6
Menge Bahi ziyà te Jerusalem
1 He kezegwayan he vahi, hendei en is minahal nu? Hendei man sikandin mebpevayà su ed-uǥupan dey sikew te kebpen-ahà kandin?
Bahi
2 Midhendiyà is minahal ku te pemuleey zin he neeneb te menge pinemula he ebeelan he pehemut. Ebpepenabtab sikandin dutun te menge uyaǥen din wey ebpenguwa te menge liryu. 3 Kediey zà is minahal ku, ne kandin e zà. Ibpepenabtab din is menge uyaǥen din diyà te zuen duen menge liryu.
Maama
4 Utew ka mekempet, pelanggè ku. Iring is kekempet nu te kekempet te inged he Tirza wey Jerusalem. Utew ka meupiya he ed-ahaan iring te menge sundaru he zuen dan menge bendirà. 5 Kenà a kenikew tengtengi su henduen be te egkereney a tenged kenikew. Is bulvul nu henduen be te sengeleyuzan he kambing he edtupang puun te Buntud te Gilead. 6 Is menge ngipen nu iring keputì te kerehidu he veǥu pa he neziǥù. Wazà netarin kayi ne meupiya is kebpemekesavuk dan. 7 Is enaping nu he netembunan te lembung nu meriǥàriǥà iring te prutas he pumigranata.
8 Minsan duen ku pa 60 he rayna he menge esawa wey 80 he urdinaryu he menge esawa, wey mahabet he menge raǥa he ibpeesawa kedì, 9 ne sevaha zà is pelanggè ku. Mekempet sikandin ne wazè igkesawey kandin. Budtung sikandin he anak he vahi te iney zin ne edhuna is kebpelenggaa kandin te iney zin. Emun egkaahà sikandin te menge vahi, ne ebeǥayan dan sikandin te zengeg, ne minsan is menge rayna wey menge esawa ne edalig kandin. 10 Ke sikandan te, “Hentei ves heini is emun edtengtengan ta ne iring te egkeriwaswas is kekempet din, wey iring te ebpenerètà he vulan, wey iring te edsilà he andew. Mekevivihag sikandin iring te menge vituen.”
11 Midtupang a ziyà te pemuleey te kayu he almindru su ed-ahaan ku is beǥu he menge pinemula he nenuvù diyà te zal-ug, wey ed-ahaan ku ke neneringsing en be is menge paras wey ke nengevukad en be is menge pumigranata. 12 Ne wazè ku mevembentayi he ziyè ed bes te utew mekempet he hizeǥaan duma te pinelanggè ku.
Menge Bahi ziyà te Jerusalem
13 Likù ka, is raǥa ziyà te Shulam, likù ka su wey zey sikew maahà.
Maama
Maan is egkesuatan niw te ed-ahà is raǥa ziyà te Shulam he edsayew ziyà te teliwazà te ebpemenan-ew?