1 O Anutu, iŋgi aŋboobu. Uulu yo mi so zin tomtom ta kembei: Nio tomtom ndeeŋeŋoŋ.

Nu ta urur zaala pio pa pataŋana tio ta boozomen.

Tana leŋ suŋŋana tio ti mi muŋai yo. Pa nio mbesooŋo ku tau.

2 O yalei, niom tomtom ta kapasansaana nio zoŋ na, ŋiizi na kezem mbulu tiom tana?

Niom leleyom ilip pa mbulu pakaamŋana. Tamen mbulu tiom tana ko iur ŋonoono som. Tana ŋiizi na kezem?

3 Kozo kakam kat ŋgar.

Zin wal ta tiurur lelen pa Yooba mi titoto zaala kini na,

ni ikam zin ma tiwe lene.

Tana nio sombe aŋsuŋi, na ni ko iŋgun talŋaana pa tiŋiizi tio.

4 Niom tina konok sanaana kamŋana ndabok!

Kakam kat ŋgar mi komoto Anutu.

Sombe kusu muriyom be kekeene na, kuur niyom mi kakam ŋgar pa mbulu ta kakamam na.

5 Mi kakam patoronŋana ta indeŋdeeŋe men ila ki Yooba,

mi kapase pini.

6 Tomtom boozo tizzo ta kembei: “Aiss, takam lende mboti ambaiŋana so ndabok.”

Mi nio na, aŋso ta kembei: “Yooba, swe itum ramaki kampeŋana ku piam, mi kam mat ku ma iyaara piam.”

7 Mai ambaiŋana isombe ipet, ina ikam zin tomtom ma lelen ambai.

Tamen nio na, nu itum ta kam yo ma leleŋ ambai kat ma ilip. ✡ Pil 3:8

8 Yooba, iŋgi aŋsu muriŋ be aŋkeene i. Mi irao aŋmoto na som.

Pa nu itum ko motom pio. Tana nio ko aŋbot ambai, mi aŋkam kene tio ma ambai men.