1 Diyè e zà te Megbevayà ebpekehimeley,

ne ebpuun diyà te kandin is kelibriyanan ku.

2 Iyan sikandin endilungè ku wey menluluwas ku.

Iyan sikandin eputè ku, umbe kenà a egkezeetan.

3 Sikiyu is langun he menge kuntada ku, sengemenu keluǥayad is kedtulunga niw kedsurunga kediey te kedezaat kedì?

Iring a te verengbeng he egketempag en wey te kudal he midsulad en.

4 Egkesuatan a keniyu te ebpaawà puun te metikang he ketengdanan ku.

Ne igkelipey niw is kedtarùtarù.

Meupiya uvag is menge lalag niw kayi te kedì piru ziyà te ǥehinawa niw ebpenrewakan a keniyu.

5 Diyè ku zà te Megbevayà egkaangken is kebpekehimeley ku su ibpeperateng e zin.

6 Iyan dà sikandin endilungè ku wey menluluwas ku.

Iyan sikandin eputè ku, umbe kenà a egkezeetan.

7 Iyan is Megbevayà edlibri kedì wey ebeǥey kedì te zengeg.

Iyan sikandin melig-en he endilungè ku he edlavan kedì.

8 Sikiyu is menge etew te Megbevayà,

sarig kew kandin te langun he timpu!

Keǥiya niw ziyà te kandin is langun he igkeǥiyaǥiya niw

su iyan sikandin kelasag tew.

9 Is menge etew, dungganen man etawa kenà, ne kenà egkeseriǥan.

Neked-iring dà he wazà pulus; emun edtimbangen sikandan ne edhuna pa sikandan he mahagkap te keramag.

10 Kenè kew medsarig te kebpeneligkep te azen.

Kenè niw peretenga is keupiyaanan pinaaǥi te kebpenakew.

Minsan edekelè pa is ketiǥeyunan niw, ne kenè niw heini seriǥi.

11 Layun ku en egkezineg he egkaǥi is Megbevayà te kandin is gehem wey is gaǥew.

12 Kenà duwazuwa he ebelesan te Nengazen is menge etew sumalà is mibeelan dan.