1 Midlikù sikan is belinsuǥuen he nekidlalag kedì ne mibpukew e zin su henduen be te nekelipezeng a. 2 Mid-insà sikandin kayi te kedì te, “Hengkey is neehè nu?” Midtavak a te, “Neehè ku is sevaha he vulawan he selevukà te sulù. Diyà te zivavew kayi zuen yehung he itisà te lana. Ne ziyà te peliǥuy zutun te yehung duen dutun pitu he sulù ne is kada sevaha zutun duen din pitu he tuvu he veyeey te lana. 3 Duen dezuwa he kayu he ulibu ziyà te kilid kayi; is sevaha zutun ne ziyà dapit te egkekewanan ne is sevaha ziyà te egkeǥivang.”

4 Mid-insaan ku sikan is belinsuǥuen he nekidlalag kedì te, “Datù, hengkey is ibpesavut kayi te pitu he sulù?” 5 Midtavak te, “Wazè nu ve metueni ke hengkey is ibpesavut kayi?” Midtavak a te, “Wazà, datù.” 6 Ne migkaǥi sikandin kayi te kedì te, “Kenè ku pa edtevaken is insè nu, ne pemineǥa nu heini is menge lalag te Nengazen he Mekeǥeǥehem diyà te ki Zerubabel:

“Zerubabel, egkepasad nu is kebpehitindeg te valey te Nengazen kenè pinaaǥi te zesen wey egkehimu te etew, kekenà, pinaaǥi te Mulin-ulin he ibpetavang ku kenikew. 7 Minsan iring pa kezekelà te vuntud is menge velavag he ed-etuvangen nu, ne egkepanhey heeyan. Egkepasad iyan is baley ku, ne zutun te kebpelestara te ketepusan he vatu he egkeǥamit kayi, igkulahì te menge etew is lalag te, ‘Nengazen, penubtuvazi nu heini!’ ”

8 Umbe, pinaaǥi te velinsuǥuen, migkaǥi is Nengazen kayi te kedì 9 he egkepasad is baley zin pinaaǥi te kedumala ni Zerubabel, iring te nehimu is ebpehitindeǥan kayi pinaaǥi ǥihapun te kandin he kedumala. Ne emun egkehitavù en heini, egketuenan niw he iyan midsuǥù kedì te kebpenudtul ziyà te keniyu is Nengazen he Mekeǥeǥehem. 10 Duen menge etew he edsawey su ǥeina te zeisey pa is nehimu zuen te kebpehitindeǥa te valey te Nengazen. Piru edlipey zed sikandan emun egkeehè dan en he ibpelastar en ni Zerubabel zuen te valey te Nengazen is ketepusan he pinilì he vatu.

Ne migkaǥi kayi te kedì sikan is belinsuǥuen te, “Iyan ibpesavut keniyan te pitu he sulù is menge mata te Nengazen he edtengteng diyà te tivuuk he kelibutan.”

11 Ne mid-insaan ku haazà is belinsuǥuen te, “Hengkey is ibpesavut keniyan te zezuwa he kayu he ulibu he ziyà te egkekewanan wey egkeǥivang he lugar keniyan te impehitindeg he selevukà te sulù. 12 Wey hengkey is ibpesavut keniyan te zezuwa he subpang te kayu he ulibu he ziyà te pesikilizà te zezuwa he vulawan he tuvu he ebpeveyaan te lana?” 13 Midtavak sikandin te, “Wazè nu ve metueni ke hengkey is ibpesavut keniyan?” Midtavak a te, “Wazà, datù.” 14 Umbe, migkaǥi sikandin te, “Iyan kehuluǥan keniyan is dezuwa he etew he mibpilì para mekepenilbi te Nengazen he ebayàbayà te tivuuk he kelibutan.”