1  Nengazen, diyà a te kenikew med-aput.

Ne kenè nu ituǥut he mepeel-elezi a.

Libriya a su metazeng ke man.

2 Pemineǥa a, ne segugunà a kenikew libriya.

Kelesaǥi a he iring te nekeendilung a ziyà te vatu;

pengelangi a he iring te nekeeles a ziyà te melig-en he elesà.

3 Geina te iyan ka endilungè ku wey melig-en he elesà,

penurua a wey ǥiyahi a su wey ka meveǥayi te zengeg.

4 Ilikey a kenikew te litag he idlitag kedì te menge kuntada ku,

su iyan ka pengalang ku.

5 Idsarig ku kenikew is untung ku.

Libriya a kenikew, Nengazen, su iyan ka kes Megbevayà he egkeseriǥan.

6 Utew ku egkeepesi is menge etew he ed-azap te wazà menge pulus he menge ed-ezapen,

su ziyè e man mulà te kenikew medsarig, Nengazen.

7 Egkelipey a su veliǥeǥawen ke man.

Ne wazà mekeeles kenikew is menge elentusen ku,

ne netuenan nu is menge kelised ku.

8 Wazà a kenikew iveǥey ziyà te menge kuntada ku,

kekenà, midlibri a kenikew te kezeetan.

9 Kehizuwi a, Nengazen, su edlised e en.

Nemenlevag en is menge mata ku te kedtulung ku kedsineǥew,

ne mibmeluya ad.

10 Layun ku zuen igkeseeng.

Nepipire en he tuig is kebpeketulung ku kebpekesineǥew.

Mibmeluya ad tenged te menge elentusen ku,

ne henduen be te wazè en desen te menge tulan ku.

11 Ebpeel-elezan a te menge kuntada ku,

lavew en is menge emurè ku te inged.

Minsan is menge kilala ku ne nengahandek en he ed-uvey kediey.

Emun egkeehè e zan diyà te zalan ne ebpekeziyuan e zan.

12 In-iring e zan en te minatey su edlipatan e zan en.

Iyan ked-isipa zan kedì he iring a te ziniyun he nerupet he wazè din en pulus.

13 Egkezineg ku is kebpenènaasà te mezakel he menge kuntada.

Ebpemiligru a minsan hendei a ebpevayà,

su mibpelenuwan e zan te edhimatey.

14 Iyan, midsarig a ziyà te kenikew, Nengazen.

Iyan ka Megbevayè ku.

15 Is untung ku ne ziyan te kenikew;

libriya a te menge kuntada ku he edezaat kedì.

16 Ipeehè nu is keupiya nu kedì te suluǥuen nu;

ne ǥeina te mahal a kenikew, ne libriya a kenikew.

17  Nengazen, kenè nu ituǥut he mepeel-elezi a,

su ziyà a te kenikew megnganey.

Iyan nu zà peel-elezi is menge lalung he etew ne penhimetayi nu sikandan,

su wey zan mekepereremek en diyà te leveng dan.

18 Ipetiem nu heeyan is menge teruen he ebpegalbu wey edsudì te menge metazeng.

19 Utew zekelà is keupiyaanan he idteǥana nu te menge etew he edtahud wey edsarig kenikew.

Egkaahà te langun is keupiya nu.

20 Id-eles nu sikandan diyà te lugar he zutun ka,

ne zutun kenà sikandan egkesudì wey egkeinsultuwan te menge etew.

21  Nengazen, ereg ka he edeliǥen!

Su egkein-inuwan is paaǥi te kebpaahaa nu te ǥaǥew nu kedì

hein diyà a te sevaha he inged he midlingutan te menge kuntada.

22 Tenged te utew ku kegkahandek, kunaan ku ke mibpekidsuwey ke en kedì.

Iyan, dutun, midineg nu is kebpehizuhizu ku zutun te kebuyù ku te tavang diyà te kenikew.

23 Sikiyu is menge etew te Nengazen he metinumanen,

mahala niw sikandin.

Ebentayan te Nengazen is menge metinumanen,

iyan, dekelà mulà is idsilut din te menge mepelevawen.

24 Sikiyu is ebperateng te tavang te Nengazen,

mebpekelig-en kew wey mebpekevurut.