1 Nio aŋur niŋ mi aŋsa Yooba be iuulu yo.

Mi ni iŋgun talŋaana pa tiŋiizi tio mi ileŋ yo.

2 Nio kembei aŋbot sula naala ta sananŋana kat.

Mi ni iweene yo ma aŋse.

Nio aŋdubup sula tiiŋgi sananŋana kat. Mi ni ipas yo ma aŋse,

mi iur yo sala toono mbolŋana

bekena aŋmender ma tuŋ. ✡ Mbo 27:5, 31:8, 69:14

3 Mi ikam leŋ mboe popoŋana be aŋbo mi aŋpakur Anutu kiti zaana pa.

Mbulu ta Yooba ikam pio na, wal boozomen tire. Tabe motoŋana ikam zin mi tiurla kini. ✡ Mbo 96:1; Tur 5:9

4 Tomtom ta so ipase pa Yooba itutamen, nako leleene ambai mi kampeŋana ki Yooba imbotmbot se kini.

Tomtom ta kembei, ni ipizilzil ndemeene pizin wal ta tipakurkur zitun.

Mi zin wal ta tizem zaala ambaiŋana mi timbesmbeeze pizin merere pakaamŋan na, ni igabgaaba zin som. ✡ Mbo 1:1, 84:12; 2Kor 6:14+

5 Yooba, nu ta Anutu tio. Kadom tomtom sa som. Pa nu kamam uraata bibip bekena uulu yam. Uraata tana ipa ndel kat.

Mi lelem iur kek be kam mbulu ambaimbaiŋan boozomen piam.

Sombe aŋtoombo be aŋnin zin, na aŋrao som.

6 Nio sombe aŋkam mbili sa, som kini sa be ampatoronu pa, na nu lelem pa pe som.

Mi sombe aŋneene mbili sa su kerem uunu, som aŋkam patoronŋana sa bekena reege sanaana tio, ina tomini, nu kam kinkiini pa som.

Mi nu kam ma talŋoŋ ileŋleŋ kat sua ku. ✡ Mbo 50:8+; Ibr 10:5+

7 Tana aŋso ta kembei: Anutu, nio ta aŋbotmbot ti.

Koŋ sua ta kwom bizin tibeede se ro ku kek na, nio ko aŋto.

8 Anutu tio, leleŋ ilip be aŋto nu itum lelem.

Pa sua ku imbotmbot la leleŋ i. ✡ Yer 31:33; Mt 26:39; Ro 7:22

9 Nu ute: Nio aŋmanne som.

Mbulu ku ndeeŋeŋana ta kamam bekena uulu yam na, aŋzzoyaryaara lela lupŋana biibi kizin wal ku. ✡ Mbo 22:22,25

10 Tana uruunu ambaiŋana ki ulaaŋa ku mi mbulu ku ndeeŋeŋana na, aŋwatkaala som.

Mbulu ku ta uluulu zin tomtom mi toto sua ku na, aŋswe kat.

Tana mbulu ku ta muŋaiŋai zin wal ku mi toto sua ku mbukŋana na, aŋwatkaala som.

Aŋzzoyaryaara lela lupŋana biibi kizin wal ku. ✡ Ŋgo 20:20,27

11 Yooba, tatke muŋaiŋana ku pio pepe.

Kampeŋana mi muŋaiŋana ku, ramaki sua ku ŋonoono, ta ko iporoukalkaala yo totomen.

12 Re. Pataŋana boozo kat ilol yo ma sik. Irao aŋnin zin na som!

Iŋgi sanaana tio ka kadoono ta izze tio i.

Tana aŋtaŋtaŋ mi motoŋ zarzar ma aŋre kat lele som.

Sanaana tio na boozo kat. Ilip pa uteŋ runrun.

Tabe aŋmoto mi mburoŋ imap kat.

13 O Yooba, lelem isaana pio mi kamke yo lak!

Loŋa mar mi uulu yo!

14 Zin wal ta tirru zaala be tipun yo ma aŋmeete i,

na pakankaana zin, mi pimiili zin ma tila raama kan miaŋ.

Mi zin wal ta tire pataŋana tio ti mi menmeen zin pa,

na zin tomini, ziiri zin ma timiili raama kan miaŋ.

15 Mi zin wal ta kalŋan izalla sorok mi tizzo: “Aa buri! Mbulu ta lelende pa be ipet pini, ta ipet pini kek!”

Na wal ta kembena, pamiaŋ zin mi kam zin ma tiru zaala.

16 Tamen wal boozomen ta so tikam kinkiini be tiute u mi timbot kolouŋana pu,

nako lelen ambai mi menmeen zin pu.

Mi zin wal ta lelen pa ulaaŋa ku ilip, nako lelen ambai mi tizzo totomen ta kembei:

“Tapakur Yooba zaana. Pa ni ta biibi ŋonoono.”

17 Yooba, motom iŋgal yo mini!

Pa iŋgi pataŋana ti ikam yo ma aŋrru zaala, mi leŋ ulaaŋa toro sa som.

Mi nu ta ulaaŋa tio mi tuŋ ŋonoono.

Anutu tio, naunau pepe. Loŋa mar mi uulu yo!