1 He Nengazen, luwasa a zutun te lalung wey mesipala he menge etew.

2 Ebpelanu zan te mezaat

wey layun dan ebulanga is menge etew.

3 Iring te edhereg he uled is dilè dan;

is menge lalag dan ne ebpekepesakit iring te hereg te uled.

4 Endilungi a, Nengazen, wey a kenà mesuǥat te menge etew he mesipala he tuyù dan is edezaat kediey.

5 Is menge mepelevawen, mid-endaman e zan te paaǥi he iyan igkeutela zan kedì.

Ke và e zà pait, iring te puket he intaan is paaǥi zan te kedhingutela zan kedì.

6 He Nengazen, iyan ka Megbevayè ku.

Pemineǥa nu, Nengazen, is kebpehizuhizu ku kenikew.

7 Nengazen he MEGBEVAYÀ, iyan ka mezesen he menluluwas ku.

Iyan ka nengalang kedì te timpu te tebek.

8  Nengazen, kenè nu ituǥut diyà te lalung he menge etew is tinguhè dan.

Kenè nu mehimuwa he medlampus is tuyù dan,

su kela ke mekepezalig dan.

9 Berakat he meuney is menge kuntada ku he nekelingut kedì te mezaat he tuyù dan pezem kediey.

10 Berakat he meuluǥi sikandan te regreg,

ne iulug sikandan diyà te menge vudsi ne kenè dan en mekaawà.

11 Berakat ke kenè en mebpedayun kayi te tanà is menge etew he menge tigbutangbutang te zuma.

Berakat daan he meumahi te vangkit is menge mesipala he iyan ebpekezezaat kandan.

12  Nengazen, netuenan ku he edlevanan nu is ketenged te menge ayu-ayu;

ibeǥey nu kandan is hustu he kukuman.

13 Siguradu he edeliǥen ka te menge metazeng ne ebpengungubpaan sikandan duma kenikew.