1 Niani tuwa Belsasa wa xaitamoxi, nga Danyel ngabagu axamang tela bila mibingua, kimuya mana axa ba ngabagu muga ba. 2 Mana mibingagua ngabagu nga sibugu ngawa maluxuʼm gamgaminga haringina mana long sabangga Susa wa probinsia Elam. Ngali langga Ulai rubinia. 3 Baing ngabagu sipsip moning tela maxagia. Li lang rubinia. Salaming maxaxaya luwa. Tela maxaxayanganoa dali rianoa, ne sok kimuya mana. 4 Sipsip monina bam mala mana sangga yuwaxa xaung sangga kanggua xaung sangga bukang. Asaxa tela sanga ba xukxugia te, saing tela sanga ba hauli adi hanggalangiadi te. Libu ing murunganoa saing haringinganoa tubu sibuna.

5 Ngahatum mana axa baguli, baing hata sibuna li meme moning tela ma sangua sangga yuwaxa, kisi titi longgalo sapsap sibuna bila kindi dituxu titia te. Memea li salaming sabanga tela liwe mana maxandi. 6 Atin disala haringina, saing luki ma rangua sipsip moninoa menau ngabagu li lang rubinia ba. 7 Memea haunggana sipsip moninoa haringinga, atin disala buk, saing tahauti salaming luwa ba. Baing ina naga, sipsip moninoa xola mana haringingua ba soxauti. Memea taha mari saing ruhautiti. Ne axamang tela sanga ba hauli sipsipka ba sangua meme haringinganoa te. 8 Memea hasua sibuna, ne taxa bungina haringing sibuna, salaming sabanga galaina mari. Ne salam sabanga luwa luwa disok yabania. Taining tainina dahaing mala mana sangga luwa luwa.

9 Baing kaxukang tela sok sangua tela, saing haringinganoa tubu. Haringinganoa kaukau sangga bukang, sangga karaga, xaung sangga wa hataina titi ralanama Isrel wa mana. 10 Haringinganoa tubu sibuna ila ila laing haunggana bakbak sabalunamdi. Baing ting sabalunam teladi digabu hatung teladi mari titia saing ruhadi. 11 Itina bila hasusu mana Toxoratamona bakbak haungingam yanama. Baing salama unia hananianga xaidap tainingtaininama sangua, saing hanggalangia Numanoa. 12 Mana kubulu diana salama xap haringinga etua mana bakbak haungingama xaung hananianga xaidap tainingtaininama. Axamang longgalo libudi bing daharingia yanoa, saing ting haruanga maxunama mari titia.

13 Baing ngalungu Urana uleginam tela harua, saing uleginam tela muli xusunga ba, “Bungintabi bagula axadi disok mana mibinga li disup? Bungintabi bagula hananianga xaidap taining taininam soxautingama sup? Bungintabi bagula kubolu diana xap hanggalangiangua ma sup? Bungintabi bagula sup mana kubulua wa etua mana Urana Numanoa xaung ruha Toxoratamona lipuxindi king ubunia?”

14 Haxuya ba, “Yambong xaung xaidap 2,300 disup to. Baing ina naga, Urana Numanoa bagula sok xai muli.”

15 Nga Danyel, ngabagu axamana bila mibinga ba, baing ngatuba ba ngaxabia namuxinoa. Baing bagu tela li maxagia, bagunganoa bila lipu. 16 Ne ngalungu lipu tela waxungtuanoa ma lia mana Ulai Milaginoa, wagi ba, “Gebirel, ubaxanga axamana bila mibinga li namuxinoa na lipua li.”

17 Ma haxek mana longga ngali mana ba, baing ngamaxuwa sibuna saing ngagung kigu uxundi mari ngaturu ramramogua mala titia. Ne harua nanga ba, “Lipu, xai ba uxabia rangrang ba axamana bila mibinga ba bagula sok bungina axamang subinganoa.”

18 Harua nanga mua, baing ngamakmatia, ramramogua wa titia. Baing ringring nga saing iti nga mesa ngali.

19 Baing harua ba, “Ulungu to. Bagula ngabaxanga naung axadi bagula sok kimuya mana bunging ati salianama. Axadi bagudi li bagula disok haxek mana axamang subinganoa Urana mogu ba. 20 Sipsip moning salaming luwama ubagu ba mogu xaitamoxidi mana Midia xaung Pesia. 21 Memea mogu xaitamoxi mana Grik, saing salam sabanga liwe mana maxandi mogu xaitamoxing mugamugangama. 22 Salam luwa luwa daxap ala galaina ba yabanoa dimogu yongga luwa luwa bagula dimesa sangua yonggaxinoa, ne haringingading bagula sabanga bila mugamugangama te.

23 “Bungina xaidap subingandi mana yonggadi ba, bungina lipu hanggalangiangamgadi ba kuboludingdi didoa masup, baing xaitamoxi tela bagula sok, ramramonoa haring xaung xabiangang murakkama tubu buk. 24 Bagula sok haringina, ne haringinganoa bagula sok mana ing sibung haringinganoa te. Bagula hanggalangia axamandi buk, saing baraxing baraxinta bo ba libudi, bagula libudi. Bagula hanggalngia yanam haringindi xaung Urana lipuxindi. 25 Bagula libu muraga tubu buk, saing bagula itina hatumingania. Bungina lipudi dahatum ba duwa xai, bagula hanggalangia xumana. Alaba ing ganina te, xauna bagula haunggana Xaitamoxi mana xaitamoxi longgalo. Ning bagula doa, ne mana lipu tela haringinganoa te.

26 “Axamana bila mibingua mana yambongdi xaung xaidapdi ulungu ngabaxanga naung ba maxuna. Ning bunging maxaxaya sup to, tauna axamanadi li disok, binabu uyameng axamana bila mibinga li ranguaung.”

27 Baing nga, Danyel, sanggagu dimalai saing ngabusi ngakinu matabu xaidap xumana. Sup, baing ngamesa ngalibu xaitamoxi oxatanoa. Ngahixi sibuna ngamaxuwa mana axamana bila mibingua ba. Sanga ba ngaxabia namuxinoa te.