3
Yesu Yanoa Dali Moses Yanoa
1 Riagu hatuminga haringinam mana, ang Urana iniadi, saing wagiang bila wagi nga. Binabu ahatumia Yesu gaxarea. Ina Urana aposelinoa xaung lipu hananiangam mugamugangama. Ina lipua tabaxanga ba tahatum haringina mana. 2 Urana mogu bu tuxu oxatadi ba, saing tuxudi haringina, bila Moses tuxu Urana oxatanoa haringina liwe mana Urana lipuxing numanamdi. 3 Ne Urana sina yaya sabanga sibuna na Yesu, dali Moses baing, bila lipudi diti lipu numa tongtongianganama yanoa etua mana numua tongtongia ba. 4 Bila li: Numa longgalo lipudi ditongtongiadi, ne axamang longgalo lipuxiding tongtongianganama bing Urana. 5 Moses tuxu oxatua haringing sibuna liwe mana Urana lipuxing numanam longgalo. Oxatanoa bing baxanga axamandi Urana bagula harua manadi kimu. 6 Ne Kristo Urana Garanoa, saing tuxu oxatua haringing sibuna etua mana Urana lipuxing numanamdi bila ba. Baing kira bing lipuxing numanamdi, nabu tatuxu haringina kubolura hatuminga haringinama, xaung kubolura tata ragunga mana axamana Urana bagula libu makira.
Tamaxania Nam Tahatum Haringin Te
7 Bila balau, binabu tasu mana Urana Aningonoa haruanganoa ba,
“Nabu alungu waxungtuanoa hatata,
8 bing labu ariba hatumingaimdiu tai
bila mugangaimdi dilibu bungina diyamu nga,
mana bunging tubaikkam long xoliania,
9 longga mugangaimdi dituba dituba nga
saing dibagu axamang haringindi ngalibudi laing niani 40.
10 Namua naga atigu disala mana lipuadi ba,
saing ngaharua ba, ‘Bungingbunginalo hatumingadingdi dirabang,
saing dahaxa mana daxangagua te.’
11 Binabu atigu disala, ngabaxanga haruangua ngahau ba,
‘Sanga ba diluxu mana yabagu yaguangama te.’ ”✡ Olaidi (Buk Song) 95:7-11
12 Riagu hatuminga haringinam mana, amaxania, nam angia tela hatuminganoa doa xaung hatum haringin te, saing alaba libu hayamu Urana walingama. 13 Ning aharingiang xaidap taining tainina mana bungina duxu ba “Hatata”, nam kubolu diana muraginoa libu angia tela hatuminganoa ribaina. 14 Namua na kira tababa Kristo nabu maxung sibuna tatuxu haringina hatumingara haringina bila tatuxu muga, laing walingaradi disup. 15 Bila Urana Xuanoa harua ba,
“Nabu alungu waxungtuanoa hatata,
bing labu ariba hatumingaimdiu tai
bila mugangaimdi dilibu bungina diyamu nga.”✡ Olaidi (Buk Song) 95:7-8
16 Gaxarea dilungu Urana waxungtuanoa saing diriba hatumingadingdi? Ding ba mugangaradi Moses xaidi masok Isip baing. 17 Baing gaxarea Urana atin disala manadi laing niani 40? Adi dilibu kubolu diana baing, adi sanggadingdi dibuya long xoliania ba. 18 Baing gaxarea Urana harua manadi bungina harua ba bagula diluxu mana yabang yaguangama te? Adi naga dilungu haruanganoa te. 19 Baing ina naga, tabagu ba sanga ba diluxu te, namua na dahatum haringina mana te.