1 ꞌBa tu ngijó= nixtjin chaja ngisa nga sꞌe̱ya sꞌi pascua kionga chine niñuxtila xi tsajainre naꞌyu san. ꞌBa ngakure naꞌmi ꞌba ko chjine kjuatexuma inyamangisjai ndiyare jótsaꞌen ku̱an subaꞌmoni Jesús, ꞌba sikꞌen. 2 Ngu tsure xinkjin:

—Bi ngajinre sꞌiu kjuinduba, tuxi bi sisiꞌani xutankjiun.

3 ꞌBa kionga Jesús tijña naxinanda Betania, nga ndaba Simón, xi xuta chiꞌin feꞌndujun ꞌmire; yejerañu Jesús tijñatꞌa yamixo, jaꞌe jngu chjun xi yaꞌa jngu lameta xi alabastro nini. Kui= lametabiu kjitse nanda xi suba naxu nardo ꞌbejunire ꞌba xi ne chjire. ꞌBa chjunbiu yakjan lameto ꞌba kio ꞌestenjunre nindaku Jesús nandabiu. 4 ꞌBa yakꞌa xuta xi tjindu kio kuakjanre, ꞌba kitsure xinkjin:

—¿Ánñu tu ꞌba tsaꞌen kitistentonni nandabi? 5 Kui kjua nga tsꞌaxtiu ján sientu ton denario chjire tsa kisateña tsakaiñu, ꞌba kuán kitsaꞌere xuta ni̱ma̱ tonbiu tsakaiñu.

ꞌBa jatiko chjunbiu.

6 Tunga Jesús kitsu:

—Bi ꞌba ꞌmi_ru; ¿ánñu tenistini_ru? Nda= tjin mé= xi kitsikona̱. 7 Ngatꞌa xuta ni̱ma̱ tu i= tjindujinntsjainu, ꞌba ku̱an kuiseko tu kjiaꞌañu nga mejénnú; tunga an bi ngaꞌe kuatejñajinntsjai_nuu̱. 8 Kui= chjunbiu kitsaꞌen= mé= xi kuán xi kitsaꞌen; nde ngandaꞌe=ni je kitsikjaꞌajnda ixi titjun yojona̱ ngatꞌa sꞌe̱yanijin=ña̱. 9 ꞌBa fa texinkixi_nuu̱, nitu ñañu ngaꞌndere ngasunꞌndio ña kjuaꞌaxtiuya en ndare Naꞌenchana, ꞌba=nde kjuinukjua mé= xi kitsaꞌen chjunbi, ꞌba ꞌbatsaꞌen kjuinikjaꞌetsjenya —kitsu Jesús.

10 ꞌBa Judas Iscariote, jngu xutare xi tejó, kikun ngakure naꞌmiu tuxi singantsjanire Jesús. 11 ꞌBa kionga naꞌmiu kjintꞌere, se kuatsja=re, ꞌba kitsure nga sjare ton. ꞌBa Judas ꞌetutsꞌinre nga tsangisjai mé= fa chu̱ba̱ xi ngisa nda nga singantsja Jesús.

12 Nixtjin nga ꞌetutsꞌinre sꞌi pascua kionga chine niñuxtila xi tsajainre naꞌyu san ꞌba nga nikꞌen chutsanga tseꞌe sꞌiu, xutare Jesús tsiningiyare:

—¿Ñáñu mejénri nga kuekꞌendai xi xina nga sꞌi pascua?

13 ꞌBa kio Jesús kitsikasen jó xutare ꞌba kitsure:

—Tangiun naxinanda jan. ꞌBa kio skajiun jngu xuta xi jngu nisa nanda yaꞌa. Kui= tangintjenngiu. 14 ꞌBa kioña kjuaꞌasꞌen, ꞌba tꞌin_ru xi naire niꞌyo: “ꞌBi titsu Naini̱: ¿Ñáre ngaꞌndeñu nga kuakjenkua̱ xutana̱ kionga kuechjijñii̱ sꞌi pascua?” 15 ꞌBa kio kui kuakunu jngu ngaꞌnde teya xi je tijñanda ꞌba xi ngankꞌare niꞌyo tijña. Kio tꞌendo xi xina.

16 ꞌBa xutare ꞌetju ꞌba kiji naxinanda jan. ꞌBa ꞌba fa tsaꞌen kuasjaire jotsaꞌen jaꞌba je kitsure Jesús. ꞌBa kio ꞌenda xi skinejñu sꞌi pascua.

17 ꞌBa kionga je tjimaꞌña, Jesús ꞌba ko nga tejó xutare jaꞌe ngaꞌndebiu. 18 ꞌBa yejerañu kionga inyakjentꞌa yamixo, Jesús kitsu:

—ꞌBa fa xinkixi_nuu̱ nga jngu ñu jun xi ñatjen tikjenkona̱, kui= xi singantsjana̱.

19 ꞌBa xutare kuabare, ꞌba ꞌetutsꞌinre nga tsiningiyare nga jngu jngu:

—¿A an= ña̱?

20 —Jngu xi tejó mañu, kui= xi ndekuini tiba titsikaꞌnyijinni niñuxtilare nga ko an —kitsingojore Jesús—. 21 Ngatꞌa tjinnere ꞌba ku̱anre Kiꞌndire Xuta xiꞌiun jotsaꞌen kuaꞌindutꞌa enre Naꞌenchana ngatꞌare kui. Tunga nimaxuni xi singantsja kui. Tusa ngisa nda kuánre tsa bi kitsin.

22 ꞌBa yejerañu inyakjenjñu, Jesús kiskjebe niñuxtilo ꞌba kionga je kitsjare kjuanda Naꞌenchana, kitsijoya ꞌba kitsjare xutare nga titsu:

—Chjubio. Yojona̱=bi.

23 ꞌBa jaskan kiskjebe=ni jngu chutsin. ꞌBa kionga je kitsjare kjuanda Naꞌenchana, kitsjare xutare ngayeje. ꞌBa ngatsiꞌi kitsꞌi. 24 ꞌBa Jesús kitsure:

—Kibi= xi jinna̱ xi tseꞌe kjua xatse xi tiꞌbendakoni Naꞌenchana ko xutare. Kui= xi ne nkjin xuta tistenntjainire. 25 ꞌBa fa xinkixi_nuu̱ nga bi nde binu kꞌuiña̱ kaꞌnda nixtjin nga binu xatse kꞌuia̱ ña batexuma Naꞌenchana.

26 ꞌBa kionga je kise jngu son xi tseꞌe Naꞌenchana, kiji tjenngi tseꞌe Ya Olivo. 27 ꞌBa Jesús kitsure xutare:

—Ngatsiꞌu sichajañu kjuamakjainnu ngatꞌa tsaꞌan; ngatꞌa ꞌba=tsaꞌen kuaꞌindutꞌa enre Naꞌenna: “Sikꞌía̱n xi tsikuenda chutsango, ꞌba kui tuchuña kꞌuetsumaba.” 28 Tunga kionga kjuaꞌayana̱ an, kjuititjun_nuu̱ nangi Galilea.

29 ꞌBa Pedro kitsure:

—Nisi ngatsiꞌi sichaja kjuamakjainre, an bi sichajaa̱.

30 ꞌBa Jesús kitsingojore:

—ꞌBa fa xinkixira̱ nga ndekuini nistjenbi, kionga kje kjiꞌndajín chaxicha xi majóni ndiya, ji je ján ndiya kisji nga bi xutana̱ kuáin.

31 Tunga Pedro tojo ꞌba= kitsu ngisa:

—Nisi tsa kueyakora̱, bi xia̱n tsa bi xutari kuán.

ꞌBa ꞌba= kitsu ngatsiꞌi xutare ngayeje.

32 ꞌBa jaskan echu jngu ngaꞌnde xi Getsemaní ꞌmi.

—Tetsubo ngaꞌe yejerañu an tefikjakuaa̱ Naꞌenchana —kitsure Jesús xutare.

33 ꞌBa Jesús kiko Pedro, Santiago ꞌba ko Juan, ꞌba ꞌetutsꞌinre nga ꞌñu ba kisꞌere ꞌba ꞌñu kuafore. 34 ꞌBa kitsure xutare:

—Kjuaba kitsejin inimana̱ joni tsa kui xi je sikꞌenna̱. Tetsubo ngaꞌe, ꞌba tetsubachun.

35 ꞌBa ꞌbatsaꞌen Jesús kiji ngubare, ꞌba kio tsakꞌejña tsindi ꞌnda tꞌanangiu, ꞌba tsiꞌare Naꞌenchana tsa ku̱an kjuaꞌatꞌaxinre chu̱ba̱ nga kjuaꞌa kjuanima. 36 Kionga Jesús tifako Naꞌenchana tsu:

—Abbá Naꞌen, ji xi mari ñaꞌan yeje tsajmi; tikꞌejñatꞌaxinnaa̱ kjuanimabi, tunga ngatjama jotsaꞌen mejénri ji, ꞌba bi jotsaꞌen mejénna̱ an.

37 ꞌBa jaskan Jesús jendiba ngani ña tjindu xutare, ꞌba kjiyufe nga echu; ꞌba kitsure Pedro:

—Simón, ¿a tetsjujñafe=ni? ¿A nijnguú chu̱ba̱ kichukjuari nga tsikenichin? 38 Tetsubachun ꞌba chjaꞌa_ru kjuanda Naꞌenchana, tuxi bi xutꞌayakoninú. Inimanu je tijñanda=, tunga yojonu inda ngisa.

39 ꞌBa kio Jesús kikjako ngani Naꞌenchana, ꞌba ndekuini en kinchja ngani. 40 ꞌBa kionga jendiba ngani nde, je kjiyufe ngani xutare ngatꞌa nijño inyaꞌbechja tuxkun. ꞌBa bi nde beni mé= xi singojore. 41 ꞌBa ꞌbatsaꞌen, jaꞌe ngani Jesús xi majánni ndiya, ꞌba kitsure:

—¿A tojo tetsjujñafe=ñu ꞌba tenikjaꞌaya=ñu? Ngatꞌe nde, je jaꞌe chu̱ba̱ nga Kiꞌndire Xuta xiꞌiun ku̱angantsjare xuta je. 42 Tisetjion, tangian nde. Chutsijon, je ndiba tiña xi singantsjana̱ an.

43 ꞌBa nde saꞌe= tinchjani Jesús kionga tukjiaꞌa jaꞌe Judas, jngu xutare xi tejó, ꞌba jaꞌe ne nkjin xuta xi kitsikasen nchja ngakure naꞌmiu, ko chjine kjuatexuma ꞌba ko xuta chinga. ꞌBa xutankjiun kicha= ko ya= yaꞌa nga jaꞌe. 44 ꞌBa Judas jaꞌba je inyaꞌa titjun nchjabiu nga kitsure:

—Kui xi kꞌuendsuꞌaa̱, kui=biu; nda tjindubo nga kueko.

45 ꞌBa kionga jaꞌe, tu Jesús fani kitsitiñatꞌare.

—Naꞌen —kitsure ꞌba ꞌendsuꞌa.

46 ꞌBa kio xutankjiun kitsubaꞌñu Jesús.

47 Tunga jngu xutare Jesús xi sejña kio tsꞌaxje kichare ꞌba tsatetꞌa ñojon chuꞌndare naꞌmi titjun. 48 ꞌBa Jesús tsiningiyare xutankjiun:

—¿Ánñu ko kicha ko ya kichꞌañu nga jaꞌechjaꞌanuu̱, joni tsa jngu chacheje kuáa̱n? 49 Nyujun nyujun tsakatejñajinntsjai_nuu̱ nga yakuya ngajin ndetsinre ningu, ꞌba niñajanni kjindubanuu̱. Tunga ꞌbi tjima tuxi kꞌuetjusunni jotsaꞌen kuaꞌindutꞌa enre Naꞌenchana.

50 ꞌBa ngatsiꞌi xutare Jesús tsanga ꞌba kitsikꞌejña tajngu.

51 Tunga jngu chanaꞌen xi tjenngire, tu jngu najñu tsꞌatjijunre yojore, ꞌba kui xi kitsuba nchjabiu; 52 tunga chanaꞌenbiu kitsuntjin najñure, ꞌba tu tsanga kjisti=.

53 ꞌBa ꞌbatsaꞌen kichani Jesús ngixkun naꞌmi titjun; ꞌba kio kuañajan ngatsiꞌi ngakure naꞌmiu, tseꞌe xuta chingo ꞌba ko tseꞌe chjine kjuatexumo. 54 ꞌBa Pedro kjin kitjenngini Jesús kaꞌnda ngandetsin ndaba naꞌmi titjun, ꞌba nchja xi tsikuenda kio tsikꞌejñajinre. ꞌBa kio kitsiꞌisure yojore tꞌa ndiꞌu.

55 ꞌBa kiongakure naꞌmiu ꞌba ngatsiꞌi xuta xo tsangisjai jngu xuta xi skaninejere Jesús, tuxi sjani en nga kjuinikꞌen; tunga bi kuasjaire. 56 Ngatꞌa ninga nkjin xi inyakaninere en ndesu Jesús, bi kjimangusun enre. 57 ꞌBa yakꞌa tsikinya nduju ꞌba kiskaninere en ndesu, nga inyatsu:

58 —Ji̱n kjinuꞌya_ri̱ nga kitsu xutabi: “An sikixuya=ña̱ ningubi xi tu xuta kitsinda, ꞌba ján nixtjin skjenitjen ngañaa̱ jngu xi bi xuta tsinda.”

59 Tunga ninga ꞌba= tsaꞌen kjimangusun enre.

60 ꞌBa kio naꞌmi titjun tsisetjen ngamasenre ngatsiꞌi, ꞌba tsiningiyare Jesús:

—¿A tumé singuaje ngatꞌare mé= xi inyakaninejeri?

61 Tunga Jesús xiu tsikꞌejña, ꞌba nijnguú en kitsingojo. ꞌBa naꞌmi titjun tsiningiya nganire:

—¿A ji= ni Cristo, xi Kiꞌndire Naꞌenchana?

62 ꞌBa Jesús kitsingojo:

—Jun, an= ña̱. ꞌBa xia=ñu Kiꞌndire Xuta xiꞌiun nga tijña ngate kixire Naꞌenchana xi tjinre kjuaꞌñu, ꞌba nga yufi kjuendibajinni ngankꞌaa.

63 ꞌBa kio naꞌmi titjun ꞌejnda najñure tuxi kjiꞌyanire nga ꞌñu chꞌo kisꞌere inimare, ꞌba kitsu:

—¿Jótsaꞌen ku̱achjen ngisana xi skaninejere? 64 Je kjinuꞌyo nga chꞌo kitsu ngatꞌa tseꞌe Naꞌenchana xutabi; ¿jó mixun?

ꞌBa ngatsiꞌi kuangusun enre nga Jesús tjinre je ꞌba nga tjinnere kueya.

65 ꞌBa yakꞌa nchjabiu ꞌetutsꞌinre nga ꞌetiajunre Jesús, ꞌba ꞌeꞌmo nkjain ꞌba yeꞌere.

—Ji xi profeta ꞌmi_ri yojori, ꞌba tꞌinnii̱, ¿ꞌyá= xi yeꞌeri ngandaꞌe nde? —kitsure.

ꞌBa nchja xi tsikuenda kio nkjain Jesús tsoꞌojin.

66 ꞌBa nga Pedro tijña ngi niꞌyo, jaꞌe jngu chjun chuꞌndare naꞌmi titjun; 67 ꞌba kionga chjunbiu tsabe Pedro nga tꞌa ndiꞌu tijña nga titsiꞌisure yojore, kitsure nga kiskutsejenꞌa:

—Ji ꞌba=nde Jesús tseꞌe Nazaret tsikitjajmekue ngayeje.

68 Tunga Pedro ꞌeꞌmotaꞌen yojore, nga kitsu:

—Junjun. Bi ꞌbexkua̱n, ꞌba bi mankjinna̱ mé= xi tesji.

ꞌBa Pedro ꞌetjuuni kio ꞌba kiji ña tijña xuntja ngandetsin. ꞌBa kio kiskiꞌnda jngu chaxicha. 69 ꞌBa chjun chuꞌndabiu tsabe ngani Pedro ꞌba ꞌetutsꞌinre nga yeꞌere nijmi xuta xi yakꞌa:

—Kui xutabi jngu xi tsakꞌajmeko jmibiu.

70 Tunga Pedro nde ꞌeꞌmotaꞌen ngani yojore. ꞌBa sangutjun, xuta xi tjindu kio nde ꞌba= kitsu nganire:

—Kjuakixi= nga Jesús tsikitjajmetjenngi_ri, ngatꞌa Galilea tsiji ngayeje.

71 ꞌBa ꞌbatsaꞌen Pedro ꞌetutsꞌinre nga chꞌo kitsu, nga kitsikꞌaxki ngatꞌare Naꞌenchana:

—Bi ꞌbexkua̱n xuta xi teꞌmi_ru —kitsu.

72 ꞌBa ndekuini chubabiu kiskiꞌnda ngani xi majóni ndiya chaxicho. ꞌBa kio Pedro jaꞌetsjenre mé= xi jaꞌba je kitsuꞌinre Jesús nga kitsure: “Kionga kje kjiꞌndajín chaxicha xi majóni ndiya, ji je ján ndiya kisji nga bi xutana̱ kuáin.” ꞌBa kionga Pedro jaꞌetsjenre enbi, kiskiꞌnda.