Hibru.
1.
Kulu Negur, profet bunem, sain musei ado naab fire fire bun, tubuda tar wogõ fiyẽdin, 
anĩ ere, gama idikeleya naa enidi bun, ĩ Naal bunem wogõ fadan, Naal ĩ ereb ereb ganan akorouf nigin Negurem igirnen, ĩ bunem saa teneub ado inon. 
Naal ĩ Negur nẽ fula fiya medeĩya nẽ so fiya, ĩ Negur yogo gen bagai, in od totol ado bunem ereb ereb ganan megeir irou ifaref. Ĩ mosor lilik fiya anĩ age fel fen, saa ilun Negur Megeir Bagai ima biyalẽ ibodon. 
Negur, Naal yana ifenen are engel yeneid wal fiya, age fiya bagai, Naal ĩ engel wal fediya. 
Ere nigin, Negur ĩ yogon engel taka to eig ye irokenen, “Õ neu Kesu, gama aya õ Tamã wõ aul.” Takag, Negur ĩ engel taka nigin to eig ye iron, “Aya yogon Tama abodõf, ĩ neu Kesu ibodõf.” 
Takag, Negur ĩ yogon kesu matu tenebur ein irou isif sain bun, ĩ baban irok, “Negur nẽ engel ganan ĩ seli dalouf.” 
Negur ĩ engel nigin irok, “Ĩ yogon engel yau gen wowã douf nigin inodif, ĩ yogon kabĩ tamo yã bale gen wowã douf nigin inodif.” 
Anĩ ere, Negur ĩ Naal nigin irok, “O Negur, ogon tano gai gai ibodkalauf, õ ogon tano tobonunã madur bagai bun lo wouf. 
Õ tobonunã madur bagai nigin waũ laaf fen, tobonunã sane anĩ sese wedig, anĩ nigin, Negur, ogon Negur kulĩya nẽ moul õ bun fi felen, anĩ bunem, nẽ tã tar wal feid fen, ilun inenon.” 
Takag, ĩ irok, “O Odug, gariya bun õ teneub nẽ gariya kare won, õ imam saa unon. 
Idi fau inanakalauf, anĩ ere, õ fau ubodõf, idi ganan kolos gen sanef ilauf. 
Õ idi saket gen kori wediyouf, idi kolos gen falei wediyouf. Anĩ ere, õ ubodok gen ago ubodõf, ogon sain to idikalauf.” 
Negur ĩ yogon engel taka to eig ye irokenen, “Imau biyalẽ ubod mog, ogon kiwai tar õ yẽ inoya nẽ sawa anouf.” 
Age fiyauf are, engel idi ere? Idi uur Negur nẽ kabĩ daledig, tamo kayau isennẽya dalouf anidi disennẽdiyouf nigin Negurem idi sur fedidig.