1 Is minsan hentei he ed-aput diyà te Utew Lavew he Megbevayà he Mekeǥeǥehem, wazà ebpekekaid kandin.

2 Ebpekekaǥi a, ke siak te, “Is Nengazen, iyan sikandin eputè ku wey melig-en he elesà.

Iyan sikandin Megbevayè ku he edseriǥan ku.”.

3 Emun ed-aput ka ziyà te kandin, idlikey ke zin te menge pekaid wey te ebpekepatey he menge zaru.

4 Edlekupan ke zin iring te piyak ne wazà ebpekekaid kenikew.

Is kebmetinumanen din iyan kelasag nu wey pengalang nu.

5-6 Kenè ka ereg he egkahandek te mekehandekhandek he menge hitavù,

wey te ebpenggezamen he menge zaru, wey menge vangkit he egkehitavù ke mezukilem etawa maandew.

7 Minsan linibu pa he menge etew is ebpematey ziyà te ebpekeliǥuy kenikew, kenè ka egkemenu.

8 Egkeehè nu zà ke ebmenmenuwen te edsilut is lalung he menge etew, ne kenè ka egkeragkes.

9 Geina te ziyè ke man med-aput te Nengazen he iyan kes Utew Lavew he Megbevayà he iyan ebpengalang kedì,

10 umbe wazà limas etawa vangkit he ebpekezezaat kenikew wey te pemilya nu.

11 Su edsuǥuen te Megbevayà is menge velinsuǥuen din

te kebantey kenikew minsan hendei ka ebpevayà.

12 Edselupepayen ke zan wey kenà mepelii is menge paa nu te menge vatu.

13 Bà nu zà egieki is menge erimaung wey is edhereg he menge uled.

14 Migkaǥi is Megbevayà te, “Edlibriyen ku wey edlevanan ku is mibmahal wey migkilala kedì.

15 Emun ed-umawen e zin, ne edtevaken ku sikandin;

emun edlised sikandin, ne eduma a kandin;

edlibriyen ku sikandin wey ebeǥayan ku te zengeg.

16 Ebeǥayan ku sikandin te meluǥayad he untung,

ne ibpeehè ku kandin is kedlibriya ku kandin.”