1 Pesto cobednadod yanash Sesadeya yacno choash 3tedec ushanec Edusaden yacno nidpondash. 2 Adec Pesto Edusaden yacno choash tabadsho isadaidbo tsusiobo, Pabado chushcaquido: 3 —¿Ëbitedi bëdambo icmenuequin Pabado Edusaden yacno ada bëmeoatsia? —quepondash Pesto chiec. Pabado bësho cuesunenuequidon cainshun cuesunepec, quequin tantiaquin isadaidbo tsusiobon aden Pesto chuipondash.

4 Aden chuisho tantiash Pesto: —Sesadeya yacnoshon nauedaid Pabado iquec. Ambo nidebi. 5 Pabadon icsamboen naosh, quec utsi-utsiec ëbëdi nidshun anoshon Pabadon naid icsa ëbi chuita —quepondash isadaidbo tsusiobo caic.

6 Adashic, 10tedec ushash Edusaden yacnoësh puduanec nidec Pesto Sesadeya yacno choash ushash badiadash matses chushquiaid tantiec tsadte dapan tsadtoshon Peston Pabado bëmepondash isadaidbo tabadnubi. 7 Aden bëmiacsho isash Pabado dëcatec isadaidbo Edusaden yacnoësh choboedo Pabadon naid chiec abimbo chiacbimboec onquecuededpondash.

8 Aden isadaidbon chiaquien: —Ëmbimbo isadaidbon naden nata quequin chiaid niacamboccombi. Adembidi, Nuquin Papa tabadte shubu uashunaid yacno nidash aid shubun puduedtemaid isadaidpembobëd puduedamboccobi. Adembidi, empedadod Doma yacno tabadquid, Sesad cuëmëdquidën chiaid niacamboccombi —quepondash Pabado.

9 Adoaquien: —¿Edusaden yacno buanac anoshon adomboembidida isadaidbo tsusiobo chuioatsia? —quepondash Pesto Pabado chiec. ¿Edusaden yacno Pabado ada bëmeoatsia? quequin isadaidbon chiacpaden nanuec Pesto adpondash. 10 Adoaquien Pabado: —Domanobo ancaquidën empedadod caidën, Sesad cuëmëdquidën, Mibi yacnocquido bëdamboen tabadmequid icta, caid icquin mimbimbo chushcananquid bëdamboen tabadmeta. Isadaidbo icsamboen tantiaquin nainquioccombi. Abimbo Pabadon chiec, quequin mimbi tantiec. 11 Icsambocquidquio iquec Pabado unës uame, quesho tantiash, Adoanenda, quenquioctsiabi. Isadaidbon abimbo chiacbimboen chuisho tantiash, Pabado buanshun cuidta, quetiapimbo mibi iquec. Isadaidbo yacno buanta, mibi quenuc, Empedadod ëmbi naid chuite bunebi, quequin dada uaindambi —quepondash Pabado Pesto chiec.

12 Aden Pabadon chuisho tantiash Pesto udictsëc nidash abipadquidbëd onquiash choash: —Sesad ëmbi naid chuite bunebi, mibi quesho aid yacno mibi buamenuna —quepondash Pesto Pabado chiec.

13 Adashic daëdpactsëc ushash ancanquid utsi Aquidipa cuëmëdquidbëd aton chuchu Bedenise cuëmëdquid Pesto isedec chopondash. Sesadeya yacnocquido cobednadod Pesto yanosh, quequin chiac aid isec chopondash. 14 Adec isedec choash dadpen ushec tabadsho isash Pabado chiec Pesto nadpondash: —Pediquesën quënën nauedmiaid Pabado cuëmëdquid chuinu. Tantiata. Aidi abi iquec shubu nuntan. 15 Aid ambo icnubi Edusaden yacno nidobi. Ambo ëbi choacsho isun, Pabado icsambocquid neque. Aidi unës uata, quequin isadaidbo tsusiobon chuiposhi.

16 “Adoaquien, Mibi abëdi chushquiaid Pabadontsen chiambocnoc unës uata quetiapimbo iquebi. Domanobon naden nata quequin chiacpadpenquiocquin adotiapimbo iquebi, quequin isadaidbo tsusiobo chiombi. 17 Aden chiac nëmbo choshon abi chushquiaid aidon chuisho tantiec tsadnuen Pabado bëmiombi. 18 Aden Pabado bëmiacsho ëmbi tantiacpaden abi chushcaquidon Pabadon naid chienquiocposh. 19 Ëmbi tantiaidpenquio Esuquidistu unësash uincuenaid Pabadon tantiaid icsambo iquec, quequin chuiposhi isadaidbo tsusiobon. 20 Aden ambi tantiaidquio bëdamboen tantienquio yec nadpobi Pabado caic. Min matsesën naden nata quequin chiaid tantienquio iquembique. Edusaden yacno buamiac mimbi naid anoshon chiac bëdambo ictsiash, quequin chiombi. 21 Adoaquien: ‘Empedadod, Sesad yacno nidshun ëmbi naid chuitiadquio iquebi,’ queposh Pabado. Aden chiac quënë yacnoshon aid puduedmetiapimbo iccobi. Nëmbobi Pabado quënën tabadec —quepondash Pesto Pabado chiec Aquidipa tantiamenuequin.

22 Adoaquien Aquidipa: —Ëbi aidën chuibansho tantiate bunebi —quepondash.

Adoaquien Pesto: —Badiadshun aidëmbi chuisho mimbi tantiendac —quepondash.

23 Aden Peston chiaquien badiadash bëdaidquio dasiuidash Aquidipabëd aton chuchu choash iccuededte quënën puduedash sondado chuiquido chuiquid utsibobëd aid daëdi tabadpondash. Aido tabadsho isun Peston Pabado bëmepondash. 24 Bëmiac Pabado nënantanquio nidtonobi Pesto nadpondash: —Ancanquid Aquidipan mibëd iccuededquidon ëmbi bëmeboed mibitedishun isec. Aidi chuinu. Tantiata. Isadaidbon, Nëid dada icsambocquid neque. Unës uame, quequin chioshi. Ëbi Edusaden yacno choacsho isun adoposh. Adomboembidi nëshun Sesadeya yacnoshontsen aidombidi chuioaposhi. 25 Aden chuisho tantiashun nëid ambi naid chuimeoapombi. Aden Pabadon chiaidtsen tantiashun, Nëid unës uatiapimbo iquebi, quequin tantiapombi. Aden ëmbi tantianubi, Empedadod yacno nidshun ëmbi naid chuite bunebi, quequin Pabadon chuiposhi. Adoac Doma yacno aidi buamenuna. 26 Aden buamenuen ¿atotsimbi dada uaquin empedadod chuipatsia? quequin tantienquiocquin Pabado ambi naid chuimeoaimbi ma aden chiac mibitedishun tantiaoapanuna. Aden tantiashun, Naden dada uata, mimbi cac dada uatsiambi. 27 Ambi icsamboen naid nibëdnuc Doma yacno buametiapimbo iquebi —quepondash Pesto ancanquid Aquidipabëd iccuededquido chiec.