1 Aden icsamboec tabadaid ëmbi chuisho tantiash: —Adquid icsamboshë iquec —¿quecta ique? —Aden naic aid icsaic —queboedi mibitsen adecbidi icsapec. —Icsaquidpenquio nebi —quec mibi muaic. 2 Nuquin Papambien matsesën naidtedi tantiaquid icquin: —Nëido icsambo iqueque. Icsano nidmenu —quequin abimbo chiendac. 3 —Matses utsibo icsambo iquec —queboedombi mimbitsen Nuquin Papan chiaid niac-niacpec. Adash: —Nuquin Papan nuqui cuidenquio iquec —¿quecta ique? Mibitsen Nuquin Papan cuidendac. 4 Ambi uaido matses abitedi icsambo icsho isash unësquio icquin matses bëdamboen iste bunquin icsaidobi Nuquin Papan baded cuidenquio iquec. —“Icsaboedi nëbi Nuquin Papan chiacpadec bëdamboec tabadtiadquio iquebi,” quequin ma matsesën ëbi tantianu —queshun Nuquin Papan matses baded cuidenquio iquec. Abi icsaid ënenquio icsho isun cuidendac. ¿Adsho tantiashta mibi nadpe? —Mua. Nuquin Papan ëbi cuidtiapimbo iquec. Ambi chiaid niaquesambo nebi —¿quecta ique? Adec onquec mibi muapec.

5 —Nuquin Papan chiaid niacboedëmbi ënta —caqui: —Padi. Ëmbi naiduidi naic bëdambo iquebi —quequin ënenquio icquin Nuquin Papan chiaid niac-niacbudec icsamboecuidi mibi tabadec. Aden mimbi Nuquin Papa cuidmendac. Nuquin Papan matsesën naidtedi chuite ushëmbi mimbi icsamboen naidtedi chuishun Nuquin Papan mibi cuidendac. 6 Matsesën naidtedi tantiaquin matses cuidendac. Bëdambo icquido abëdi tabadmequin icsaido icsano nidmendac Nuquin Papan. 7 Abi tantiec bëdambo icquido: —“Mibi bëdambo iquec,” mabi Nuquin Papan canu —quiash abëd tabadte bunec Nuquin Papan chiacpadec bëdamboec tabadec nec. Aido unësacsho Nuquin Papan abëdi tabadmendac padpidec unëstiapimbo icnuc. 8 Icsaquidoen Nuquin Papan chiaid chiaqui tantiate bunenquio icquin aton nauidi naic icsamboecuidi tabadsho Nuquin Papan comapenen cuidendac. 9 Adoac icsamboec tabadquido abitedi natiacuededec tabadendac. Shubiquiendac. Con matses isadaidbo Nuquin Papan chiaid ambia tantiampidi icsasho cuidquin matses utsibotsen icsasho Nuquin Papan cuidendac. 10 Abi tantiec bëdamboec tabadquido unësacsho abi yacno tabadmeshun: —Nëid bëdamboec tabadquid niondash —quequin utsibo tantiamequin Nuquin Papan bëdambo icmendac. Ambia Nuquin Papan chiaid tantiondaido Isadaidbo abi tantiaquid icsho abëdi tabadmequimbi matses utsibotsen abi tantiaquid icsho Nuquin Papan abëdi tabadmendac. 11 Icsamboec tabadquido icsano nidmequin bëdamboec tabadquido abëdi tabadmendac. —Isadaidbouidtsëqui bëdamboen isembi —quenquio icquin adoendac.

12 Nuquin Papan chiaid tantiacmaido matses utsibo icsamboec tabadsho Nuquin Papan cuidendac. Isadaidbo Nuquin Papan: —Naden nata —quequin chiaid tantiashi aidën chiaid niac-niaquec icsamboec tabadsho adembidi cuidendac. 13 Ambi: —Naden nata —quequin chiaid tantiashumbic adomboen naisa bëdamboen istiapimbo icquin ambi chiacpadec tabadquid Nuquin Papan bëdamboen istsiash. 14 ¿Ada Nuquin Papan chiaid tantiacmaidon matses utsibon bëdamboec tabadte tantienquio iccuededpec? Ma bëdamboec tabadte abentse-abentsen ambembi tantieyoc. Aden tantiaquin Nuquin Papan chiacpadomboen abentse-abentsen bëdamboen naic Nuquin Papan chiaid tantiashumbimboen. 15 Adec bëdamboec tabadec: —Bëdambo iquebi —quequin ambembi tantiec. Icsamboec tabadec: —Icsachitobi —quequin adembidi ambembi tantiec. 16 —Adec matses abitedi bëdamboec tabadte tantiequi adquiec tabadenquio iquec —queshun Nuquin Papan chiacpadën Esuquidistun matses cuidendac. Matsesën otacquio tantiaidbëdta matsesën ompoquin naidtedi ambembi tantiashun Esusën matses cuidendac. Esus chuibanquin aden aidën cuidte chiombi.

17 Tantia, con matses isadaidbo. Mibi chuinu. Mibi nadpec. —Isadaidbo nebi. Nuquin Papan ambi chiaid con tsusedpa Moises dada uamepampic. Aidën tsyuecquid icsho Nuquin Papan ëbi bëdamboen isec. Utsibon Nuquin Papa tantienquio icnubi Nuquin Papambo con matsesbëdtambi bëdamboen tantiembi. Bëdambo iquebi —mibi quepec. Adboedi mibi icsaic. 18 Nuquin matses tsusiobon chuibanac Nuquin Papan ambi chiaid Moises dada uamepampid mimbi tantiec. Nuquin Papan chiacpadec utsibo bëdamboec tabadsho isash: —Aido bëdamboec tabadec —queboedi mibi bëdamboec tabadenquio icpec. 19 Adecbidi: —Nuquin Papan chiaid tantiacmaido Nuquin Papan chiaidquio chuibanquid nebi. Paposhquiacbimboecnuc tantiamequidquio nebi —mibi quepec. Adboedi aidën chiaid niaquec mibi icsaic. 20 —Chuisho tantiabi icquido nëbi tantiabentsëcquidobëdta Nuquin Papan chiaid chuibanquid nebi. Abitedimbo tantiaquid icquin Nuquin Papan abimbo chiampidquio chuibanquid nebi —mibi quepec. 21 Adec: —Nuquin Papan chiaid niac-niaquenda —queboedëmbi aidën chiaid mimbi niac-niaquec. —Ampenda —queboedëmbi mimbitsen ampepec. 22 —Utsin chido chudenda —queboedëmbi utsin chido mimbitsen chudpec. Papa quequin matsesbimboecnuc matses utsibon nacnenaid isash: —Nuquin Papa tantienquio yec nëid nacnenquid icsambo iquec —queboedëmbi aidën nacnenaid tantiate shubun puduedshun mimbi ampepec. 23 —Nuquin Papan ambi chiaid con tsusedpa Moises dada uamepampid bedshun con matses isadaidbonuidtsëqui Nuquin Papa tantiec —queboedëmbi ambi chiaid niac-niaquec mibi icsamboec tabadec. 24 Adec mibi icsamboec tabadte chuiquin Nuquin Papan naden dada uamepampic. “Isadaidbo icsamboec tabadsho isun matses utsibon: ‘Ambi Nuquin Papa caidtsembien icsambo icchitec,’ capendac,” quequin dada uamepampicpadquiec mibi icsamboec tabadsho isun matses utsibon Nuquin Papa bëdamboen tantienquio iquec.

25 —Nuquin Papan matses nebi —quequin Isadaidbon Nuquin Papan aton tsusedpa chiampicpadomboen aton bacuëbo shui dëbid dëteshun secaic. Adonëdaid ambi chiaid niac-niaquenquio yec bëdamboec tabadsho Nuquin Papan bëdamboen istsiash. Isadaidbo utsibon ambi chiaid niac-niacsho Nuquin Papan bëdamboen istiapimbo iquec ambi con matses cacmaidobimboecnuc. 26 Nuquin Papan con matses cainquio icpampido matses utsiboen ambi chiacpadec bëdamboec tabadsho Nuquin Papan bëdamboen istsiash ambi: —Con matses nec —caidobimboecnuc. 27 Adec matses utsibo Nuquin Papan chiacpadec bëdamboec tabadsho isash isadaidbo nadec chiadpec. —Matses utsibo bëdamboec tabadnubi Nuquin Papan Moises dada uamepampid isban-isbanshumbi isadaidbon Nuquin Papan chiaid niac-niacpec. Isadaidbo matses dadpen icsambo iquec —cadpec. 28 ¿Shui dëbid dëteshun secaquido isadaidbotedi Nuquin Papa tantiaquidomboda nedic? Padenquio. ¿Matses ismenuen Nuquin Papan chiacpadomboen nashumbic ompoquin icsamboen naquido Nuquin Papa tantiaquidquioda nedic? Padenquio. 29 ¿Ambi Moises dada uamepampiduidi ëmbimbo nanuequid Nuquin Papa tantiaquidquioda nedic? Padenquio. Nuquin Papa tantiaquidquien aton Mayanën tantiamiacpadec bëdamboec tabadec. Adquid: —Mibi bëdambo iquec. Con matses mibi canu —capec Nuquin Papan matsesën adoenquio icnubi.