1  Nengazen, mezesen is ked-umew ku kenikew.

Ebpengemuyù a he ikehizu a kenikew.

2 Idtug-an ku kenikew is menge riklamu ku wey is menge kelised ku.

3 Ne emun neewaan ad te perateng, ne heeyan ke zed is ebpekevantey te menge egkengehitavù kedì.

Diyà te ibayè ku zuen idtuǥes kedì te menge kuntada ku.

4 Ahaa nu man is nekelingut kedì, wazà midtavang kedì, wazà nengalang kedì, wey wazà neipeng kedì.

5 Ebpengum-umawen ku sikew, Nengazen;

iyan ka ebpengalang kedì.

Iyan ke zà utew egkinehenglanen ku kayi te kelibutan.

6 Pemineǥa nu is kebuyù ku te tavang diyan te kenikew,

su wazè en duma he egkehimu ku.

Ilikey a te edtelinguma he edrasey kediey,

su memezesen dan kenà siak.

7 Ipeǥawas a kenikew kayi te kegkepirisuwa kedì,

wey a mekezalig kenikew.

Ne zutun ed-erungut kayi te kediey is menge metazeng

tenged te kebpurungi nu kediey.