 Is etew he edsipsip, kunaan din ke iring te kegkeselemengkiru is kedsipsip su pinaaǥi zutun, egkehimu kun minsan is kenà pezem egkehimu.

9 Is etew he ebpeseyluwen din is ebpekesalà diyà te kandin, igkepenurù din pinaaǥi zutun he iyan hustu he ed-ul-ulahan is kegiǥineǥawa, ne is ed-uman egkeyungkat dutun te sayep ne ebpekebulang te utew teleemiǥu.

10 Is etew he meudseb, kesevaha zà edsewaya ne egkepenurù en, iyan, is tulebung, minsan penletiguwa pa ne kenà egkepenurù.

11 Is lalung he etew, edsukul te gubirnu, ne zuen daan edsuǥuen wey mekaasdang kandin.

12 Piligru pa is kebpekesinuǥung te engey kenà is kebpekesinugung te bir he ed-uraingen tenged te veǥu pa he midawi te sengelelanggam is menge anak din.

13 Emun mezaat is ibales ta te meupiya ne is mezaat kenà egkaawà diyà te valey ta.

14 Is puunà te kesevaan, ne iring te zeisey he vudsi ziyà te teleǥuey te wahig; umbe edsengsengen heini te wazè pa medekelà.

15 Is kedlibriya te nekesalà wey is kedsiluti te wazà mekesalà, ne pudu kenà igkesuat te Nengazen.

16 Wazà pulus te selapì he egkeǥastu tenged te kebpetunghaa te tulebung su wazè din man tinguhà he mebmetau sikandin.

17 Is elukuy nu, ne egkehizuwan kezin te langun he timpu, wey iyan ketuyuan ke maan is duen nu perinti, para zuen edtavang kenikew te timpu te kelised.

18 Is etew he kenà metau he ed-isip ke hengkey is hustu, ne segugunè din ebpeseriǥa is beleyazan te zuma zin.

19 Is etew he zekelà diyà te ǥehinawa zin is samuk, ne zekelà diyà te ǥehinawa zin is salà; ne is etew he lalung ne ebpen-ahà te kegkezeeti zin.

20 Kenà ed-uswag is etew he layun mezaat is ed-isipen din, ne ebpekaagbur ziyà te kesamuk is etew he layun mezaat is ebpengeǥiyen din.

21 Emun engey is anak ta egkeveǥayan ki te seeng, ne wazè ta kelipey. 22 Emun layun duen kelipey he egketaǥù diyà te ǥehina ta, ebmeupiya is kedlelawa ta, iyan, emun layun dà seeng is egketaǥù diyà te gehinawa ta, egkezeetan is kedlelawa ta.

23 Is lalung he etew, edewaten din is idsipsip diyà te kandin su para kenà metuman is hustu he kukuman.

24 Is etew he meudseb, egketuenan din ke hengkey is dait he ebeelan din, iyan, is tulebung, minsan hengkey zà duen is ebeelan din.

25 Is tulebung he anak, egkeveǥayan din te seeng is amey zin ne igkeperuǥur zin is iney zin.

26 Kenà meupiya is kebpigada te etew he wazà mekesalà wey is kebuǥala te menge upisyal tenged te kedtinazeng dan.

27 Is etew he uluwanen, emun egkaǥi, ebpekeventayan din is menge lalag din su wey kenà mekekaǥi te kenè hustu, ne is meudseb he etew mevented sikandin.

28 Minsan is tulebung kunaan ta ke uluwanen wey meudseb emun ebperpereremek dà sikandin.