1 Aden Esus tantiasho Nuquin Papan bëdamboen isaido yec abi cuidte dacuëdënenquio yec abëdi nuqui bëdamboec tantiananec. 2 Ëmbi chuibocpaden abi tantiaquido nuqui cuidmenquio icnuec abided unësquin Esusën Nuquin Papa nuqui bëdamboen ismepec. Adoac nuqui nadpec. —Nuqui bëdamboen isquin unësacsho nuqui abipadquid icsaisa icmequin Nuquin Papan abëdi nuqui tabadmendac —quec nuqui cuishonquec. 3 Nadectsen nuqui cuishonquec. —Esus tantiaquid icsho utsibon chieshënaqui Esus tantiatsëcboedi chieshtoenquio icquin Esus tantiaquidquio yanebi —quectsen nuqui cuishonquec. 4 Aden chieshtoenquio icquin Esus tantiasho Nuquin Papan nuqui bëdambo capec. Adoac: —Esus tantiaquid icsho Nuquin Papan ëbi bëdambo icmec. Unësacsho abi yacno ëbi tabadmendac ambi chiacpadomboen —quepec nuqui. 5 Adec: —Abi yacno ëbi tabadmendac —quequin Esus tantiaquid ¿ada Nuquin Papan cacumepec? Padenquio. Aton Mayan nuquibëd icmiac paposhquiacbimboen nuqui naden tantiec. —Nuquin Papan ëbi bëdamboen tantiaquin abi yacno ëbi puduedmendac —quequin nuqui tantiec.

6 Aden matses tantiaquiec Nuquin Papan tantiacpadec Esus nadpanëdash. Matses abitedi abembi bëdamboec tabadtiapimbo icsho isun Nuquin Papan uesquin cuidtsenubi abi tantiaquido cuidmenquio icnuec abided cuidadec Esus unëspanëdash. 7 ¿Ada adquid matses icpadic? Padenquio. ¿Cuesanquidën matses bëdambo icquid caic: —Cuesnu —quesho tantiashunda dadpenshun: —Aid cuesenda. Ëbiquien cuesta —capatsiash? Padenquio. Bëdamboshë icquid cuesmenquio icnuen: —Nëid cuesenda. Ëbiquien cuesta —cachitembien ictsiash abentsëcshun. Icsambo icquid icshoen aden chienquio ictsiash. 8 Padnuen matses abitedi icsamboecuidi tabadnuc nuqui cuidmenquio icnuec Esuquidistu abided cuidadec unëspanëdash. —Nuquin Papan ëbi tantiaquiec —matses camenuen Nuquin Papan aden Esus namepanëdash.

9 Nëbi abided cuidadaidquio Esus tantiasho Nuquin Papan nuqui bëdamboen isec icsaisabimboecnuc. Aden bëdamboen isquin Nuquin Papan nuqui cuidtiapimbo iquendac. 10 Matsesën abi chieshënsho isun aido cuidte bunenquio icquin Nuquin Papan aton Madoded cuidpanëdash. Aden aton Madoded cuidash nëish bëdanshun Nuquin Papan aton Mado tantiaquid bëdamboen isec. Nëbi Nuquin Papan uincuemenëdaid icquin Esusën nuqui bëdamboen tabadmec. 11 Adembidi aidën tantiamiacpadomboen nuqui: —Ëbi cuidenquio icnuen aton Madoded cuidquid bëdamboshë iquec —quequin Nuquin Papa tantiec nuqui cuishonquec.

12 Nuqui bëdamboen ismequid Esus tishabi icnuc abia matses uaidën Adanëmba Nuquin Papan chiaid niac-niaquec icsasho cuidquin aidba Nuquin Papan unësquid icmepampic. Adembidi Adanën tsyuecquido matses abitedi Adan icsacpadecbidi icsate tantiaquimbi Nuquin Papan unësquidouidquio matses icmepampic. 13 Nuquin Papan: —Adec icsainda —quequin ambi chiaid Moises dada uamiabi icnubi matses abitedi icsapampic. —Ëmbi Moises chuimiaid mimbi niac-niaquec —Nuquin Papa quetiapimbo icnubi matses icsapampic. 14 Nuquin Papan chuiboedquiobi niaquec Adamba icsasho Nuquin Papan cuidac unësec taëpampic. Adan unësambic aidën nacpadomboen nabi icsa utsi naiqui matses abitedi icsasho adembidi unësquidouidquio Nuquin Papan icmepampic. —Naden nata —quequin Moises dada uamequin Nuquin Papan chiabi icnubi aidën chiaid niactiapimbo yec utsi naic icsashobi adopampic. Ambia Nuquin Papan chiaid niacampid Adampadquidpenquio Esuquidistu nec.

15 Matses abentsëcshun Adanëmba Nuquin Papan chiaid niacsho cuidquin aidba unësquid icmeshun aton tsyuecquido matses unësquidouidquio Nuquin Papan icmepampic. Adecbidi Nuquin Papa matses bëdamboen ismequid abentsëc iquec. Esusuidtsëqui abi tantiaquidotedi cuidmenquio icnuec abided cuidadec unëspac caondash. Nëbi aid tantiasho Nuquin Papan nuqui bëdamboen isec. 16 Adanën nacbimboen Nuquin Papa matses bëdamboen ismequidën nambo. Adan abentsëqui icsaquin Nuquin Papa cuidmiac abi unësacpadquiec matses abitedi unësquidombo yanac. Nuquin Papa bëdamboen ismequidëmbien matses icsaid bedshunec abided cuidadquin Nuquin Papa abi tantiaquidotedi bëdamboen ismec icsaisabimboecnuc. 17 Ambi chuiboedi niacquin Adanën Nuquin Papa cuidmiash unësquid yanacpadec matses unësquidouidquio iquec. Esuquidistunuidtsëqui nac Nuquin Papan matses bëdamboen isendac. Nëbi aid tantiasho Nuquin Papan nuqui bëdamboen isquin bëdamboec tabadquid icmendac. Adec bëdamboec tabadec unësash Esusbëdtan Nuquin Papan namiacno bëdamboshë yacnombo nuqui tabadendac.

18 Adec matses abentsëqui icsasho aidbëdta aton tsyuecquido matses abitedimbo cuidquin Nuquin Papan unësquidouidquio icmepampic. Padnuen Nuquin Papan chiacpadec abentsëqui abided cuidadaidën Nuquin Papa abi tantiaquido bëdamboen ismequin Nuquin Papa yacno tabadmendac. 19 Nuquin Papan chiaid niac-niaquec Adan icsaic taëambic aton tsyuecquido abitedimbo icsaquidouidquio yanac. Padnuen Nuquin Papan chiaid niaquesambo icquin Esusën Nuquin Papa nuqui bëdamboen ismec. 20 ¿Matses bëdamboen isnuenda Nuquin Papan ambi: —Bëdamboec tabadta —quequin chiaid Moises dada uamepampic? Padenquio. Matses abi icsaid tantiamenuen ambi chiaid Moises dada uamepampic. Aden chiaid chuisho tantiash: —Icsaobi —quequin tantiaquin abided cuidadaid tantiasho Nuquin Papan matses bëdamboen isec. 21 Taëec matses icsasho cuidac unësquidouidquio yanac. Adsho isun matses bëdamboen isnuen Nuquin Papan ambi chiaid niaquesambo Esusded cuidac. Nëbi Nuquin Icbo Esuquidistu tantiasho Nuquin Papan nuqui bëdamboen isec icsaisabimboecnuc. Nuqui unësacsho abëdi tabadmendac padpidec unëstiapimbo icnuc.