Josue.
12.
Nesakup en te menge Israilihanen is menge tanà diyà te edsilaan te Jordan, puun te zal-ug te Arnon taman te Buntud he Hermon, ragkes kayi is tanà diyà te edsilaan he vahin te Araba. Iyan heini menge hadì dutun he menge lugar he nezaag te menge Israilihanen: Si Sihon he Amorihanen he meǥinged diyà te Heshbon. Sakup te ginhedian din is ketengà te Gilead. Puun heini te Aroer he kilid te zal-ug te Arnon, ragkes en is inged diyà te teliwazà kayi he zal-ug taman te zal-ug te Jabok, he dulunà te menge Amunihanen. 
Nesakup daan te ginhedian din is dapit te edsilaan he Araba, puun te Ranew te Galilea taman te Bet Jeshimot, he zapit te edsilaan te Zaǥat te Araba, ne taman pa ziyà te zivavà he lugtenaan te Buntud he Pisga. 
Is ikezuwa ne iyan si Og, is hadì diyà te Bashan. Sevaha sikandin te nesamà he menge kevuwazan te menge Ripanhen. Meǥinged sikandin diyà te Ashtarot wey ziyà te Edrei. 
Is nesakup te ginhedian din iyan is Buntud te Hermon, Saleca, is tivuuk he Bashan taman te zulunà te Geshur wey Maaca, wey is ketengà te Gilead taman te zulunà te Heshbon he nesakup te lugar ni hadì Sihon. 
Nezaag sikandan ni Moises he suluǥuen te Nengazen wey te menge Israilihanen. Imbeǥey ni Moises is tanè dan diyà te tribu ni Reuben, tribu ni Gad, wey ketengà he tribu ni Manase wey zan mepengevilin. 
Naaǥew zaan ni Josue wey te menge Israilihanen is menge tanà diyà dapit te edsenlepan te Jordan, puun te Baal Gad he Suǥud te Lebanon taman te Buntud he Halak petekezeg diyà te Seir. Imbeǥey ni Josue heini he menge tanà diyà te menge Israilihanen. Mibahin din heini ziyà te kada tribu te Israel wey zan mepengevilin. Ragkes kayi he tanà is menge vuvungan, is menge mibuntud-buntud diyà te edsenlepan, is Suǥud te Jordan, wey is lugtenaan te menge vuvungan, is menge disirtu ziyà te zivavà, wey is Negev. Iyan nehuna he menge meǥinged kayi is menge Hitihanen, Amorihanen, Canaanhen, Pirisihanen, Hivihanen, Jebusihanen. Iyan heini menge hadì kayi he menge lugar he midaag ni Josue wey te menge Israilihanen: 
hadì te Jerico hadì te Ai (uvey te Betel) 
hadì te Jerusalem hadì te Hebron 
hadì te Jarmut hadì te Lakish 
hadì te Eglon hadì te Gezer 
hadì te Debir hadì te Geder 
hadì te Horma hadì te Arad 
hadì te Libna hadì te Adulam 
hadì te Makeda hadì te Betel 
hadì te Tapua hadì te Hefer 
hadì te Afek hadì te Lasharon 
hadì te Madon hadì te Hazor 
hadì te Shimron Meron hadì te Acshaf 
hadì te Taanac hadì te Megido 
hadì te Kedesh hadì te Jokneam (diyà te Carmel) 
hadì te Dor (diyà te Nafat Dor) hadì te Goim (diyà te Gilgal) 
hadì te Tirza 31 langun he menge hadì.