1 Diyà a te Nengazen edhangyù he kelesaǥi e zin.

Ne maan is egkaǥi kew kayi te kedì te,

“Pelaǥuy ka iring te tagbis pehendiyà te menge vuvungan,

2 su zutun te merusirem edhingaten en te menge mezaat he etew is menge panè dan,

su ebpenaan dan en is menge etew he edtinazeng.

3 Wazè en egkehimu te menge metazeng emun naawè en diyà te inged is metazeng he kukuman.”

4 Diyà is Nengazen ed ubpà te segradu he valey zin;

diyà te langit is pinuuwè din te kedhadì.

Ed-ahaan din wey edsusiyen din is langun he menge etew.

5 Edsusiyen din is menge metazeng wey is menge lalung he menge etew.

Ne egkeepesan din is menge mesipala.

6 Ebpeuzanan din te egkeregreg he menge vaǥa wey esupri is menge lalung he etew;

ne edsilutan din sikandan pinaaǥi te meinit he keramag he ebpekelupa kandan.

7 Su metazeng is Nengazen ne iyan igkelipey zin is metazeng he menge vaal.

Umbe, is etew he edtinazeng ebpekeuvey ziyà te etuvangan din.