1 Maan is ed-isipen te menge etew is kedsukul te Nengazen?

Maan is ed-isipen dan is wazè din pulus?

2 Is menge hadì wey is menge pengulu kayi te kelibutan, ne midtiǥum dan wey nengandam te kebpekidtebek te Nengazen wey te hadì he mibpilì din.

3 Ke sikandan te, “Kinahanglan he kenè kiw ebpevayàbayà wey ebpesakup kandan.”

4 Piru is Nengazen he ziyà te langit he ebpimpinuu te pinuuwè din te kedhadì, ed-engitan din dà sikandan.

5 Tenged te kegkepauk din, ebpetizeenan din sikandan, egkengehandek dan.

6 Ke sikandin te, “Diyà te Zion, kes segradu he vuvungan ku, insavuk ku is mibpilì ku he hadì.”

7 Ne migkaǥi haazà is hadì he mibpilì te Megbevayà te,

“Ibpehayag ku is migkaǥi kedì te Nengazen te, ‘Iyan ka Anak ku,

ne ǥuntaan ibpekilala ku he amey ad kenikew.

8 Buyù ka kayi te kediey ne ibeǥey ku kenikew is menge nasyun, taman te pinekemeziyù he lugar te tivuuk he kelibutan

para maangken nu heini, ne edtumanen ku heeyan.

9 Dumelaha nu sikandan, he wazè ebpekesukul te kedumala nu.

Iring sikandan te ziniyun he ǥelemiten he edrupeten nu.’ ”

10 Umbe, sikiyu is menge hadì wey menge pengulu kayi te kelibutan, sevuta niw heini he menge lalag,

ne pemineǥa niw is petizaan keniyu.

11 Penilbiyi niw is Nengazen duma is kedtahud

ne ikelipey niw sikandin.

12 Tehuza niw is hadì he mibpilì din,

su emun kenà, ne egkepeukan kew zin ne edèdeetan kew zin.

Deyzey is langun he ed-aput diyà te Nengazen.