1 Dengan te timpu he zatù pa is edumala te menge tig-Israel duen mid-aǥi he utew mepait he vitil. Ne zuen maama he meǥinged diyà te Betlehem he inged diyà te prubinsya he Juda he tenged dutun te vitil miduma zin is esawa zin wey is menge anak din he maama he zezuwa ne midteǥaad dan medhalin diyà te tanà he Moab. 2 Iyan ngazan dutun te maama, si Elimelek. Is esawa zin ne si Naomi, ne is menge anak din, ne si Mahlon wey si Kilion. Menge kevuwazan sikandan ni Efrata he tig-Betlehem he inged te Juda. 3 Ne hein diyè dan pa ed-ubpà te Moab minatey si Elimelek ne netaǥak si Naomi wey is menge anak din. 4 Ne haazà is menge anak ni Naomi, ne mibpengesawa te menge vahi he tig-Moab. Is ngazan te sevaha he vahi, ne si Orpah, ne is ngazan te sevaha, ne si Ruth. Ne hein menge sepulù en he tuig is ked-ubpè dan dutun te Moab, 5 minatey si Mahlon wey si Kilion, umbe iyan dà nesamà si Naomi.

6 Hein netuenan ni Naomi he edtentenuzan te Nengazen is menge etew zin pinaaǥi te kebeǥayi zin kandan te meupiya he sebpet, ne mibpenines sikandin wey ambey zin su edlikù dan diyà te Juda. 7 Migenat dan is ebpezumdumahà he edhendiyà te Juda, 8 iyan, hein diyè dan en te zalan migkaǥi si Naomi ziyà te menge ambey zin te, “Deyzey nasì ke ed-ulì kew en diyà te menge iney niw ne verakat he meupiya is tuvad keniyu te Nengazen iring te meupiya is mid-ulaula niw kediey wey te menge anak ku he minatey en. 9 Berakat he himuwa te Nengazen he zuen selakew he menge maama he ebpengesawa keniyu wey kew zan meelimahi ziyà te ubpeey zan.”

Ne midhezekan sikandan ni Naomi su ibpeǥenat din, iyan, midsineǥew zan 10 ne ke sikandan te, “Kenè key ed-ulì su eduma key en kenikew kayi te ked-ulì nu ziyà te menge kezuzumahi nu.” 11-12 Ne migkaǥi zutun si Naomi te, “Ulì kew en diyà te keniyu, menge ambey. Maan is eduma kew pa kedì? Ed-isipen niw pe be he egkeesawa e pa ne ebpekeanak te maama he ebpekeesawa keniyu? Kenè en egkehimu su meritan e en. Piru penenglitan ke egkeesawa a ǥuntaan te mezukilem ne ebpekaanak e pa, 13 edteǥazan niw pa sikandan he ebpendezekelà? Kenè kew en be ebpeesawa tenged dà kandan? Kenà egkehimu, menge ambey. Is tutuu, lavew pa he mereǥen is egkeulaula ku kenà sikiyu, su impaantus a te Nengazen.”

14 Ne zutun, mid-uman dan en maan medsineǥew ne si Orpah, midhezekan din si Naomi is enuǥang din su egenat en, iyan, si Ruth mulà, wazà sikandin medsuwey ki Naomi. 15 Ne zutun migkeǥiyan sikandin ni Naomi te, “Ruth, egenat en is izas nu su ed-ulì en diyà te menge kezuzumahi zin wey ziyà te zaan he ed-ezapen din. Umbe ulì ke en daan; duma ke en kandin.” 16 Piru midtavak si Ruth te, “Kenà a kenikew teǥela te ked-ulì. Su ke hendei ka ebpevayà, eduma a kenikew ke hendei ka ed-ubpà, dutun a zaan ebpekeubpà. Is menge minahal nu he etew, ebmahalen ku zaan. Is ed-ezapen nu he Megbevayà, ed-ezapen ku zaan. 17 Ke hendei ka ebpatey zutun a zaan ebpatey, ne zutun a zaan idleveng. Berakat he siluti a te Nengazen te utew meveǥat emun edsuwayan ku sikew ǥawas te kemetayen.”

18 Ne zutun, hein nesavut ni Naomi he utew ves egkesuat si Ruth he eduma kandin, ne wazè en sikandin mibelivad. 19 Ne midlaus dan en medhipanew taman te nekeuma zan diyà te inged he Betlehem. Ne hein nekeseled dan en, utew nengeinuinu is tivuuk he meǥinged ne pesikaǥi is menge vahi te, “Si Naomi ve heeyan?”

20 Ne migkaǥi si Naomi te, “Kenè niw iyan kediey ingazan is Naomi, kekenà, iyan niw kediey ingazan is Mara su utew ad egkeseeng is impaantus te merasey te Mekeǥeǥehem he Megbevayà. 21 Su hein mid-awà a kayi, mezakel is ingkelipey ku, iyan, guntaan te impeulì e en te Nengazen, wazè ku en igkelipey. Kenà a keniyu ngezani te ‘Noemi,’ su is Nengazen he Mekeǥeǥehem impaantus e zin.”

22 Iyan en haazà kebpuun te tiraǥun te barli te kebpekeuma ni Naomi ziyà te Betlehem duma is ambey zin he Ruth he tig Moab.