1 Sikiyu is menge etew te tivuuk he kelibutan,

kentahi niw te veǥu he kanta is Nengazen!

2 Kentahi niw is Nengazen ne deliǥa niw sikandin.

Tudtula niw kada andew is mehitenged te kedlibriya zin kenitew.

3 Ipetueni niw ziyà te langun he menge etew ziyà te menge nasyun is kegkemekeǥeǥehem din

wey is egkein-inuwan he menge vaal zin.

4 Su mekeǥeǥehem is Nengazen, ne ereg sikandin he edeliǥen.

Dait sikandin he edtehuzen lavew te langun he zuma he menge ed-ezapen.

5 Su is langun he menge ed-ezapen te menge etew ziyà te zuma he menge nasyun, ne menge ledawan he mibeelan dan dà,

piru iyan is Nengazen mibaal te langit.

6 Diyà te kandin is kegkemekeǥeǥehem wey kegkelavew,

ne ziyà te valey zin is desen wey kekempet.

7 Sikiyu is menge etew ziyà te menge nasyun, deliǥa niw is Nengazen.

Deliǥa niw is gehem din wey zesen din.

8 Deliǥa niw is kegkemeǥeǥehem din, ne uwit kew te pemuhat dutun te kedseled niw ziyà te valey zin.

9 Azap kew kandin diyà te segradu he etuvangan din.

Sikiyu is menge etew kayi te tivuuk he kelibutan, medtahud kew kandin diyà te etuvangan din.

10 Tudtula niw ziyà te menge nasyun is edhenduen te, “Edhadì is Nengazen.”

Melig-en is kedsevuka zin te kelibutan ne kenà heini egkewaleng.

Edhukuman din is menge etew te kedhukum he wazà egkevintahaan.

11-12 Medlipey is langit wey is kelibutan,

ragkes en is daǥat, menge vevesukà, wey is langun he netaǥù kayi.

Is langun he menge kayu ziyà te ketelunan henduen be te menge etew he ebpemenganta te kegkelipey

13 ziyà te etuvangan te Nengazen.

Su edhendini sikandin te kedhukum te menge etew kayi te kelibutan.

Egkezumahan te ketazeng wey ketutuanan is kedhukum din.