136
Kanta te Kebpeselamat
1 Peselemati is Nengazen su meupiya sikandin.
Wazà pidtemanan te ǥaǥew zin.
2 Peselemati is Megbevayà he lavew te langun he zuma he menge ed-ezapen.
Wazà pidtemanan te ǥaǥew zin.
3 Peselemati is Nengazen he utew lavew te langun he menge egalen.
Wazà pidtemanan te ǥaǥew zin.
4 Iyan dà sikandin midhimu te egkein-inuwan he menge hitavù.
Wazà pidtemanan te ǥaǥew zin.
5 Pinaaǥi te ketau zin, mibeelan din is langit.
Wazà pidtemanan te ǥaǥew zin.
6 Impelastar zin is tanà diyà te ebpekelapew te wahig.
Wazà pidtemanan te ǥaǥew zin.
7 Mibeelan din is andew wey vulan.
Wazà pidtemanan te ǥaǥew zin.
8 Mibeelan din is andew para meketayew heini emun maandew.
Wazà pidtemanan te ǥaǥew zin.
9 Mibeelan din is bulan wey menge vituen su para meketayew heini emun mezukilem.
Wazà pidtemanan te ǥaǥew zin.
10 Mibpenhimetayan din is kinekekayan he menge anak he maama te menge tig-Ehipto.
Wazà pidtemanan te ǥaǥew zin.
11 Impeǥawas din is menge Israilihanen puun te Ehipto.
Wazà pidtemanan te ǥaǥew zin.
12 Impeǥawas din sikandan pinaaǥi te zekelà he ǥehem din.
Wazà pidtemanan te ǥaǥew zin.
13 Midtevì din is Daǥat he Meriǥà.
Wazà pidtemanan te ǥaǥew zin.
14 Ne zutun mebayà te mid-elangan is impelayun din he menge etew zin.
Wazà pidtemanan te ǥaǥew zin.
15 Piru midlened din mulà is hadì diyà te Ehipto wey is menge sundaru zin diyà te Zaǥat he Meriǥà.
Wazà pidtemanan te ǥaǥew zin.
16 Migiyahan din diyà te sibsivayan is menge etew zin.
Wazà pidtemanan te ǥaǥew zin.
17 Mibpendezeetan din is mekeǥeǥehem he menge hadì.
Wazà pidtemanan te ǥaǥew zin.
18 Mibpenhimetayan din is bentuǥan he menge hadì.
Wazà pidtemanan te ǥaǥew zin.
19 Midhimetayan din si Sihon, is hadì te menge Amorihanen.
Wazà pidtemanan te ǥaǥew zin.
20 Midhimetayan din daan si Og, is hadì te Bashan.
Wazà pidtemanan te ǥaǥew zin.
21 Imbeǥey zin is tanè dan diyà te menge etew zin su para maangken dan heini.
Wazà pidtemanan te ǥaǥew zin.
22 Heini he tanà naangken te menge Israilihanen he menge suluǥuen din.
Wazà pidtemanan te ǥaǥew zin.
23 Netenuzan kiw zin hein kenà meupiya is kebpekesavuk tew.
Wazà pidtemanan te ǥaǥew zin.
24 Midlibri kiw zin te kedezaat te menge kuntada tew.
Wazà pidtemanan te ǥaǥew zin.
25 Mibeǥayan din te keenen is langun he menge linimbag din.
Wazà pidtemanan te ǥaǥew zin.
26 Peselemati is Megbevayà diyà te langit.
Wazà pidtemanan te ǥaǥew zin.