1 Deliǥa is Nengazen!

Megkanta kew te veǥu he kentahan para te Nengazen.

Deliǥa sikandin diyà te ketiǥuman te menge etew zin he metinumanen.

2 Medlipey kew is menge tig-Israel; ikelipey niw is midlimbag keniyu.

Medlipey kew is menge etew ziyà te Zion tenged te hadì niw.

3 Deliǥa niw sikandin duma is kedsayew

wey kedtukar te tamburin wey menge alpa.

4 Su igkelipey te Nengazen is menge etew zin;

mibeǥayan din te zengeg is kenà memepelavawen pinaaǥi te kebpekezaag dan.

5 Medlipey is menge etew he mepezumdumahan te Megbevayà tenged te kebpekezaag dan;

megkanta zan te kegkelipey minsan diyà te menge hizeǥaan dan.

6 Kinahanglan he igkulahì dan is kedalig dan te Megbevayà dutun te egawed sikandan te meǥarang he menge ispada,

7 te kebales wey kedsilut te menge etew ziyà te zuma he menge nasyun,

8 te kebekusa te menge hadì wey menge pengulu zan,

9 su iyan kedsiluti kandan he insuǥù te Megbevayà.

Ne para heini te kegkezeliǥi te langun he menge etew te Megbevayà.

Deliǥa is Megbevayà!