1 ¿Nuquin Papan Mayanën tantiamiacpadomboen bëdamboen tantiaquidta icpec? Adquidën abëdtan Esus tantiaquidën icsamboen nasho isun: —Padi. Esus tantiaquid adesambo neque. Bëdamboec tabadta —caquid yendac. —Nëishec ëbitsen icsamane —queshun nëishenquio icquin aden chuiquid yendac. Abibi datantiadec: —Icsaquid nebi. Esus bëdamboen tantienquio yec adecbidi icsatsiabi —quequin tantiec: —Bëdamboec tabadta —quequid yendac. 2 Adec bëdamboec isnanec: —Bëdamboec tabadnuna —quec chuinanquiota. Adecbidi nashunanquiota. Aden naquin Nuquin Icbo Esuquidistun chiacpadomboen mimbi natsiac.

3 Utsien: —Utsibëd onquetiapimbo iquebi. Ëbiuidtsëqui bëdambo iquebi —quec abibi muauadquid icsambo iquec. 4 Adenquio yec mibibi datantiadta. —¿Nuquin Papan chiacpadectabi bëdamboec tabadpe? —quec mibibi datantiadta. Adashic: —Ai, Nuquin Papan chiacpadec tabadebi —quiash adecbidi bëdambo icta. —Utsitedi icsambo icnubi ëbiuidtsëqui bëdambo iquebi —quenda. 5 ¿Mimbi utsibon naid chuibanshoda Nuquin Papan: —Mibi bëdambo iquec —capatsiash? Padenquio. Mimbi bëdamboen naid isun: —Mibi bëdambo iquec —catsiash.

6 Esus tantiaquidon nadoquid yendac. Nuquin Papan chiaid abi chuibanquid nashunquid yendac. 7 Piacbo sequidbimboec matses iquec. Tantienquio icquidën icbompin uestsaidi siac canienquio ictsiash. Padnuen tantiaquidën ëshë bëdaidquio siac bëdamboec canitsiash. Tantienquio icquidbimboec icsambo icquid iquec. Ambi icsamboen naid icbompin uestsaidbimboec iquec. Icsauidequi tabadec unësash Nuquin Papa yacno nidtiapimbo iquec. Padnuen Esus tantiaquid ambi chiacpadomboen naic unësash Nuquin Papa yacno nidendac. Ëbi adsho tantiash: —Icsaido Nuquin Papan cuidenquio ictsiash —quec muaic tabadenda. Ambi chiacpadomboen mibi cuidendac. 8 Ambi chiaid niac-niaquec abi icsate bunaiduidi naquid cuidendac. Nuquin Papan Mayanën tantiamiacpadomboen naquidien bëdamboec tabadec unësash Nuquin Papa yacno tabadendac. 9 Ëmbi aden chuisho tantiash bëdamboec tabadta. Bëdamboec tabadec chieshtoenquio icsho isun ambi tantiacpadën Nuquin Papan abëdi nuqui tabadmendac. 10 Adec bëdamboec tabadquin utsibo bëdamboen isquin nashununa. Aden utsibo bëdiactsëc tantiec Esus tantiaquido yec tantiananquiec nashunanquionona. —Shubu abentsëquën tabadquidobimboec Esus tantiaquido iquec —queshun adonona.

11 Is. Nua-nua icnuc dada uaquin ëmbimbo ënquimbi dada uanu. 12 Muaquin chuiquidon mibi con tsusedpan chiacpadomboenuidi nametiadquio iqueque. Aidon chuisho tantienda. Con matses isadaidbo: —Mibi bëdambo iquec —camenuen mibi adometiadquio iqueque. —Esusuidi chuisho con matsesën chieshënquin cuidnushe. Moisesën chiacpadomboen namenu —quequin mibi shui dëbid dëteshunemetiadquio icchitec. Aido muasho tantienda. 13 Aden mibi: —Adota —caquidombi Moisesën chiactedi nainquien icchitec. Adquid yec: —Is. Bëdambo iquebique. Ëmbi chiacpadomboen nëidon naosh —quenuembien mibi shui dëbid dëteshunemetiadquio icchitec. Aidon chiacpadomboen nainda. 14 Ëbien adtiapimbo iquec. Esus tantiesabimboec: —Ëbibi bëdambo iquebi —quetiapimbo iquebi. Esusuidtsëqui bëdambo iquec. Abi tantiaquid cuidmenquio icnuec abided cuidadec unëspac caondash cuesten dectanac. —Aidquio tantiec bëdambo iquebi —caimbi. Aden Esus tantiec: —Ëmbimbo Moisesën chiactedi naquin Nuquin Papa bëdamboen ismembi —quec ënëdondabi. Adecbidi Esus tantiec ëbi bunaid ënash icsate bunenquio iquebi. 15 —Moisesën chiactedi naquiduidi Nuquin Papan bëdamboen istsiash —quetiapimbo iquebi. Shui dëbid dëteshuniaidëmbi Esus tantienquio icsho Nuquin Papan cuidtsiash. Adembidi shui dëbid dëtiacmaidën Esus tantienquio icshobidi cuidtsiash. Nuquin Papan Mayanën chuca uaidien Esus tantiaquid Nuquin Papan bëdamboen isquin bëdamboen tabadmec. 16 Ëmbi aden chuisho tantiash: —Ai, abimbo mimbi caique. Adonona —quesho: —Aido Nuquin Papan bëdamboen isquin bëdambo icmepashun —caimbi. Adquido Nuquin Papan: —Con matsesquio nec —caindac.

17 —Abimbo chienquien icchitec —ëbi cainda. Esusën chiaidquio chiombi. Aidquio tantiaquin ambi chiacpadomboen nabanta. Ëmbi Esusën chiacpadomboen nasho isun chieshënquin cuesaniondashi. Cuesondaid bish abi iquec. 18 Tantia, con utsibo. Mibi Nuquin Papa chianembi naden. —Mimbi nabocpadomboen con Icbo Esuquidistubëdtan Cadasia yacnocquido bëdamboen ista, Papa —quequin Nuquin Papa chianembi. Padi. Aidtedi chuiquin dada uaombi.