1 He Megbevayà, libriya a te kedezaat kedì te menge kuntada ku;

iyan ka metau he kenà a mekeizi te menge etew he egkuntada kedì.

2 Libriya a te kegkaid te lalung he menge etew he ebpemenhimatey.

3  Nengazen, ahaa nu man, mid-eyanan e zan,

su edhimetayan e zan minsan pa te wazà a mekesalà diyà te kandan.

4-5 Wazà neveelan ku he salà, piru andam sikandan he ed-surung kedì.

He Nengazen he Megbevayà he Mekeǥeǥehem, Megbevayà te Israel, seǥipaa ad ne tevangi ad guntaan.

Siluti nu en is menge etew he wazà medtuu kenikew.

Kenè nu ikehizu is menge seligkep.

6 Ebpemenlikù dan ke egkesakep en is iring te asu he ebpemenhiniǥer he edliǥuyliǥuy te inged.

7 Pemineǥa nu is ebpengeǥiyen dan;

memesakit heini he iring te ispada.

Egkaǥi pa sikandan te, “Wazà ebpekezineg kenami.”

8 Piru ed-engitan nu zà sikandan, Nengazen.

Ed-un-undahan nu zà sikandan is wazà medtuu kenikew.

9 He Megbevayà, iyan ka zesen ku;

edtaǥad a kenikew su ziyà a layun te kenikew edangep,

10 ne iyan ka Megbevayà he mibmahal kedì.

Iyan ka huna kedì ne ipeehè nu kedì is kegkezaaǥa te menge kuntada ku.

11 Piru hunaa nu sikandan resaya ne human nu himetayi

su para kenà egkelipatan te menge etew ku is paaǥi nu te kedsilut te menge kuntada nu.

He Nengazen he iyan layun ebpengalang kenami, tezina nu wey zèdeeti nu is menge kuntada ku pinaaǥi te ǥehem nu.

12 Edhimu sikandan te salà pinaaǥi te ebpengeǥiyen dan,

umbe verakat he iyan mekeutel kandan is kegkemepelevawen dan.

Ebpenrawak dan wey edtarùtarù,

13 umbe tenged te pauk nu kandan, dèdeeti nu sikandan taman te egkepurung sikandan egkahanew.

Ne zutun egketuenan te keet-etawan kayi te tivuuk he kelibutan he iyan ka hadì te Israel.

14 Emun mezukilem ebpemenlikù is menge kuntada ku he iring te asu he ebpemenhiniǥer he edliǥuyliǥuy te inged.

15 Iring sikandan te asu he edliǥuyliǥuy su ebpen-ahà te egkekaan din,

ne egngesnges emun kenà egkahantey.

16 Iyan, siak mulà, egkanta a mehitenged te ǥehem nu.

Kada meselem ebpekezaǥing a is egkanta mehitenged te ǥaǥew nu.

Su ǥeina te ziyà a layun te kenikew edangep ne iyan ka ebpengelintau para wazà mezaat he egkehitavù kedì emun timpu te kelised.

17 He Megbevayà, iyan ka ebeǥey kedì te zesen;

egkanta a te menge idalig kenikew,

su iyan ka eputè ku, is Megbevayà he mibmahal kedì.