1  Nengazen he Megbevayè ku,

ed-aput a ziyà te kenikew.

Libriya a su zuen menge etew he edsurung kediey,

2 su emun kenà a kenikew edlibriyen, ne kela ke edhimetayan e zan;

ebpitpitasen dan is lawa ku iring te ebeelan te erimaung te egkezawi zin,

ne zutun wazè en ebpekelibri kediey.

3  Nengazen he Megbevayè ku,

emun nekevaal a te mezaat diyà te iring ku he etew,

4 emun mibelesan ku te mezaat is meupiya he mibeelan kedì te emiǥu ku,

emun mid-eǥawan ku te menge azen is kuntada ku te wazà hustu he hinungdan,

5 ne vey-ani ad kenikew pinaaǥi te kedtuǥut nu he mezaag a te menge kuntada ku ke edsurungen e zan.

Bey-ani ad ke edtekutakan e zan taman te kebpatey ku, ne ed-ewaan e zan is minatey en.

6  Nengazen he Megbevayè ku, ipeehè nu en guntaan is pauk nu te menge kuntada ku he utew egkengepauk kedì,

su iyan man ebpen-ahaan nu is hustu he kukuman.

7 Tiǥuma nu is langun he menge tribu ziyà te kenikew,

ne dumelaha nu sikandan te ziyè ke zà te langit.

8 Iyan ka, Nengazen, edhukum te menge etew.

Ipeehè nu he wazè ku salà,

su netuenan nu man he metazeng a

ne wazè ku mibeelan he mezaat.

9 Kenè nu ituǥut he ebpedayun is ulaula te mezaat he menge etew,

ne tuvazi is menge metazeng,

su metazeng ke man he Megbevayà,

wey egkesusi nu is isip dey wey gehinawa zey.

10 Iyan ka, He Megbevayà, nehimu he kelasag ku.

Iyan ka edlibri te menge metazeng.

11 Egkezumahan te ketazeng is kedhukum nu,

ne kada andew egkepeukan nu is menge lalung.

12-13 Ne emun kenè dan ed-engkezan is menge mezaat he vaal zan, ne andam ka he edsilut kandan.

Iring ka te sundaru he naandam en is idhimatey zin he menge gumaan.

Migkemanga zin en is ispada zin wey zaan din en he edhingaten is panè din he ebelahan te egkeregreg he vesut.

14 Is lalung he menge etew ne mezaat is ed isipen dan;

edtinguhè dan te kebaal te samuk ne ebpenlimbung sikandan.

15-16 Edlikù diyà te kandan is kebaal zan te samuk wey kebpesipala.

Iring sikandan te mibudsi para egkeuluǥan te zuma zan,

piru iyan mulà sikandan egkeulug dutun.

17 Sikew, Nengazen, is Utew Lavew he Megbevayà.

Ebpeselamatan ku sikew tenged te ketazeng nu.

Edeliǥen ku sikew pinaaǥi te kegkanta ku.