1 Ne si Boaz, diyà sikandin medtandang te husayan he ziyà te pultahan dutun te inged ne zutun sikandin mebpinuu. Ne zutun nekeuma haazà is etew he migkaǥi ni Boaz he iyan sikan is mesipeg te esawa ni Ruth. Ne mid-umew sikandin ni Boaz, ke sikandin te, “Geli, uvey ka kayi ne pinuu ke zèpa.” Ne zutun mid-uvey haaza is etew ne mibpinuu. 2 Ne zutun mibeyaan ni Boaz is sepulù he menge ebmeǥurangen dutun te inged ne impepinuu zin daan. Ne hein nemekepinuu zan en, 3 migkeǥiyan ni Boaz haazà is kezuzumahi zin te, “Nekelikù en si Noemi he ebpuun te Moab, ne egkesuatan din he ibelegyà haazà is tanà te kezuzumahi tew he si Elimelek. 4 Neisip ku he ibpesayud ku kenikew. Ne emun egkesuatan nu, pemesaha nu kayi te etuvangan kayi te menge etew. Iyan, emun kenè nu egkesuatan, kaǥi ka. Kenikew is ketenged te kebpemesaha kayi, iyan, ke kenè nu ebpemesahan ne kediey en sikan is ketenged.” Ne midtavak dutun haazà is etew te, “Ebpemesahan ku.” 5 Ne ke si Boaz te, “Emun ebpemesahan nu ziyà te ki Naomi haazà is tanà, ebpekepemalu ka ki Ruth te vahi te tig-Moab su wey ǥaked pa te pemilya te minatey haazà is tanà.”

6 Ne migkaǥi zutun sikan is etew te, “Ne emun iyan haazà, ibeǥey ku kenikew is ketenged su ke ebpemalu a kenà utew zekelà is igkevilin ku te kediey he menge anak. Iyan ka nasì pemasa su kenè ku egkehimu.”

7 Ne zengan, ke zuen ebpemasa te tanà diyà te Israel, iyan betasan dan is: haazà is ebelegyà, ne id-awè din is sandalyas din ne ibeǥey zin diyà te ebpemasa. Pinaaǥi kayi ibpeehè dan he nepirmahan en haazà is ed-ul-ulahan dan.

8 Ne tenged dutun hein migkeǥiyan te etew si Boaz te, “Iyan ka pemasa,” in-awè din is sandalyas din ne imbeǥey zin ki Boaz. 9 Ne zutun migkaǥi si Boaz diyà te menge ebmeǥurangen wey te langun he menge etew ziyà, ke sikandin te, “Menge tistiǥus kew ǥuntaan he mibpemasa ku ziyà te ki Naomi haazà is langun he tanà he ǥaked dengan ni Elimelek wey ǥaked ni Kilion wey ni Mahlon. 10 Ed-esewaan ku en daan si Ruth, is tig-Moab, sikan is esawa ni Mahlon. Pinaaǥi kayi kemulu pa egkaǥaked te pemilya te minatey haazà is tanà. Ne pinaaǥi kayi zaan duen pa menge kevuwazan din he zuma te menge kezuzumahi zin wey zini te inged din. Ebpekepenistiǥus kew en kayi ǥuntaan.”

11 Ne zutun migkaǥi is menge ebmeǥurangen wey is menge zuma he etew te, “Uya, iyan key ebpekepenistiǥus. Ne haazà is bahi he ed-esewaan nu, berakat he edhimuwen te Nengazen he iring sikandin ki Raquel wey ki Lea te menge esawa ni Israel dengan he utew kiw mezakel is menge kevuwazan dan. Berakat he medsepian ka is kevuwazan ni Efrata; berakat he mevantug ka zini te Betlehem. 12 Berakat daan he pinaaǥi te menge anak he ibeǥey te Nengazen keniyu ki Ruth, mevantug is menge kevuwazan niw iring te nevantug daan is menge kevuwazan te kepuun nu he si Perez he anak ni Juda wey ni Tamar.”

13 Ne zutun mibeyaan ni Boaz si Ruth ne mid-esawa zin ne midtuvazan si Ruth te Nengazen, ne mibmeǥingey ne maama is in-anak din. 14 Ne migkeǥiyan si Naomi te langun he menge vahi te, “Deliǥa is Nengazen su imbeǥey zin kenikew ǥuntaan is apù nu he ebpekeelima kenikew keuzemà. Berakat he mevantug keuzemà heini is batà te langun he menge zuma tew te menge tig-Israel. 15 Mahal ka ziyà te ǥehinawa te ambey nu ne minsan pa ke pitu pa is menge anak nu he maama kenà egkehimu he egkelevawan dan is tavang kenikew ni Ruth. Ne ǥuntaan pinaaǥi kandin mid-apù ke en. Pinaaǥi kayi te vatà meupiya zed is kebpekesavuk nu keuzemà ke ebmeǥurang ka su iyan ed-elima kenikew.”

16 Layun egkuwaa ni Naomi haazà is batà su edsekepuwen din. Iyan sikandin ed-elima zuen te vatà. 17 Ne is menge vahi he siringan dan dutun, migngezanan dan is batà ki Obed. Ne ke sikandan diyà te langun te, “Duen en anak he maama ni Naomi.” Si Obed, ne amey ni Jesse. Ne si Jesse, ne amey ni David.

18 Is keguǥuza te menge kepuun ni David ne iyan heini:

Si Perez, ne amey ni Hezron, 19 si Hezron, ne amey ni Ram, si Ram, ne amey Aminadab, 20 si Aminadab, ne amey ni Nashon, si Nashon, ne amey ni Salmon, 21 si Salmon, ne amey ni Boaz, si Boaz, ne amey ni Obed, 22 si Obed, ne amey ni Jesse, ne si Jesse, ne amey ni David.