1 Bunging tela disup, baing Urana tuba Ebraham. Wagi mana ba, “Ebraham!”

Haxuya ba, “Ngawau.”✡ Hibru 11:17-19

2 Baing harua ba, “Oxop garama (mala), garam taininau Aisak murum sibuna mana (ba) baing, saing ula mana titia Moraya, mana bimbi tela bagula ngahatanga naung. La ba uhanania garama nanga etuaʼm yaba laing tau masup.”✡ 2 Naxuyanga (2 Stori) 3:1

3 (Buraging) buraraging sibuna, (baing) Ebraham mesa saing xauxau donki inia. Xap lipuxing oxatam luwa mala rangua xaung garanoa Aisak xauna. Baing ximxim xai mana hananianga taungam saing dahaxa mala mana longga Urana bala mana ba. 4 Xaidap tuwa, baing Ebraham bagu mahaing saing bagu longga wa haxek monga. 5 Baing Ebraham bala lipuxing oxatamdi ba, “Awa mua rangua donki la li. Ngagabu garua tam gala hataina lo bu tam gasabu. Laing sup, baing bagula tam gagoxoya ma muli ranguang.”

6 Baing Ebraham xap xai hananianga taungamdi saing ta garanoa Aisak yuxania. Baing ing sibuna xap yaba xaung waxanga saing raidi. Tang dahaxa mala, 7 baing Aisak harua na tibuna Ebraham ba, “Tibugu?”

Ebraham haxuya ba, “Ngawau.”

Aisak xusunga ba, “Yaba xaiya tang duwau, ne sipsip tutubina mana hananianga taungam kabi?”

8 Ebraham haxuya ba, “Garagua, Urana ing sibuna bagula sina sipsip tutubina mana hananianga taungam.” Baing tang dahaxa malau.

9 Tang disok mana longga Urana bala mana ba, baing Ebraham tongtongia kabukabu hananiangama la ba saing riri xaidi etua mana. Goxi garanoa Aisak saing hakinu kabukabu hananiangamia, etuaʼm xaidi.✡ Yems 2:21 10 Baing ina naga, Ebraham raria rimanoa saing xap waxanga bu ung garanoa. 11 Baing tegu. Toxoratamona uleginama wagi masok ma long xaiya mana ba, “Ebraham! Ebraham!”

Baing Ebraham haxuya ba, “Ngawau.”

12 Harua ba, “Labu ung garamau tai. Labu ulibu axamang tela manau tai. Namua na hatata ngaxabia ba maxung sibuna uwa hawa mana Urana. Ngabagu uxauxau ba uhanania garama nanga, usaxangia garam taininau te.”

13 Baing Ebraham bagu mauli saing bagu sipsip moning tela, salamindi digasi mana xai rimandi. Ila saing xap ma ung saing hanania etuaʼm yaba laing tau masup ba xap Aisak yabanoa. 14 Binabu Ebraham uxu longga ba, “Toxoratamona Bagula Sina.” Bila balau (laing/ma ma) hatata lipudi daharua ba, “Mana Toxoratamona bimbixinoa, bagula sina.”

15 Baing Toxoratamona uleginama wagi masok ma long xaiya mana Ebraham muli, 16 harua ba “Nga Toxoratamona ngaharua bila li: Ngaharingia haruangagua nga sibugu yagia ngaharua maxung sibuna. Mana namua ulibu bila li, usaxangia garama te, garam taininau baing,✡ Hibru 6:13-14 17 maxung sibuna bagula ngasina guxama naung saing bagula ngalibu bakbagimdi disok xumang sibuna bila hatungdi duwa sabalunia xaung ulangulang(di) (du)wa tegia.✡ Hibru 11:12 Baing bagula bakbagimdi didali bixuadingdi daxap long sabanga dingiadi. 18 Baing mana bakbagimdi* kimbo xuyanoa. bagula ngaguxam bakbak titiam longgalo, namua na usu mana haruangagua.”✡ Aposel 3:25

19 Baing Ebraham tang digoxoya mala muli rangua lipuxing oxatamdi, saing gabudi dahaxa mala Berseba. Baing Ebraham wa Berseba.

20 Bunging tela disup, baing Ebraham xap haruang(u)a ba “Milka xauna hayau garadi na kixingima Nahor. 21 Yadingdi bing: Us matuaua, kixinginoa Bus, Kemuel (Aram tibuna), 22 Keset, Haso, Pildas, Yitlap, xaung Betuel.” 23 (Betuel Rebeka tibuna.) Milka hayau gara lup 8 bagudi li na Ebraham kixinginoa Nahor. 24 Nahor yau hainging oxatam olanggam tela, yanoa Reuma. Ina xauna hayau gara lupdi, yadingdi Teba, Gaham, Tahas xaung Maka.