1 Heini pa is duma he menge erubasa ni Solomon he migkupya te menge maama he sakup ni Hadì Hezekia he hadì te Juda:

2 Ebentuǥen tew is Megbevayà tenged te menge egkengeulaula he wazè din ipezayag kenitew; ebentuǥen tew is menge hadì tenged te menge ibpezayag dan kenitew.

3 Kenè ta egkesavut is ed-isipen te menge hadì su iring heini ketikang te langit wey iring kezalem te zaǥat.

4 Ewaa nu is tangis te pelata, ne is etew he pandey te pelata ebpekehimu te ǥelemiten puun dutun. 5 Iring din ded daan emun ibpaawà te hadì is lalung he peresambag din, ne egkelig-enan is kedumala zutun te hadì pinaaǥi te ketazeng.

6 Emun sevaha ka te menge upisyal te hadì, ne kenè nu isipa is keugelingen nu he lavew tenged te nekepinuu ka zuma te dungganen he menge etew. 7 Deyzey pa ke egkeǥiyan ka zutun te hadì te zutun ka pinuu kenà ke egkeǥiyan ke zin te awè ka, ne egkepeel-elezan ka zutun te etuvangan te dungganen he menge etew.

8 Emun duen egkeehè nu, kenè nu segugunà isumbung diyà te hukmanan su emun duen ebpekepenistiǥus he igkepeletew zin he nesayep ka ne zutun egkepeel-elezan ka.

9 Emun ebpekedlawan kew te siringan nu, egkehimu ke ebpelewanè kew, piru kenè niw tudtula is in-eles niw. 10 Su emun egketuenan heini te zuma, ne kela ke peel-elezi kew zan, ne egkezeetan is dengeg niw taman te taman.

11 Is lalag nu he edsungkad te hustu he timpu, iring heini te mensanas he vulawan he idsavuk diyà te selevukà he pelata.

12 Is kedawey te etew he uluwanen te etew he egkesuat he ebpemineg mahal pa heini kenà te elahas he vulawan.

13 Is egkeseriǥan he menunudtulà, ebpekepahagkap te egezamen te midsuǥù kandin, iring te meǥenew he wahig emun timpu te gulavung.

14 Ne is etew he ebpenangdù he zuen ibeǥey zin, iyan, kenè din idlaus, haazà is penangdù din igkepetug-iring te ǥapun wey keramag he kenà egkezumahan te uzan.

15 Is kebmepelevayen wey menayù he kegkaǥikaǥi ne ebpekeuwit te menge pengulu minsan te menge mezesen is gehinawa.

16 Kenè ka mebpesubra te kegkaan te teneb su kela ke mekeutè ka. 17 Kenè ka layun penumbaley ziyà te siringan nu, su kela ke meperahi sikandin ne egkeepesan ke zin.

18 Is etew he ebpenistiǥus te tarù kuntra te zuma zin, ne ebpekezezaat iring te ispada, badas, wey panà.

19 Emun timpu te kesamuk ne is kedsarig diyà te etew he kenà metinumanen, igkepetug-iring te ngipen he meǥaan en egkesepù wey iring daan te paa te pigket.

20 Is kedlengana te etew he utew egkeseeng, pinaaǥi te kegkentahi nu kandin, ne igkepetug-iring te edluwasen nu is kumbalè din dutun te timpu te meǥenew etawa edsevukan nu te sukà is palì din.

21 Emun egkevitil is kuntada nu, ipekaan nu, ne emun egkemezahan ipeinum nu. 22 Ne emun ebeelan nu heini, ne egkeeled sikandin kenikew, ne is Nengazen ebales kenikew.

23 Is keramag he ebpuun diyà te zizaya ed-uwit te uzan, ne iring dutun is etew he pereituk su ed-uwit te tudtul he igkesavà.

24 Deyzey pa is kedsivey ked-ubpa kenà is kebpekid-amur te esawa he peretebek.

25 Is kebpemineg te meupiya he tudtulanen he ebpuun diyà te meziyù, ne iring te ked-inum te meǥenew he wahig emun egkemazahan ki.

26 Is metazeng he etew he egkeuwit te lalung he etew iring te leveg he serebseb etawa meremerik he teheb.

27 Kenà meupiya emun ebpesubra ki te kegkaan te teneb, iring din daan is kedtinguhà he mezeliǥi ka layun te menge etew.

28 Is etew he kenè din egkeeǥen is suat din ne melemu egkezeeti iring te sevaha he inged he wazè din berengbeng.