1 He Megbevayà, kenè ka pereremek, kekenà, waleng ka!

2 Hanu man te menge kuntada nu,

egkegurigew zan he edsurung ne ebpegalbu sikandan su ebpekezaag dan kun.

3 Duen meeles he pelanu zan he para te kezeetan te menge etew nu he ed-eturen nu.

4 Ke sikandan te, “Gaang-gaang kew su edèdeetan tew is nasyun he Israel su para melipati en heini taman te taman.”

5 Nesevaha sikandan te mezaat he pelanu zan.

Mid-uyun sikandan te kegkuntada kenikew.

6 Iyan sikandan kes menge Edomanhen, menge Ismailihanen, menge Moabitanhen, menge Hagarnen,

7 menge Gibalnen, menge Amunihanen, menge Amalikanhen, menge Filistihanen, wey menge etew te Tyre.

8 Midtavang daan kandan is Asiria he mezesen he tumetavang te menge kevuwazan ni Lot.

9 Daaǥa nu sikandan Nengazen,

iring te mibeelan nu ziyà te menge Midianhen,

wey ziyà te ki Sisera wey ki Jabin diyà te zal-ug he Kishon.

10 Mibpatey sikandan diyà te Endor ne neredak is menge lawa zan ne nehimu he abunu te tanà.

11 Dèdeeti nu is menge pengulu zan iring te mibeelan nu ki Oreb, ki Zeeb, ki Zeba, wey ki Zalmuna.

12 Su migkaǥi sikandan te, “Ed-eǥawen tew is tanà te Megbevayà.”

13 He Megbevayà, ipeyapat nu sikandan iring te eliyavuk wey ukap he idlayap te keramag.

14-15 Iring te hapuy he midelandap he nekevinsul te menge kayu ziyà te vuvungan, del-asa nu sikandan ne pelihendeka nu pinaaǥi te vagyu.

16 Peel-elezi nu sikandan, Nengazen,

taman te edangep sikandan diyà te kenikew.

17 Berakat he mepeel-elezi wey utew mengehandek sikandan te wazà pidtemanan.

Berakat he mebpatey zan he utew zan egkeeled!

18 Berakat he metueni zan he iyan ka, Nengazen,

he iyan dà Utew Lavew he Megbevayà kayi te tivuuk he kelibutan.