1 Dutun te mezukilem he edhidhizeǥà a, ebulungen a te minahal ku. Egkesuat a he zuma ku sikandin piru wazà sikandin. 2 Umbe, mid-enew a ne mid-eneb ku hipenawa is inged, is menge zalan, wey is menge pelasa. Mibpen-ehè ku is minahal ku piru wazè ku sikandin maahà. 3 Naahà a te menge vantey zutun te edrunda sikandan dutun te inged. Mid-insaan ku sikandan te, “Neehè niw ve is minahal ku?”

4 Ne wazè en meuǥet dutun te ked-ewai ku zuen te menge vantey ne neturedu ku is minahal ku. Mibpurungan ku sikandin kepkepi, ne wazè ku en lekai taman te neuwit ku sikandin diyà te valey te iney ku, ziyà te ruǥu he zutun a meetew. 5 Sikiyu is menge vahi ziyà te Jerusalem, penangdù kew pinaaǥi te selazeng wey gasila he kenè niw ebpukawen is kebmahal zutun te kenè pa hustu he timpu.

6 Hentei heini is ebpekeuma he ebpuun te sibsivayan he henduen be te mekepal he evel he ebmeǥuymuyan te kehemut te mira wey beyewà–menge pehemut he ibelegyà te menge nigusyanti? 7 Iyan heeyan sikan is kerwahi ni Solomon he edliǥuyan te 60 he utew memetau he menge sundaru te Israel. 8 Pudu sikandan midseseluniket te ispada, ne memetau sikandan he ebpekidtebek. Mibpengendaman dan is edsurung minsan ke mezukilem. 9 Heini he kerwahi is mibpeveelan ni Hadì Solomon, iyan migamit te kebeeli kayi is menge kayu he ebpuun diyà te Lebanon. 10 Midtukuzan heini te mibpekeplaan te pelata, ne imburda ziyà te tambun kayi is bulawan. Is menge kutsun diyà te pinuuwà kayi, ne mibputus te manggad he merudtem. Ne is diyà te seled kayi he kerwahi impemekempet te menge vahi te Jerusalem.

11 Gawas kew en is menge vahi te Jerusalem, ne ahàa niw si Hadì Solomon is midseluub te kuruna. Ingkuruna heini kandin te iney zin dutun te andew he utew sikandin melipayen, he iyan kes andew te eseweey zin.