1 Pues te'i. Hermanoje'ex, a cünaje'ex tiqui wetel biqui'il a qui' a yan u boch betabül a walac u qui'cuntic u yool a Dioso. Baalo' ilic a tane'ex a betic aleebe. Yan a betique'ex a baalo'o, y boch baalo' xan. Tan ti t'an ta wetele'ex jabix ti witz'ine'ex ti bajil, y tan ti t'an ta wetele'ex etel u yanil a Noochtzil a Jesusu.* Col 1:10 2 Ti wadaj te'ex jabix u c'ati a Noochtzil a Jesusu. A weele'ex c'u' ti wadaj te'exe. 3 Le'ec a Dioso, u c'ati jadi' a tojil na'at a ca' a bense'exe. Ma' qui' ca' cüjlaque'ex etel a ca'ax macaca.* Ef 5:17 4 Jujun tuule'exe, a weelaque'ex biqui ca' a cüxte'ex a wütan jabix ti toj tu wich a Dioso, y jabix a toj tu wichoo' a cristianojo.* Ro 6:19 5 Ma' a beele'ex a cüxte'ex chen ti'i a beticale'ex a ca'ax c'u'ac jabix a walacoo' u betic a ma' u yeeloo' a Dioso.* Ef 2:12 6 Ti baalo' ma' yan mac a tan u yantal u sip'il ti'i u yetcristianojil yoc'ol abe'e. Le'ec a Noochtzili, bel u cu yusq'uin u jel wa ca' yanac a sip'il abe'e. Tu jajil ti wadaj te'ex abe' biq'uin ado'o.* Lv 19:11 7 Yeetbo'on u men Dios ma' ti'i u c'astal ti na'ati. Yeetbo'on ti'i ca' tojac ti na'at. 8 Wa yan a mac a ma' u c'ati u tz'oques a t'an abe' in tz'iibtaj tojo, tan u p'ütic u tz'ocsic u t'an a Dioso, ma' chen u t'an a cristianoji. Le'ec a Dioso, walac u tz'eec to'on u Püsüc'al.

9 Pues te'i. Uxtun u yacunbeeb a hermanojoo'o, ma' tzaj ti tz'iibtic te'ex yoc'ol abe'e. Le'ec a Dioso, tan ilic u ca'ansique'ex yoc'ol ca' a yacunte'ex a bajil.* Jer 31:34; Jn 6:45; 1 Jn 2:20,27; Jn 13:34 10 Yaj ilic a wu'ye'ex tulacaloo' a hermano tu cuenta Macedonia. C'u' betic hermanoje'ex, tan ti wadic te'ex ca' a yacunte'exoo' ti yaab y mas yaab. 11 Tz'aje'ex a wool tu pach a cuntal ti jetz'a'ane'ex a wool. Ma' a wocsique'ex a bajil ichil a ba'al a ma' te'exe. Uchuque'ex a meyaj etel a ba'al a te'exe. Baalo' ilic ti wadaj te'ex biq'uin ado'o. 12 Bete ti baalo', y le'ecoo' a ma' ta'achoo' u c'ajsic a Dioso, qui'oo' u yool ta wetele'ex. Ti baalo'o, ma' a noj-ooltique'ex a ma'ax mac etel a ba'al a c'abeet te'exe.

13 Pues te'i. Hermanoje'ex, ma' qui' tiqui wich ti ma' a weele'ex a jaj yoc'oloo' a quimene. Ma' top oc'tique'exoo' a quimen jabix a walacoo' u betic a ma' que'enoo' u yool tu pach a Dioso.* Lv 19:28; Dt 14:1; 2 S 12:20 14 Walac ti tz'ocsic ti le'ec a Jesusu, quimi y ca' cuxlaji tucaye'il. Walac ilic ti tz'ocsic ti le'ec a Dioso, bel u cu tz'aa' ti'i a Jesus ca' u laj talesoo' boon a hermano a quimenoo' ti wataca.* 1 Co 15:13 15 Le'ec a c'u' a tan ti wadic te'exe, le'ec u t'an a Noochtzili. Le'ec boono'on a cuxa'ano'on tojo, le'ec ca' emec a Noochtzili, ma' payanbejo'on ino'oni, ca' ti c'ümü' tuwichoo' a walacoo' u c'ajsic a Jesus ti quimoo'o.* 1 R 13:17 16 Le'ec ilic a Noochtzili, joc'ol u ca'a ichil a ca'ana. Bel u ca'a ti t'an ti chich ti tan u yemel. Le'ec u mas noochil a boon u yaj xa'num a Dios ti ca'ana, bel ilic u ca'a ti t'an ala'aji. Bel u ca'a ti peec u corneta a Dioso. Le'ec boon a quimen a ti'i a Cristojo, payanbej beloo' u ca'a ti ca' cuxtal.* Mt 24:30; Hch 1:11 17 Pachili, le'ec boono'on a cuxa'ano'on to ti wet'oc ala'oo'o, quet bel ti ca'a bensabül ichil a muyal ti c'ümü' a Noochtzil ichil a muyala. Baalo' bel ti ca'a ti cuntal etel a Noochtzil jumpul.* Hch 1:9; Rev 11:12; Jn 12:26; Jn 14:3 18 Jetz'cunte'ex a wool ta bajile'ex etel a t'an abe' in wadaj to te'exe.